Di jabat palei Phan Dung, xa Tuy Phong (huyen Tuy Phong, tinh Binh Thuan dahlau diah), mbang brei thau harak dak angan urang palih ruah urang Quoc hoi khoa XVI saong HĐND dom pakat tukvak 2026 – 2031 tuk halei jeng hu rilo urang mai bac iek.

Ong Mang Nhu, bangsa Raglai daok di palei Phan Dung brei thau, dom harei tapa urang jakar palei gam gam trun tal yaok baoh sang piah khan brei thau ka mbang palih ruah, khan brei thau dahlau ka mikva duah thau ka dom urang lambaok saong pasang iek talei harak dak angan urang palih ruah, kuhria caga ka harei buh harak.

"Yaok urang bol hu quyen palih ruah dom urang lambaok, kayua yau nan ye njauk palih ruah yau habar ka nyu njauk, ka nyu tanat manuac urang. Lac urang palih ruah thei thei jeng caong khin dom urang lambaok hadei di ini njauk palih ruah ye sangka rilo jang tal hatai caong khin di bhap bani, sangka tal piah ka mikva hu rai riuk trei sil, haniem phol. Dahlak mboh mikva thei thei jeng chreih chai, pachreih jak ba anek kamuan drei urang ginup umur 18 thun tagok nao palih ruah."

Di xa Bac Binh, tinh Lam Dong (labik huyen Bac Binh, tinh Binh Thuan dahlau diah), ye bruk kuhria caga ka harei nyaom prong jeng hu peih ngak biak tani tanat. Nao tapa dom palei Cam, labik halei jeng mahit sap pathau khan brei thau ka mbang palih ruah. Oh lac janih pathau khan tapa loa papar sap, dom to palih ruah daok hu mbaok tapak pambuak bruk haong Urang hu angan je, dom halau janeng dalam bhap bani Cam trun nao tal yaok baoh sang piah jak ba, langyah brei ka mikva thau cambaih laih makna harei palih ruah raya.

Gru Huỳnh Cứng, sa halau janeng Cam daok di palei Binh Tien khan lac: tapa bruk pathau khan, mikva urang bangsa Cam hu thau cambaih laih jang ka bruk palih ruah nan oh lac quyen loi bo daok lac bruk njauk ngak di yaok urang bol, urang palih ruah. Meng di nan, pambak prong ar thak chreih chai bui sambai, jia tui piah ka harei palih ruah – harei 15/3 tal biak biai lac harei nyaom prong di taong abih bhap bani.

Amuk Nguyễn Thị Vân Khánh, Phaok Bi thu, akaok Uy mban palih ruah xa Bac Binh brei thau, taong abih xã hu labaih 36.400 urang palih ruah. Piah kuhria caga ka mbang palih ruah urang Quoc hoi khoa XVI saong HĐND dom pakat tukvak 2026 - 2031, karja xa hu samar peih ngak samu gauk dom bruk ngak ngan haong hatai kham merat glaong, abih di nyu lac bruk pathau khan.

" Bruk pathau khan njauk caik hatai, abih di nyu lac dalam bhum urang bangsa takik. Saong tui nan, khaol drei njauk pambuak bruk pathau khan piah brei thau saong klah rabha dom kadha dom bruk hu pambuak pagam tal bruk palih ruah. Tukvak bo pakat angaok tacei pato khaol dahlak jeng ngak njauk tui adat hukum, peih ngak dom asal kadha pambuak pagam tal bruk palih ruah. Saong khaol dahlak jia lac harei 15/3 biak biai lac harei nyaom di yaong abih bhap bani."

Ong Trần Di Hậu, Phaok akaok UB Bhap bini xa Tuy Phong, tinh Lam Dong brei thau, taong abih urang hu brei palih ruah di xa lac 6.616 urang angaok 9.751 urang bol. Dalam xa hu dua labik buh harak hu rilo bhap bani bangsa takik nan lac thon Phan Dung saong thon Tuy Tinh 2. Bruk pathau khan hu puk palei peih ngak tui rilo jalan ngak siam laghaih.

"Hadei di tuk taduan hu angan dom urang tabiak lambaok, xa jeng hu padang ngak kadha pathau khan katut panak di yaok urang lambaok piah papar sap angaok he thong loa papar sap, blaoh angaok dom blah fanpage. Saong meng ini tal harei adit di dom labik hu rilo manuac urang yau: Sang bac, darak ye hu caik jang dom baoh kapal pathau khan saong dom pa-no piah ka mikva pal kajap jang kadha prong glaong di mbang palih ruah."

Dom harei nyaom biai taom mbaok urang palih ruah haong dom urang tabiak lambaok, dom talei akhar pathau khan brei thau ka harei palih ruah, sap loa papar sap yava tagok yaok harei… taong abih daok ngak jeng ar thak chreih chai bui sambai dahlau di harei palih ruah di bhum bhap bani urang Cam, Raglai./.