Ap Tân Trung xa Tân Phú, tinh Tay Ninh nan lac sa labik pataom rilo bhap bani urang bangsa Cam. Yaom mada lac dalam bilan Ramanda/ramadan biak prong glaong ngan haong bhap bani Cam Islam min tapi mikwa jeng tui iek cambaih laih saong rami ramik bruk ngak di drei piah gam haong karja puk palei kuhria caga brei ka harei palih ruah raya.

Bruk puh bah rami ramik jalan mbak nao mai dalam palei, sang danaok saong labik peih ngak hatai jia nan lac sang megik… pachreih biak rilo mikva hu mbaok tame ngak. Uy ban palih ruah puk palei bhian pathau khan pambuak pagam dom adat hukum palih ruah tal taong abih bhap bani urang bangsa Cam. Sa-ai Chàm Mohd Sa saong sa-ai Ami Ná, urang palih ruah daok di ap Tan Trung, xa Tan Phu, tinh Tay Ninh khan brei thau:  

“Karja Xa hu pathau khan brei ka bhap bani bangsa Cam thau lac harei 15/3 nan lac harei palih ruah; harei nan lac jalan duan dalam palei njauk hacih sa-at saong tuan hala dok taneh aia, hala dok Ndang”.

“Khaol dahlak lac dom bhap bani tuk halei jeng caong khin dom urang lambaok tame Quoc hoi, HĐ Bhap bini meda gam gam saong patui sangka rilo jang tal bhap bani bangsa takik, abih di nyu lac bruk ngak mbang daok dang saong dom sarak brei ka bhap bani”.

Tapa bruk dakvah pathau khan, thau hu makna, bruk prong glaong di mbang palih ruah raya, jeng yau rup saong bruk njauk ngak di drei, yau nan ye urang palih ruah bhap bani Cam Islam saong urang palih ruah bhum urang bangsa takik tinh Tay Ninh thei thei jeng chreih chai bui sambai, cang mong tal harei hu nao buh harak, palih ruah njauk dom urang hu ilamu, hu jalan diuk rai siam gheih piah lambaok ka hatai caong khin di drei. Ong Chàm Min, Akaok Mban lambaok Jammaah Islam tinh Tay Ninh caong khin:

“Kadha caong khin di bhap bani urang bangsa Cam Islam tinh Tay Ninh ini jeng payua tal taong abih urang lambaok halei hu taka harak buh glaong piah lambaok ka mikva, lambaok ka bhap bani, abih di nyu lac bhap bani urang bangsa takik dak harei dak cak rok patagok jang”.

Daok di palei Ka ot, xa Tan Ndong, tinh Tay Ninh labik hu rilo bhap bani urang bangsa Khmer daok, bruk kuhria caga ka harei palih ruah jeng mboh biak chreih chrai bui sambai. Kapul nyaom urang ngak gah mat tran saong dom kapul nyaom di puk palei hu “nao yaok canah jalan, pataoh yaok baoh sang”, kayua yau nan ye bruk kuhria caga ka harei nyaom raya di taneh aia nagar hu rah tabiak dalam siam laghaih. Sa-ai Sà Tết Ang, Akaok ap Ka Ot, xa Tan Ndong, tinh Tay Ninh brei thau:

“Pathau khan brei ka mikva drei rami ramik, bah trah puh pataom mek hareik hareim ka nyu haci hacih. Dua tra brei pathau khan tuan hala dok taneh aia nagar, blaoh tamik bruk ngak piah tal harei palih ruah njauk daok pak sang piah nao palih ruah, taong abih manuac urang dalam sang umo ginup meng 18 thun tagok hu mbaok tame palih ruah”.

Bruk pathau khan brei thau ka harei palih ruah di dom puk palei dalam tinh Tay Ninh pambuak pagam haong rai diuk bhian harei di bhap bani gam song rilo jalan ngak yau pathau khan angaok loa papar sap, tuak khao tin di duk ngak bruk jabat palei, tacei pato bruk palih ruah angaok nyaom zalo di ap… mek hu rilo baoh jeng siam mekre tal mikva bangsa takik. Ong Nguyễn Văn Lực, urang ngak gah mat tran ap Tầm Phô, xa Tân Đông, tinh Tay Ninh brei thau:

“Tal tukvak ini bruk kuhria caga hu peih ngak salah blaoh 100%, hu uak ramik talei angan, breu thau ka talei angan urang palih ruah, bhap bani pachreih tui mbang palih ruah hu mai ini duah thau ka angan je dak rai di dom urang lambaok  saong hu paphat harak nao palih ruah ginup abih”.

Harei nyaom raya brei ka taneh aia nagar daok mai jaik tal. Tuk akaok saneng, hatai jia saong caong khin di bhap bani thei thei jeng caong tal harei palih ruah, urang palih ruah dom bangsa adei sa-ai dalam tinh Tay Ninh gam haong urang palih ruah dalam negar abih hatai hu mbaok tame nao palih ruah, grap tanat mbang palih ruah mek hu baoh jeng siam mekre glaong, bol bhap ngak po, thei jeng yau gauk, njauk adat hukum nagar./.