Tuk sang mac jhik An Khánh hu buh jien tame padang di palei Suối Đá, xa Lợi Hải, huyen Thuận Bắc hu brei bruk ngak ka labaih 300 urang di bhum palei. Piah buh pabak dom harak kakei blei dahlau meng tuk ini tal abih thun, gam saong jien mek tame labaih 3 trieu 600 ribau USD, po sang mac caong khin pilih ruah urang ngak bruk biak rilo. Ong Nguyễn Văn Sửu, Yam ndok Sang mac jhik An Khánh brei thau, sang mac di drei hu ba tabiak dom sarak piah pachreih daong saong dui manuac urang mai tame ngak bruk di sang mac: “Piah khik kajap ka gah jien mek tame meng 7 tal 8 trieu dong/ bilan ka sa urang ngak, sang mac khin peih praong saong jhul drah samar bruk pilih ruah urang ngak bruk meng 50 tal 100 urang. Tukvak jaik di ini, dom urang ngak bruk meng Sai Gon mai, piah paganap urang ngak bruk urak ini di An Khánh ye sarak ba tabiak piah pabak ka dom urang ngak bruk ye brei hu angan tame harak Daong caga Xa hoi, harak Daong caga BHYT, daong brei huak kreh pandiak ginup ka adei sa-ai. Daong hadiah alin jien tet , raya saong alin jien ngak tari taring piah ka adei sa-ai urang ngak hu rilo jien jang”.

Tui bruk ngak, tui dom taka pandap panda, urang ngak bruk di sang mac hu jien mek tame meng 6,5 tal 8 trieu dong sa bilan. Sa-ai Chamaléa Thị Nhớ, daok di xa Lợi Hải, huyen Thuận Bắc hu ngak bruk 2 thun di sang mac chreih chrai brei thau lac drei tame ngak bruk di sang mac hu jien mek tame hu karo yau nan ye mboh biak sahnang hatai piah ngak bruk: “Adei mboh jien bilan di adei meng 6,5 trieu tal 7 trieu. Adei mboh biak sahnang hatai. Meda adei daok ngak suai di ini. Adei mboh biak karo sahnang kayua nyu jaik sang, hu tukvak masa brei kuhria tal ka anek bik jeng ye sang danaok di drei”.

Ong Nguyễn Lê Ngọc Diệu,  Phaok Akaok UB Bhap bini xa Phước Hải, huyen Ninh Phước brei thau, bruk buh jien tame padang sang mac di dom bhum palei daok dalam jalan patagok di rilo gah ngak mbang pablei salih. Dalam nan, Kongti Co phan Angui cuk D’Sago hu 2 baoh sang mac di huyen Thuận Bắc saong Ninh Phước. Yaom lac hatai caong pilih ruah di dom gah ngak mbang pablei saih gah jhik menyim mada tok pilih dom urang ngak bruk bhian biasa min jien bilan jeng mboh chreih hatai.

“Hu bruk ngak di bhum palei khik kajap kein lagaih brei ka kinh te, jeng ye hu jaik sang danaok. Meng bruk brei bruk ngak ka dom urang di ini, jeng hu rik daong paglaong ka asal kadha brei bruk ngak, jeng yau asal kadha ka jien mek tame brei ka urang ngak bruk di bhum palei”.

Urak ini oh takik urang daok ngak bruk di dom tinh Dong Nai, Binh Duong jeng gilac mai palei ngak bruk. Rilo urrang ndom mayai lac, jien ngak mek tame mada takik jang, min tapi jeng patak pataom hu jien kayua oh bih lahik jien pah sang daok. Ngak bruk jaik sang danaok, urang daok hu tukvak piah iek glang anek bik di drei. Sa-ai Trần Thị Kim Thảo, palei Từ Tâm 1, xa Phước Hải, huyen Ninh Phước brei thau: “Adei mahit sang mac hu padang di bhum palei ye adei padeih ngak di Dong Nai mai ngak di ini, jaik amaik ame, anek bik drei pajeng nao bac saong raok mai sang jeng mbuan lagaih jang. Page nao, biar harei mai, malam adei hu tuvak piah pato anek bac magru. Adei mboh jien ngak mek tame jeng hu karo, ginup piah pandar ka sang danaok di drei”.

Urak ini, rilo urang ngak bruk di bhum palei dak harei dak mboh bhian randap haong bruk daok ngak dalam labik ngak kong. Page masup nao ngak, biar harei mai sang raok anek mai saong taong abih urang dalam baoh sang, oh daok bruk atah bayah saong gauk yau dahlau daih. Bruk dom gah ngak mbang pablei salih buh jien brei padang sang di bhum palei hu brei kein lagaih ka urang ngak bruk di bhum palei./.