Di sang ilamo bhap bini mbon Mduk, phuong Ea Kao, tinh Dak Lak, yaok pluh urang grauk thun umo caik mata tame phone, hu dom urang kapul ndoan dam dara – gam ngak bruk illamo lek taka bhap bini – kham merat tacei ba bruk tut angan tai khoan VneID. Hadei tuk mek trun blaoh, yaok urang ta-eng ngak, pabak khau tin meng dom harak gar di drei tapa ung dung. Amuk H’Mai Mlô, sa urang dalam mbon palei, brei thau:

“Dahlau daih oh ka hu dom kamuan tacei ba ye jeng biak duh hatai rilo, kayua drei oh thau hagait, bhian var. Urak ini jeng pabak khau tin paje. Oh ka randap, min daok bac madeit madeit rah rah.”

Dom var “bac lek taka” yau ini jeng bruk randap di rilo phuong, xa di Dak Lak, kuhria meng tuk tinh peih tabiak 100 harei tabung glaong ngak danak dak “Binh dan hoc vu lek taka” meng di kreh bilan Tijuh. Labaih 2.000 kapul ilamo kong nghe lek taka bhap bini hu padang, ngan haong labaih 3.500 urang jakar, urang ndoan, urang halan tian daong srap gap “tataoh bambang yaok baoh sang”, “pan tangin pato bruk”, daong rahra ngak randap haong ilamo kong nghe. Sa-ai Y Sion Knul, Bi thu Ndoan Dam dara xa Ea Na, tinh Đắk Lắk, brei thau:

“Pambuak tal bruk pagam tinh, mikva biak duh hatai tuk ngak harak gar karja, harak bi-ar. Khol dahlak hulin daong mikva dalam taong abih dom asal kadha, meng bruk buh harak gar tapa jitvu karja tal bruk pandar VneID di Mentri Kong an. Dalam nan lac ngan haong mikva bangsa takik, bruk ini hu ngak bhian, lagaih, piah patakik tukvak nao mai di mikva.”

Gam saong kapul urang halan tian ba rup buh prein ngak, rilo gah ngak mbang pablei salih vien thong praong jeng rik prein ka danak dak “Bac di bhap bini lek taka so”. Dom labik bac megru hu daong ndap nda, jalan ba, phan mem AI mbuan mbiah, mbuan pandar, daong rahra pasang duah saong ngak samar jang. Ong Nguyễn Văn Thản, Phaok Yam ndok VNPT Dak Lak, brei thau:

“Khol dahlak hulin hu pandar urang jakar hu mbaok tame kapul ilamo kong nghe lek taka di xa, phuong, palei, mbon, kapul dan pho. Gam haong karja palei, khol dahlak padang dom tal bac pasram ilamo lek taka ka urang jakar, urang pan bruk karja urang ngak bruk karja piah tacei ba veik ka rahra saong gah ngak mbang pablei salih. Jalan ngak lac piah grauk urang jeng meda hu pandar, thau saong pandar dom nen tang lek taka dalam raidiuk yaok harei.”

Ong Bùi Thanh Toàn, Yam ndok So Khoa hoc saong Kong nghe tinh Dak Lak, brei thau: 100 harei tabung glaong danak dak “Bac di bhap bini lek taka so” lac bruk camreip piah salih lek taka jeng bruk randap yaok harei di yaok urang. Tuk thau pasang duah, thau pandar, thau meyao meyit online, grauk sarak, karja meng hu noa tal mikva, piah oh thei njauk caik gilac gah likuk.

“Khol dahlak hulin hu neh rabha dom kapul urang saong peih ngak danak dak 100 harei tabung glaong. Jalan ngak lac srap gap ka rahra ilamo ka bruk slaih lek taka, oh lac di labik pasak bo daok pambak tal mikva bangsa bhum atah bayah. Tuk randap rah ra, rahra brei hu thau pandar dom bruk kadha lek taka duh bruk ngak mbang, pablei salih saong ngak jitvu, harak gar karja lagaih jang.”

Meng dom var “pan tangin pato bruk” tal pagun sanya di karja saong gah ngak mbang pablei salih, danak dak “Bac di bhap bini lek taka so” daok daong ilamo kong nghe oh daok lac bruk oh thau di yaok rahra. Saong hadei di yaok harei, di Dak Lak gilac hu veik rilo urang jeng rahra lek taka, ngak jeng sa xa hoi lek taka taong abih, siam mekre saong siam lagaih. Ini lac bruk hu makna piah bruk ngak jeng karja lek taka, xa hoi lek taka, kinh te lek taka so./.