Chi bộ palei Đăk Ga, xã biên giới Đăk Nhoong, huyện Đăk Glei, tỉnh Kon Tum hu 23 urang đảng saong taong abih jeng lac urang Gié- Triêng. Meng bruk daok jaik rahra, ba akaok nao dahlau di dom urang đảng, 112 sang saong jaik 360 menuac di palei Đăk Ga abih drei hu mbaok tame bruk khik caga jalan taphia negar, khik iek mốc giới taneh ia. Bruk anit ranam gauk, daong ba gauk patagok kinh tế sang di rahra dalam palei hu cakrok.

 Bí thư Chi bộ gam lac akaok palei A Cu brei thau, yaok thun, yaok urang đảng dalam chi bộ jeng hu sanya saong hu jalan ngak cambaih laih bruk bac megru saong ngak tui Wa Hồ. A Cu jeng yau dom urang đảng karei dalam chi bộ jeng mboh bruk bac megru saong ngak tui Wa lac bruk biak siam, biak jaik haong drei:“Harei harei drei bac megru saong ngak tui jalan hadah krah siam mekre di Wa lac bac ngak dom bruk gheih, bruk mekre. Bac tui Wa bruk kali kalih dalam cai pandar yaok harei. Blaoh bac mbang, bac ndom, bac menyai, jak ba mikva ngak mbang cakrok kinh tế sang yam tagok tabiak truh kan kathaot khang kajap”.       

Lac sa dalam dom urang đảng lac urang bangsa takik hu pok meyaom dalam Nyaom biai taong yaom bruk peih ngak Kết luận ka 01 di Mintri Chính trị ka patui bruk peih ngak Chỉ thị 05 di Mintri Chính trị  ka “jhul khang bruk bac megru saong ngak tui jalan hadah krah siam mekre di Hồ Chí Minh” thun 2023-2024 kayua Tỉnh uỷ Kon Tum peih ngak di tuk uan harei menek Wa Hồ di bilan 5 meng blaoh, Phó Bí thư Chi bộ gam lac akaok palei A Huế, bangsa Xơ Đăng, palei Kon Nhên, xã Đăk Ruồng, brei thau: “Bac megru saong ngak tui jalan hadah krah siam mekre di Hồ Chí Minh, dahlak hu jak ba mikva pdang ngak hu palei pala bahrau. Dahlak jak ba mikva daong prein, ngak mekre labik vil val sang rông, jak ba mikva xã hội hoá piah ngak pasiam veik jalan. Pala phun di jalan praong saong dom jalan palei. Meda lac urak ini bhap bini hu jalan sahneng siam jang dahlau”.

Meng bruk bac megru saong ngak tui Wa Hồ, 3 thun tapa, urang đảng di dom huyện, xã dalam tỉnh Kon Tum padang hu labaih 800 bruk daong gauk cakrok kinh tế, pasiam veik bein kayau, klaak dom adat cambat klak oh daok lagaih…Meng dom bruk ini, labaih 6.300 mbang sang urang bangsa takik kan kathaot saong labaih 3.300 mbang sang jaik kathaot hu daong pajaih, phun jien, ilamu kỹ thuật yam tagok dalam cakrok kinh tế. Ong Phạm Hải Châu, Phaok Bí thư Thường trực Huyện uỷ Ngọc Hồi brei thau, Đảng bộ huyện tuk halei jeng thau lac bruk bac megru saong ngak tui Wa lac bruk chính trị praong dang akaok:“Bruk ngak tui Wa hu daong paglaong akaok sahneng saong ngak jeng bruk sa hatung hatian haong gauk dalam abih Đảng bộ peih ngak bruk chính trị, KTXH, quốc phòng an ninh saong dak padang Đảng haong hệ thống chính trị. Pakhang hatai jia di bhap bini brei ka Đảng. Bruk bac megru saong ngak tui jalan hadah krah siam mekre di Hồ Chí Minh nao tame dalam hu mboh rilo bruk ngak, jalan ngak gheih siam hu mboh saong hu pambak praong”.

Pambak tabiak bruk bac megru saong ngak tui Wa Hồ, dom chi bộ cơ sở bhum bangsa takik di tỉnh Kon Tum hu dom rik daong praong dalam bruk peih ngak dom bruk cakrok di Đảng bộ tỉnh Kon Tum, yau ye: paglaong chất lượng padang ngak palei pala bahrau, patrun kathaot khang kajap; peih ngak hu siam bruk jak ba "Ngak brei salih karei jalan sahneng, jalan ngak di bhap bini bangsa takik, ngak ka bhap bini bangsa takik yam tagok tabiak truh kan kathaot khang kajap"...Patagok siam bruk ba kaok dalam bac megru saong ngak tui jalan hadah krah siam mekre di Hồ Chí Minh di urang đảng daok ngak jeng bruk dui pachreih, pambak tabiak praong dalam ka makna, yaom glaong di bruk bac megru saong ngak tui Wa di bhum bangsa takik dalam tỉnh Kon Tum./.