Thun bac 2025 - 2026, Ban raya Ho Chi Minh ba tame pandar 1.434 duk bilik bac, dalam nan hu 1.072 duk bac bahrau, pataom tame rilo abih di pakat sa (tiểu học) ngan haong 426 duk.

Dom duk bilik bac bahrau padang ngak di Sang bac Tieu hoc Đặng Thuỳ Trâm di phuong An Hoi Tay (dalam quận Gò Vấp klak) hu ba tame pandar, hu 1 tal pakat ala, 3 pakat tal angaok gam saong 19 duk bilik bac, sang ghing, sang ralo kadha bac nda nang saong dom duk bilik karei hu pabak brei dom janih pandap panda siam gheih di abih. Thun ini, sang bac raok 1.000 anek saih, klah rabha jeng 20 tal. Kayua hu rilo anek saih mai bac, yau nan ye sang bac daok mek pandar sa duk gilang kho piah ngak bilik bac. Amuk Lan khan brei thau:

“Bruk ba tame pandar baoh sang bac tieu hoc ini biak mbuan   laghaih ka anek kamuan saih bac daok di phuong An Hoi Tay. Dom adei hu nao bac jaik, oh daok nao bac atah, bac njim angaok phuong karei."

Oh lac sa janih lagaih brei ka bilik bac, gah pato megru ban raya daok ba tabiak jalan ngak pasak tame bruk paglaong baoh jeng siam mekre di bruk pato megru, abih di nyu di dom labik bahrau ba pataom gauk.

Di sang bac Anek anaih Mam non Huong Sen, phuong Tam Thang (dahlau diah daok dalam Ban.Vung Tau), sang bac hu pandar dom bruk pato megru laghaih haong vaktu masa bahrau. Amuk Nguyễn Thị Thu Thuỷ, Akaok sang bac brei thau, sang bac meda caik hatai tal bruk panduan salih taka, pandar ilamu bahrau saong AI tame dalam kadha pato magru:

"Ba pataom tame Ban raya Ho Chi Minh, sang bac meda ba dom bruk pato bac dak harei dak mek hu baoh jeng siam mekre jang. Sang bac daok caik ka dom anai gru bac ta-eng piah mong iek kadha taduan raok dahlau di dom anai gru tal halei. Kayua lac gru pato ye njauk salih bahrau gam gam ka jalan pato, sa kadha langyah ba pato miat ye ngak ka uranaih nyu alah bac, kayua yau nan ye gru pato njauk pandar rilo jalan pato bac, meda lac salih bahrau tapa bruk ma-in nan ka meng ngak ka ranaih nyu chreih bac. Sang bac jeng bhian tui iek bruk salih bahrau, saneng duah ba tabiak kadha bahrau di gru pato hu nao samu haong bruk cak rok patagok bahrau."

Jeng dreh yau nan, sang bac Tieu hoc Trưng Vương, phuong Tam Thắng, dalam thun bac 2025-2026 meda daok patui ngak bruk caik hatai paglaong baoh jeng siam mekre dalam bruk pato sap Angrik, dak padang sang bac haniem phol saong ngak brei ka anek saih hu jeng bhap bani lek tak so.

Akaok sang bac Nguyễn Thị Phượng, brei thau sang bac hu peih ngak dom bruk ngak bahrau nan lac “bhap bani taka” saong pato megru STEM. Ini lac danak dak hu pato magru brei ka anek saih ilamu pambuak pagam tal khoa hoc, kong nghe saong ilamu tatih tui jalan taom gaok rilo gah, daong ka dom adei langyah hu dom kadha dalam rai diuk yaok harei:

"Hadei di ba pataom, sang bac oh gaok rilo kan kandah dalam bruk ngak di drei, kayua lac sang bac peih ngak tui danak bruk, tukvak peih ngak saong ilamu. Khaol dahlak jeng pato pataom rilo ilamu, pato ilamo puk palei saong patagok pato sap Angrik piah nyu jeng sap ndom akhar vak ka 2 tui tukvak masa ba tabiak. Abih di nyu, khaol dahlak hu bruk pachreih tui meng urang ngak amaik ngak ame nan ye bruk pato sap Anh saong dom ilamu karei sang bac gam cak rok patagok gam ba drei yam tame."

Dahlau di nan, ong Nguyễn Văn Hiếu, urang dang akaok So Pato megru Ban raya Ho Chi Minh jeng caik hatai, dom puk palei hadei di ba pataom njauk caik hatai tal dom asal kadha yau pato bac 2 vaktu harei, samar drah peih pato tui jalan AI, saong mek panuac rik daong ka bruk oh brei pandar phone dalam sang bac.

Ini jeng lac thun akaok camereip peih ngak tui adat hukum bahrau di Mentri Pato Megru ka bruk pato bac 2 waktu dalam sa harei. Kayua yau nan ye, dom sang bac njauk dak padang danak bruk ka nyu laghaih, pabak taong abih hatai caong khin di anek saih, plaih caga ngak jeng kadha triak damak saong glaih glar katang glao akaok urang bac magru./.