Ban raya Ho Chi Minh caga caik meng anak brei oh mek jien ndik tagok radaih buyt angaok 135 jalan radaih buyt nduac dalam banraya, dalam nan hu dom jalan brei daong yaom jien saong jalan oh daong yaom jien jalan nao tinh Binh Duong saong Ba Ria – Vung Tau klak, gam taong abih jien di nyu labaih 930 ty ndong brei ka 8 bilan mbiah tal abih thun 2026.

Ndom meyai biai nao mai saong urang phong vien, ong Bùi Hòa An, Phaok yam ndok So Padang Ban raya Ho Chi Minh caong takre khin sarak karja brei oh mek jien harak ndik tagok buyt brei ka taong abih rahra bhap bini brei drah tame pandar, daong ka bruk nao mai di bhap bini rahra dalam tuk jien ndo cai pandar dak tuk dak catang.

“Jalan kuhria di sarak nagar ini brei rik daong khik kajap karo bruk daok dang mbang ngui, patakik jien pandar harei harei paok jien ndo mikwa rahra buh tabiak biak rilo dalam taong abih jien buh tabiak di rahra bhap bini brei ka bac megru, daok dang mbang angui harei harei saong brei ka bruk ngak. Gam haong di nan, meyah bruk ngak ini hu rahra bhap bini njauk hatai sokong ba hatai daong tame, sarak karja mada daong patakik chruh radaih ta-eng di jalan, patakik gar katiar jalan saong tathuak bau tachauk nerak, ngak jeng bruk bhian randap pandar jalan mbak di bhap bini rahra”.

Sang danaok daok atah di sang bac jaik 20km, yaok harei adei nao meng dua mbang radaih buyt, saih bac sinh vien angan Nguyễn Hoa Trà My brei thau, yaom lac jien nao mai abih barau 12.000 ndong/harei. Min tapi bruk oh mek jien brei ka harak jien ndik tagok radaih buyt brei daong adei patakik jien pandar harei harei.

“Bruk nao mai meng radaih buyt daong lagaih, patak pataom jien ndo brei ka adei biak ralo. Min, meng akaok meti adei sahaneng sarak oh mek jien ini pandar ka dom urang yau ye uranaih atau urang praong thun, oh lagaih tal drei nan oh ka hu je hatai rilo. Dalam tuk urak ini, tuk yaom menyek sang daok tagok, meyah hu oh mek jien ye lac bruk daong biak njauk lagaih anak mata.”

Oh lac ja sanih daong paatakik jien buh tabiak, radaih buyt daok ba mai bruk lagaih brei ka rilo tuai damuai, mbuan pambuak tal dom labik nao tal, meda hu padeih padei dalam tuk nao mai. Min tapi, biak nao hu mboh bruk pandar radaih buyt jeng daok rilo kan kandah. Di rilo labik dang cang, hatang oh ka pasamu, kurang pabung pacang pandiak hajan, gaok mai jeng labik pataom klak harei harom. Sinh vien Lê Đặng Hoàng Phúc ndom lac bruk ini, cuang oh takik tal bruk tagok trun radaih buyt di urang.

“Oh hu pabung pacang di balai dang cang ndik radaih biak oh lagaih. Rilo tuk dahlak nao bac di kreh pandiak, labaih 11–12 giờ, dang cang radaih di ala langik pandiak ye biak nao oh truh. Langik di ban raya Ho Chi Minh urak ini mada hu tuk tagok tal 36–38 do, yau nan ye bruk dang di langiu langik biak kan kandah. Langiu di nan, bruk pataom hareik harom di dom balai dang cang jeng mboh cuang oh takik kayua rahra daok cang biak suai, ngak kanjah jhak brei ka bruk ndik trun radaih buyt.”

Di janih karei, tui sa-ai Phạm Khắc Hiếu, urang ngak bruk di jabat ndom mayai lac jalan ngak oh mek jien ndik radaih buyt di Ban raya Ho Chi Minh ieu lac sa bruk naih gheih dalam kham merat pachreih rahra pandar jalan mbak dalam bhap bini rahra, daong patrun bruk gar katiar jalan nao mai saong njom nerak tachauk alam langik. Blaoh biak nao brei mboh kadha ka jien buh tabiak oh lac bruk kan kandah glaong abih ngak ka rahra daok kanda haong radaih buyt.

"Sa-ai Pham Khac Hieu brei thau “Tui dahlak, bruk rahra kanda nao radaih mbuyt hu makna asar kadha di nyi lac di asar siam jitvu, tukvak nao mai, bruk njauk tukvak saong tanut lagaih dalam luac jalan pandar. Urak ini, radaih buyt dalam ban jeng daok kan kandah meng bruk gar jalan saong oh ka hu rilo jalan brei ka radaih buyt, ngak ka tukvak masa nao mai daok dui atah. Meyah dom asal kadha ini oh hu pasiam, bruk oh mek jien radaih buyt jeng bruk kan jeng bruk palih ruah dui pachreih rilo rahra.”

Sarak karja oh mek jien tagok radaih buyt hu caong takre ngak jeng sa bruk cakrok akaok meti, dui pachreih rahra hu mbaok tame jalan mbak dalam negar. Min, piah khik takai rahra pandar radaih di bhap bini. Min piah khik takai tagok trun radaih buyt suai atah, oh lac pambak gam tame jien buh tabiak, blaoh daok dalam bruk rahra hu mboh radaih buyt bhap bini hu ginup kein lagaih piah ruah tagok trun ha oh.