Di sang bac Tieu hoc Tân Đức, xa Phước Hữu, labik hu tal 570/572 anek saih urang bangsa Cam, bruk bac sap bangsa tuk halei jeng hu sang bac caik hatai pambuak patui pachreih. Sa adit bac du tiet bac, yaom oh ralo min tapi nyu ganap brei ka dom adei gauk dak yam ngak krein saong sap ndom panuac mayai akhar huruh bangsa drei. Meng dom taneng akhar huruh kak khak di aloh, tal dom baoh dalam kadha bac, panuac cih, yaok dom baoh anek akhar huruh hu dom adei daok mbeik, daok cih bingula angaok hala baar bac. Dom tukwak masa nan oh sa janih daong brei ka dom adei thau bac ja, tahu cih wak blaoh daok ngak ka sap ndom panuac mayai di mukkei dak jaik taphia, anit ranam. Adei Trương Thảo Nhiên – anek saih bac tal 5B sang bac tieu hoc Tân Đức, xa Phước Hữu khan brei thau lac:

"Adei mboh biak chreih tekre bac akhar Cam...."

Piah ka kadah bac tamuh ralo dom chreih chrai, gru pato jeng salih barau cara kadha pato magru, brei pandar komputer tame dalam tiet bac. Gam ieik binguk, gam pang biak chreih brei dong ka tal bac bui sambai jang, pamadeih hatai chreih chrai di dalam hatai anek saih bac magru akhar Cam. Meng di nan, yaok tuk yaok jam bac magru oh lac sa janih ba tame akaok dom ilamu, blaoh nyu daok pabak dom baoh hatai anit ranam khik caga sap ndom panuac mayai akhar huruh urang bangsa Cam. Nai gru Hán Thị Kim Anh – Sang bac tieu hoc Tân Đức, xa Phước Hữu brei thau lac:

"Dahlak tuk halei jeng kham merat salih bahrau bruk pato...."

Oh padeih di dom jam tuk bac sap Cam di tal bac, Sang bac Tieu học Tân Đức, xa Phước Hữu daok dang padang dom mbang bac magru di langiu, bac tui kalup jeng ye bac ilamu piah ka anek saih mayit mayau bac magru nao mai song gauk jeng ye brei pachreih hatai anit ranam ilamu sap ndom akhar huruh bangsa drei. Mai meng bruk ngak di gah sang bac, gam song hatai ngak tui di urang ngak amaik ame jeng ye bhap bini urang bangsa Cam, nyu daok daong prein praong brei ka bruk khik ramik jeng patambak yaom kaom ilamu sap ndom akhar huruh bangsa Cam. Nai Bá Thị Huyền- Akaok sang bac tieu hoc Tân Đức, xa Phước Hữu ndom lac:

"Taphia bruk paglaong ilamo pato megru di tal bac..."

Sang bac Tieu hoc Chất Thường, xa Phước Hậu – sa labik hu ralo anek saih urang bangsa Cam, tapak meng tal 1, yaok sa adit hu dua tiết bac, dom adei anek saih hu brei ngak krein akhar huruh dan song sap bangsa Cham di drei. Min tapi, tui nai gru Đàng Thị Thúy Vân- gru pato sap Chăm dalam sang bac, barau hu dua tiết dalam adit, masa tukwak brei ka bac magru sap Cham mboh biak tukik:

"Dalam luac jalan pato megru...."

Khik ramik sap ndom mayai dan song huruh akhar ieu lac caga khik jiwa ilamu di sa bangsa. Meng dom tal bac pakat sa dalam palei bhum anek urang bangsa Cam daok di Khanh Hoa, dom ine akhar bangsa jeng daok brei jao ka anek taco rairah piah sap bangsa Cam oh sa janih daik di dalam hatai akaok blaoh nyu daok jeng sap ndom mayai akhar huruh bangsa harei harei mbiah tal jaman hadei miat miat./.