Vinh Long urak ini hu labaih 353.000 urang bangsa Khmer, hu labaih 10% rahra dalam tinh. Meng rilo thun tapa, mikva hu mbang tui rilo sarak lagaih, meng sang daok, taneh ngak sang daok, jalan mbak palei pala tal bruk pato megru, y te, ilamo, ba mai dom bruk salih naih gheih dalam yaok baoh sang, yaok bhap bini.

Xa Hàm Giang ieu lac sa labik di dalam dom labik naih gheih. Di ini, jaik 90% urang bangsa Khmer, lac bhum taneh gaok rilo kan kandah kayua njom ia mbak, jalan mbak kan kandah. Min tuk sang danaok hatang palei pala hu buh jien tame tani tanat, tuk dom danak dak daong ilamo ky thuat saong phun jien brei mesraiy hu peih ngak tani tanat, raidiuk di rahra hu salih mboh cambaih laih.

Di thun 2025, xa Hàm Giang hu 113 baoh sang mbang tui dom danak dak, sarak karja bangsa: 3 baoh sang hu daong taneh daok, 56 baoh sang hu daong sang daok, 26 baoh sang hu brei mesraiy phun jien patagok bruk ngak mbang, 28 baoh sang hu daong ia hacih pandar. Phaok akaok UB Bhap bini xa Nguyễn Quốc Thanh maong mboh cambaih laih bruk salih siam mekre ini saong brei thau bhum palei brei patui bruk gam daong mikva:

 "Tapa dom sarak daong di Ndang, Karja, blaoh bruk daong di bhum palei saong bruk kham merat uak drei tagok ta-eng di drei, ye mboh raidiuk kinh te mikva hu paglaong mboh cambaih laih.”

Atah di Hàm Giang oh dom, xa Cầu Kè, labik hu rilo urang bangsa Khmer labaih 62,2% rahra, jeng brei mboh dom bruk cakrok samar. Jien mek tame kuhria rah tapa tui yaok urang hu labaih 85 trieu ndong yaok thun. Dalam xa hu abih 19/19 palei mek hu angan ilamo palei pala bahrau, dalam nan 5 palei mek hu tanut palei pala brei iek kieu mau. Oh daok sang taik tahak; jaik 81% baoh sang rahra pandar ia jamraik ngak hacih saat. Ong Thạch Thon, urang jakar padeih bruk karja, urang hu angan je dalam bhap bini bangsa Khmer daok di xa Cầu Kè, chreih chrai sambai khan brei thau lac: urak ini dom puk jeng hu jalan betong lagaih; bruk peih radaih nduac, pajeng ba kaya ndap nda jeng biak lagaih, kaya nong di mikva ngak tabiak hu yaom glaong jang.

Dom naih gheih di bhum palei dalam tinh brei mboh ka siam lagaih di sa baoh majam sarak karja hu peih ngak samu gaok saong ngak luac bhian. Meng Danak dak jalan ngak pakat negar patagok kinh te – xa hoi bhum urang bangsa takik saong bhum ceik tukvak 2021–2025, Danak dak 135, Sarak angka 120 di Rajaei saong patagok karo kajap Bhum taneran kraong Cuu Long, tal dom sarak daong taneh daok, taneh ngak mbang, ia pandar, sang daok, mesraiy jien laba lap, pato pakai bruk ngak, palih ruah nao bac ka anek kamuan urang bangsa Khmer – taong abih ngak jeng prein patagok khang ka bhum taneh ini.

Di thun 2025, Vinh Long peih bruk daong sang daok ka 92 baoh sang, salah blaoh padang sang bahrau ka 71 danak dak, pasiam saong pakajap 2 baoh sang bac pho thong gam daok gam bac. Baoh sang urang Khmer kathaot hu patrun daok 1,6%. Yam ndok So Bangsa saong Agama tinh Vinh Long, amuk Thạch Thị Thu Hà, ndom meyai lac:

Băng: Thạch Thị Thu Hà

"Tukvak 2026-2030, hu makna lac bruk buh jien tame ka co so ha tang, langyah taneh daok, sang daok; gam haong di nan lac pambuak haong dom so, dom gah, pasang duah taong abih dom sarak pambuak tal mikva urang bangsa takik, piah sua tangi ndom meyai nyaom biai UB Bhap bini tinh ba tagok ka HĐ Bhap bini ba tabiak sarak lagaih ka urang bangsa takik patagok kinh te baoh sang, jeng yau patagok bruk ngak mbang kinh te di tinh.”

Dom phum soc meng kal dahlau daok kathaot rambah, bhum taneh di mikva bangsa Khmer di Vinh Long harei ini daok uak drei patagok khang. Co so ha tang sang danaok jalan mbak dak padang hu samu gauk, raidiuk oh padeih tagok glaong, mikva dak harei dak ta-eng ngak tui hukum saong chreih chrai rik prein padang bhum palei. Bruk salih taong abih nan lac bruk brei mboh siam mekre ka jalan ngak njauk lagaih di Ndang saong Karja saong lac bruk daong prein piah bhap bini Khmer Vinh Long patui veik yam angaok luac jalan patagok samar saong karo kajap./.