Caga brei ka Thun Jirah rivang pakat negar 2026, gah jirah rivang tinh Khanh Hoa pataom tame ngak bahrau kaya ngui ndap nda, peih praong labik rivang me-in jirah. Langiu di dom labik mai rivang jirah bhian randap di nha trang, Cam Ranh, rilo ndap nda, labik bahrau di labik gah meraong tinh Khanh Hoa daok hu ba tame pandar, ngak jeng bruk palih ruah bahrau ka tuai damuai jirah dalam harei padeih padei harei raya. Tuai damuai mai Khanh hoa oh lac ba drei tame bhum pandiak kanyik, tasik hijao blaoh daok hu kein lagaih ba drei tame ilamo bangsa Cam siam gheih, rivang me-in di dom labik yau ye Bình Tiên, Vĩnh Hy, mbuon cuah Nam Cương, bimong Po Klaong Garai. Bruk peih praong labik jirah rivang hu caong takre brei daong dui atah tukvak daok kandaok, tagok jien buh tabiak di tuai damuai. Ong Nguyễn Văn Hòa, Yam ndok So Ilamo, pahat padhih saong Jirah rivang tinh Khanh hoa brei thau:

“Hadei di pagam 2 tinh Khanh Hoa saong Ninh Thuan, dahlau diah rilo di nyu di Khanh Hoa urak ini hu dom labik mai tal di gah Meraong tinh biak gheih karei, dui pachreih biak rilo tuai damuai jirah”.

Dang di gah pasang iek bruk ngak jirah, ong Hà Văn Siêu, Phaok akaok Kuk Jirah rivang pakat Negar Viet Nam, ndom mayai lac Khanh Hoa daok pataom ginup kein lagaih jeng gah cakrok patagok jirah rivang di dalam negar saong uak drei tagok jeng labik mai jirah rivang dang akaok bhum Asia Tenggara. Min, piah palagaih jalan bruk ngak ini, tinh Khanh Hoa brei patui ngak bruk brei mboh labik dang di thaik thaot labik jirah rivang di harak jirah rivang njauk tanut pakat dunya. Tui ong Hà Văn Siêu, anak meta Khanh Hoa brei pataom tame salah blaoh bruk dak ramik saong sang danaok kaya ngui jirah rivang bahrau, hu makna lac paglaong pakat mblang kapal ahaok par pakat dunya Cam ranh, buh jien tame majam lamnge tasik, tapen gilai jirah rivang saong jalan mbak pambuak samu gauk. Gam haong di nan, patagok ndap nda kaya kan jirah rivang pambak tame kein lagaih dom vịnh danao pulau hu makna, tui jalan pambuak, daong pabak, plaih dreih gauk; ngak jeng bruk jirah rivang rilo tui bilan, tui harei, malam piah patakik bruk di bilan bruk ngak mbang:

“Kuk Jirah rivang pakat Negar Viet Nam brei daong pagam haong Khanh Hoa dalam bruk padang, brei mboh ka angan je jirah rivang, ba Khanh hoa hu mboh cambaih laih di angaok harak ban ndo jirah rivang dunya, jeng pasak jirah rivang pdeih padei tasik pakat dunya”.

Phaok Akaok bhian hu mbaok UB bhap bini tinh Khanh Hoa Nguyễn Long Biên brei mboh lac jirah rivang – jitvu ieu lac sa di dalam dom pak bruk daong prein patagok ngak mbang blei salih di tinh, tui dom Sarak 09 di Mentri Chinh tri saong Sarak 01 Tinh uy Khanh Hoa, pamaong tal jalan patagok dua lek taka dalam tukvak mai meng anak daok tal.

“Pandar dom kein lagaih piah jhul tagok bruk pasiam, dui pachreih dom danak dak jirah rivang praong glaong; patagok ndap nda jirah rivang gheih karei; paglaong sang danaok labik daok dang mbang ma-in, jitvu siam glaong; jhul samar tukvak ngak dom danak dak jirah rivang hu makna; patagok kinh te malam, majam chuoi jitvu kaya mbang, blei salih, me-in maeic piah patagok prein dui pachreih tuai damuai jirah; daong taoh talaih dom kan kandah ka urang pandar jitvu jirah rivang”.

Gah Jirah rivang Khanh Hoa hu brei thau mada patagok siam di dalam thun 2026, kham merat mek hu labaih 77.000 ty dong, taong abih mbang tuai damuai labaih 18 trieu mbang tuai damuai jirah mai, dalam nan tuai damuai dunya labaih 6 trieu mbang manuac urang. Tukvak 2025–2030 hu tính bản lề, brei ka Khanh Hoa brei caik jirah rivang di labik pasak dalam jalan patagok. Tuk hu peih ngak tani tanat, hijao saong karo kajap, jitah rivang brei prein pambak praong, jhul tagok dom bruk karei yau ngak kong, logistics, ban medin tasik saong bruk ngak mbang kinh te tasik gam haong gauk patagok./.