Rah tui jalan ribaong Xáng Cùng (puk Thanh Tùng, xa Biển Bạch) atah 3km, taong abih baoh sang rahra daok kurang ia pandar. Dahlau di raya tet Nguyen dan, gah diah ribaong, daok dalam tinh An giang bahrau ba tame pandar sang jamraik ia hacih sa-at. Mikva gah nan hu ia taba pandar, daok gah ini rahra brei nao blei yaok jeik ia biak chiat jien, hatai menuac kan si mboh sahnang.               

Bau tal bruk kurang ia, amuk Lê Thị Đủ - rahra urang daok di bhum palei suak yava, kayua tuk jlan nding ia hacih hu katung tapa sang amuk nao aval drah nao blei đồng hồ mai pagam tuk nan, yau nan min labaih 1 thun paje mbaok đồng hồ jeng daok di angka zero 0. Bruk nan, brei mboh ka bruk njauk: hu jalan nding min ia hacih oh ka mai.

Anek kamei amuk Đủ ngak metau gah diah ribaong khan brei thau lac: “yaok khoi ia 6 ribau dong”, daok amuk daok brei yaok jeik ia 700 lit hu yaom 60.000 dong. Amuk Đủ daok pagap lac, baoh sang jeng hu kuhria sahneng, katung ia pagan ribaong mai pandar min langiu di palai lahik jien ye daok mbuan gaok kan kandah, gilai nduac pagam ngak pacah nding braong ia"

Mboh duh hatai, nyaom biai mbang halei mikva jeng payua panuac ndom ka ia pandar, urak ini hu ia lac uan lo. Balai ia gah diah di tinh An Giang, drei khin tame đồng hồ ye nap tapa kraong, blaoh katung nding tapa gah ini jeng lahik abih 3 trieu ndong. Min nyu meda oh kajap, nao tapa kraong nan oh ka khin katung mai pandar. Urak ini ye ngak tal halei thau tal nan min, karja urak ini bo brei ka rahra hu ia ye dahlak mboh biak sahnang hatai.

Ong Lê Văn Tuấn, daok di sa jalan jeng mboh “drei oh lagaih yau urang gah diah”: "Gah diah hu ia blaoh gah ini oh hu ia, dahlak mboh gah diah lagaih jang. Mikva di ini thei jeng caong khin samar drah hu ia piah rahra drei pandar. Bhum ini ia mbak, kan si hu ia nan thei jeng caong khin."

Bhum taneh xa Biển Bạch oh lagaih, hu rilo taneh njom lakhun, njom ia mbak trak. Dom bingun ia hu rahra paghuah dalam tal 100m jeng oh meda hu ia taba. Tuk bilan hajan nao tapa, dom jeik ia hajan kurang jang jeng lac tuk mikva laik tame bruk “mahu” ia, brei nao blei ia di dom gaiy gilai haong yaom glaong blaoh oh njauk tuk halei jeng hu.

Ong Lê Thành Văn, Akaok puk Thanh Tùng brei thau, bruk nan hu dui atah meng dahlau mai. Hu dom baoh sang rahra hu dom rairah brei daok dalam bruk yau nan nan dak harei dak caong hu ia hacih mai puk palei. Dalam puk Thanh Tùng urak ini hu jaik 200 baoh sang kurang ia, dalam nan, labaih 100 baoh sang rahra hu ia hacih mai min oh pabak dil samu nan brei caga tukvak mek padang ia dalam melam sup. Daok labaih 40 baoh sang di angaok jalan ribaong Xáng Cùng oh ka hu ia hacih. Anak hatai caong lagaih di mikva, ong Văn brei panuac ndom lac:

"Daok bruk piah hu ia, meyah Pasak ia hacih dua gah pambuak hu ye pagam sa đồng hồ taong abih katung meng gah diah mai, blaoh pambuak haong majam nding hu dahlau gah ini piah pabak ia ka mikva pandar, bruk nan ieu lac samar di abih".

Tui ong Nguyễn Thanh Hải, Akaok UB Bhap bini xa Biển Bạch, hu bruk sangka di dom pakat dom gah, bruk baoh sang rahra kurang ia di bhum taneh tapa dom thun. Min, urak ini jeng daok dom urang kurang ia. Tui bruk ngak di bhum palei, biak caong khin hu pakat angaok patui veik sangka, taoh talaih kan kandah:

"Labik puk bhum palei Thanh Tùng saong puk palei 18 hu dom pluh baoh sang rahra kan kandah, kayua oh ka hu ia. So Ngak nong, Pasak ia jeng daok patui veik duah jalan pabak ia tal rahra. Rahra di dom labik kurang ia biak caong khin hu ia, khol dahlak jeng likau pakat angaok patui veik sangka, buh jien tame piah pabak caong khin di rahra".

Jeik ia thu ia saong mbaok patuk jam ia jeng miat miat padeih di angka 0 daok lac bruk suhsah di dom rahra kurang ia xa Biển Bạch. Di bhum taneh njom lakhun njom ia mbak catang, bruk mahu ia tapa rilo rairah jeng lac ia taba njauk hu./.