Di adit peih pakak Thun Jirah rivang pakat Negar 2026 rah tabiak di puac bilan 3 meng blaoh, tinh Gia Lai salam raok yaok pluh ribau tuai damuai jirah dalam saong langiu negar mai tal rivang saong ba drei tame ma-in jirah. Labik rivang me-in saong harai raya ndung bak sambo bar gam song majam danak dak rilo ngan haong dom danak dak me-in pakat negar, tal dom bruk adaoh tamia seni nghe thuat saong raya phling ragam chreih sambai. Dom bruk ini caik veik rilo chreih takre siam gheih ka tuai damuai, daong ba Gia Lai jeng labik mai tal naih gheih di Thun Jirah rivang pakat Negar. Sa urang dara angan Lê Thanh Phương Hạ, tuai damuai jirah mai meng ban tasik Nha Trang, tinh Khanh Hoa brei thau:

“Adei daok di ban Nha Trang mai, adei mboh bhum Kreh negar drei meng dahlau mai hu sa concert praong yau ini, nan adei brei nao ka hu. Adei nduac radaih moto meng Nha Trang mai tal ini lahik 4 tuk meteh, min biak mboh chreih saong bui sambai tuk mai tal Gia Lai.”

Di jalan jirah rivang Viet Nam, ong Roman, Tuai damuai mai meng Lien bang Nga, ba drei tame bruk chreih chrai di Adit peih pakak Thun Jirah rivang pakat Negar 2026 di Gia Lai. Dalam labik hu tasik – ceik glai ndung bak ilamo dom bangsa takik di labik ini, ong Roman brei thau, mbang nao ini hu caik veik dalam ong gam haong kapul tuai damuai Nga dom chreih takre biak karei:

 Nội dung băng tiếng Anh: “Dahlak hulin hu mai rilo labik di Viet Nam yau ye ban Da Nang, ban Nha Trang, min di nan biak rilo urang menuac. Mbang ini mai Gia Lai, dahlak mboh labik di ini biak gheih, sron mbon saong yau ye glai langik daok tamo. ABih di nyu njauk ndom mayai nan lac, mai njauk harei Thun Jirah rivang pakat negar ngak ka mbang mai ini hu angan makna jang.”

Patui bruk meng harei peih pakak, di dalam quy II/2026, tinh Gia Lai daok patui jhul tagok bruk yaih khan dom harei nyaom darak pasar praong di Ha Noi saong Ban raya Ho Chi Minh. Gam haong nan, Gia Lai jeng peih rilo danak dak ngak bruk naih gheih takre ka Thun Jirah rivang pakat negar thun 2026, njauk caik hatai lac hu Phling ragam pakat dunya (K-Pop), ngak jeng bruk chreih takre bahrau. Gam haong nan, Festival dunya ka kong caing Tay Nguyen lac danak dak naih gheih, ndung bak ilamo ceik glai.

Tinh Gia Lai ba tabiak jalan tui akaok mbram piah brei taduon raok labaih 15 trieu mbang tuai damuai, ngan haong jien mek tame meng jirah rivang labaih 35.000 ty dong dalam Thun jirah rivang pakat negar 2026. Ini lac kein lagaih piah ka Gia Lai padang veik thaik thaot jirah rivang, jhul tagok pambuak bruk saong patagok tui jalan karo kajap. Ong Phạm Anh Tuấn, Akaok UB Bhap bini tinh Gia Lai brei mboh hatai kham merat di bhum palei:

Băng: “Tinh Gia Lai sanya hapah brei peih jak jeng Thun Jirah rivang pakat Negar 2026 ngan haong hatai ngak ka tasak, salamat, siam mekre, ndung bak ilamo piah ka yaok tuai damuai mai tal jeng mboh hu bruk abih hatai tian, karei saong njauk hadar. Khol dahlak je lac meng danak dak harei ini, Gia Lai bahrau brei uak drei tagok jeng labik mai dui pachreih, labik pataom, pambuak, pambak praong dom yaom kaom ilamo saong jirah rivang gheih karei di Viet Nam saong labik.”

Thun Jirah rivang pakat Negar 2026 di tinh Gia Lai hu peih luac jalan danak dak gam saong majam danak dak chreih chrai dui atah luac thun. Meng dom danak dak ndung bak ilamo cek glai tal dom danak dak phling ragu ragam, jirah rivang bahrau njauk tanut pakat dunya. Gam saong bruk ba drei tame di karja, gah ngak mbang pablei salih saong bhap bini, Gia Lai caong takre ngak jeng bruk lagaih dalam bruk dui pachreih tuai damuai jirah rivang, gam haong di nan, ngak jeng bruk piah jeng gah kinh te hu makna, daong ba bhum taneh pataom ceik glai – tasik jeng labik jirah rivang dui pachreih di dalam harak jirah rivang Viet Nam saong dunya./.