Dalam kadha Pahadar 80 thun Harei Kakmang bilan 8 saong Harei bangsa negar 2/9 thun ini, da-a mikva saong abih gauk pang kadha di urang ngak bruk di VOV angan Ngọc Tươi.

Brei di dom palei srok hu urang bangsa Khmer daok di jaman ini, grauk jalan, meng palei tal dil ban raya, hala dok phon marah patuk kanyik par par kreih pandiak langik. Dom baoh baha Khmer gheih ghang, bui sambai mblan bak palei nagar. Dalam hatai di ralo urang, harei 2 bingun bilan 9 tuk halei jeng yau harei rija praong ndam gam saong hatai sambai bui chreih chrai di bangsa. Ong Kim Hồng Danh, dahlau ngak Phaok akaok Ban Bangsa tinh Tra Vinh, urak ini padeih padei bruk karja su-uh su uan drut druai brei thau lac:  “Bangsa Khmer khol dahlak tuk halei jeng iek harei 2 bingun bilan 9 ieu lac harei jayah praong, ba mai bebat ta-eng drei dan saong haniem phol brei ka taong abih bangsa. Dahlau diah raidiuk urang bangsa Khmer daok ralo kan daman, kurang rambah. Harei ini, raidiuk di mikva bangsa salih bahrau mboh cambaic, dak harei dak trei sil bak ganap ilamo. Bangsa urang Khmer tuk halei jeng mboh dak mbaok brei ka harei Negar 2 bilan 9, tuk halei jeng hadar dhar phol di Ndang dan saong Karja jeng ye jie hatai di jaman dam dara oh padeih bac magru, ngak bruk daong padang taneh ia palei nagar dak harei dak kaya mada dah krah siam makre.”

80 thun oh ka atah dut tui sejarah dakrai dut tui yaok ribau thun padang taneh ia nagar, min nyu lac nyu ndam gam biak ralo baoh siam makre dah hadai. Bangsa Khmer Mraong nagar Nam Bo tuk halei jeng nao tui gam gam saong jalan bruk hik katmang jeng ye harei ini tame dalam bui sambai saong nagar. Pambuak tui ilamo bangsa nan, dam dara Khmer ba tame darah dalam rup hatai jie, bruk ngak padang bhum palei dak harei dak tagok. Adei angan Thạch Minh Sáng daok di phuong Tra Vinh, tinh Vinh Long ieu lac sa Youtuber daok sit: Jaman dam dara khol hulin dahlak praong tagok jaman hadei di tanek ia sron mbon salamat, hu bac magru, hu bac ilamu khoa hoc – kong nghe jeng ye dang mboh anak mata taneh ia uak drei tagok khang. Khol adei tuk halei jeng jie tui kadha pan akaok di Ndang, jalan di Wa Ho saong bhap bini rahra pilih ruak.

“Lac sa urang daok dam, adei caong pambak ilamo Khmer jeng ye daong padang bhum palei jaman bahrau bak dom ilamo bangsa. Yaom mada hu nao halei atah, bhum palei jeng ieu lac hatai jie bui sambai praong di abih. Dam dara Khmer yau ye adei, mada hu tui ngak hagait drei jeng ba tui tame rup hatai ranam bhum palei, ba abih hatai jai padang palei brei patagok, barau min jeng khik hu ilamo bangsa.”

Khik caga ilamo bangsa, kuhria brei ka bac magru - pato pakei dam dara ieu lac sa bruk njauk caik hatai di bhum Khmer Nam Bo. Luk gru Kim Sô Phiếp, daok ngak bruk di sang bac Tieu hoc Thạnh Hoà Sơn, xa Ngũ Lạc, tinh Vinh Long brei thau lac: “Tuk pato bac brei anek saih Khmer, dahlak bhian khan dalikal ka dom adei pang tal cera dalikal siam makre di bangsa, brei ka harei 2 bilan 9– harei praong glaong di bangsa. Dom adei biak chreih dalam hatai, jeng ye hu hatai pachreih bac magru ka nyu siam. Tui rup hulin, bui sambai praong di abih hu mboh anek saih praong tagok jeng bruk kadha, hu ilamo hu glo akaok njauk jalan, hu hatai ranam taneh ia nagar. Nan hu lac jaman harei ini pambuak tui ilamo harei 2 bilan 9, padang taneh ia nagar.”

Meng ban raya tal palei ngak hamu, meng phum srok tal baha Khmer, pak di halei jeng chreih sambai uan tabuan harei Negar harei 2 bilan 9. Chreih hadah mbaok mata brei ka bangsa, jie hatai jai brei ka Ndang jeng ye hu hatai caong khin ba rup tagok ngak jeng prein khang praong. Bruk salih bahrau cambaic laic yau ye: hu jalan meng betong nao mai tal phum sroc, sang bac gheih ghang, labik ngak kong chreih sambai, mani kriya ralo brah padai baoh karaoh. Dalam nan, bangsa Khmer tuk halei jeng brei caik hatai, hu brei daong taong abih. Bangsa Khmer gam saong nagar yam tagok tui jalan nao di jaman bahrau di bangsa./.