Huyen Tuy Phong daok salih bahrau siam lagaih, raidiuk di rahra, rilo meng lac di dom bhum palei, hu siam cambaih laih. Taong abih dom xa hu jalan manyek nduac nao mai tal pasak; pasak xa saong palei hu gom ndien, hu majam raok ia hacih, ribaong ia, pabak hatai caong ka bruk ngak saong raidiuk; urang kathaot, rahra mikva bangsa takik hu daong brei kat caga ieik y te oh mek jien… Ini ieu lac “baoh yamen” mai meng Danak dak patrun kathaot karo kajap 2021 – 2025 di karja pakat nagar ba mai. Dom danak dak lagaih di danak dak hu daong rahra ta-eng uak drei tagok patruh kathaot meng hu brei phun jien, brei bruk ngak saong salih bahrau jalan sahaneng ka yaok baoh sang…

Meng di akaok danak dak, huyen sangka iek praong bruk khan brei thau sarak karja, hukum ka bruk patrun kathaot dalam rahra, rilo meng lac urang kathaot piah pamedeih hatai caong takre patruh kathaot, oh daok hatai caong maong, oh kham merat. Langiu di nan, bhum palei padang ngak biak siam lagaih dom danak dak, sarak patrun kathaot tui dom tanut caik brei di Karja tui yaok tukvak.

Langiu bruk daong phun jien, ndap nda, huyen Tuy Phong daok sangka iek praong bruk pato megru bruk ngak, brei kein lagaih suai atah ka rahra. Dalam 5 thun tapa, dalam huyen hu 1.500 mbang urang kathaot hu brei pato bruk ngak, rilo urang hu bruk ngak hadei di tuk bac tamat blaoh. Huyen hu padang 32 tal pato bruk ngak di bhum palei, daong rahra paglaong ilamo pala njam hacih, pala baoh gara, danui nyo, medan, raong glang siam lagaih… Njauk ndom mayai dalam nan lac, dom tal pakat bỉa pato gah jammariak co khi, ndien gom pandar, tanek mbang ging gaok… peih tabiak kein lagaih bahrau ka urang kathaot ngak bruk, daong dom urang nan hu bruk ngak di dom gah ngak mbang pablei salih, jitvu dalam bhum. Meng rilo meng lac diuk rai pambak tame bruk nao tasik, tal ini, rahra bhum palei hu thau ngak bruk karei, daong jien mek tame tani tanat jang…

Di dom huyen Bắc Bình, Hàm Thuận Bắc, Đức Linh…, Danak dak pakat negar patrun kathaot karo kajap hu pakat uy, karja sangka pato tacei tani tanat; bruk patrun kathaot hu brei mboh lac bruk ngak hu makna dalam bruk patagok kinh te – xa hoi.

Langiu di nan, tinh hu brei labaih 261.000 harak kat caga y te ka urang daok dalam baoh sang kathaot saong jaik kathaot piah duh bruk pasang iek saong taong ruak; padang saong pasiam 480 baoh sang, baoh sang kathaot, kan kandah ka sang daok…

Tui Phaok Akaok UB Bhap bini tinh Binh Thuan lac ong Nguyễn Minh, Danak dak pakat negar patrun kathaot karo kajap lac bruk biak suai atah, hu labik peih camreip min oh hu labik tamat.

Tukvak masa 2026 – 2030, Binh Thuan ba tabiak jalan ngak khik kajap bruk ngak ginup, dil samu dom sarak, danak dak patrun kathaot tui adat sarak; kham merat taong abih 100% daom baoh sang kathaot daok dalam tukvak 2021 – 2025 salih tapa patruh kathaot dalam puac tukvak 2026 – 2030.

Meng masa ini tal thun 2030, tinh daong padang, daong peih praong bruk ngak, danak dak patrun kathaot daong patagok bruk ngak mbang, pablei salih, jitvu, jirah rivang, peih mbang ngui, peih bruk pablei salih piah brei bruk ngak, jien mek tame karo kajap, randap haong langik salih karei, jit ruak ka baoh sang kathaot, jaik kathaot, baoh sang bahrau patruh kathaot.

Piah mek hu jalan ngak tanut brei caik nan, tinh Binh Thuan paglaong bruk pathau khan, paglaong hatai sahaneng dalam abih dhan gah di dalam majam politit, ngak jeng bruk samu gauk di dalam rahra bhap bini xa hoi, pachreih saong pamedeih hatai uak drei tagok patruh kathaot di urang kathaot, patakik bruk caong maong, oh kham merat, oh caong khin patruh kathaot di dom rahra bhap bini bhum palei./.