Daok di xa Bình Minh, tinh Tay Ninh (xa Thạnh Tân dahlau diah) – labik danei angan haong baoh kandiuk, jaik ini bruk bi urang katuak tuk mboh dom ro phun li-u siam hijao, tapak talei. Urang ngak salih ka bruk ini lac sa-ai Nguyễn Thanh Vũ, sa urang ngak nong ngak bruk dalam gah khak drak saong kaya ngak nong, nan khang hatai pala phun li-u.

Akaok meti, jalan sahaneng ini oh hu rilo urang jie tame kayua Tay Ninh oh njauk sa labik danei angan brei ka phun li-u. Min, sa-ai Vũ mboh kein lagaih di bhum ini, nan lac dom kanjah klak di tabau saong habei plom biak rilo, meda hu pandar piah pasiam taneh. Sa-ai tame pala di taneh 1,2 ha haong pajaih baoh li-u siem, pacang halak haling, pandar bruk prai sara saong dom khak sinh hoc. Hu makna abih, bein li-u huu co di sa-ai jeng labik rah rivang sinh thai. Sa-ai Nguyễn Thanh Vũ brei thau:

"Nan mboh lac dom kein lagaih ngan haong bein baoh kayau vil taom dar ceik. Urak ini bein jeng hu mbang tui meng labik rah rivang Ceik Juk Ba Den. Yaom lac dom bein phun oh ka hu tuai rilo min di harei hadei brei hu rilo urang ngak nong ngak tui bruk ini lac brei ngak jeng bhum pandap tamo praong, dui pachreih hu tuai damuai mai tal sang bein siam jang. Tuai damuai oh lac mai tal bein li-u bo jaik ini hu rilo phun baoh kayau nan tuai chreih takre jang”.

Daok sa-ai Nguyễn Văn Tiến, urang dang akaok HTX Jitvu Ngak nong Dừa Việt 78, daok lac urang ba jalan ngak ini tagok glaong jang saong hu ilamo jang.

Ndih tapui di Ben Tre, min tal thun 2008 sa-ai Tiến hu ba dom phun li-u siem mai pala iek dahlau di Tay Ninh. Sa-ai Tiến daok pandar kanduh li-u, khak limo, kanjah tabau pambuak haong tape men vi sinh piah ngak khak huu co. Langiu di nan, sa-ai daok raong jalko di ala phun li-u piah daong pacang halak, patruh oh pandar jru pamatai hareik atau jru hoa chat.

Thun 2019, sa-ai gam haong dom baoh sang rahra padang HTX li-u Việt 78. Meng yaok pluh hecta akaok meti, tal ini HTX hu pambuak jaik 300 ha, hu ginup prein piah pabak dom ndap nda rilo urang kakei blei saong mbaoh tangin pablei tabiak haong gah ngak mbang pablei salih pablei tapa Trung Quoc. Bruk naih gheih lac padang angan je “Li-u kalaok Tay Ninh”, tame ngak dahlau bruk pagam QR tame yaok baoh. Abih di nyu nan lac, di tuk yaom li-u gah Pei negar trun biar, HTX jeng khik yaom pataom blei tani tanat piah mikva sahnang hatai. Kayua bruk pagam nan blaoh rilo baoh sang rahra dak harei dak yam tame bruk ngak huu co. Sa-ai Nguyễn Văn Tiến brei thau:

"Tinh Tay Ninh hu Sarak 58 daong ka kinh te kapul, dahlak hulin jeng daok caga piah padang sa sang mac ngak pandap. Biak nao di tinh Ben Tre hu kein lagaih lac rilo gah ngak mbang pablei salih, urang ikak kaiy pataom blei nan li-u hu pablei jaik abih dom tinh saong pablei tabiak langiu negar. Di Tay Ninh bhum baoh li-u urak ini oh ka hu sang mac ngak ndap nda yau nan ye dahlak hulin brei pajeng cagar tal gah Pei piah pablei piah khik tani tanat akaok tabiak piah mikva dalam HTX ngak jalan ngak. Jaik tal hu sang mac mikva brei pablei tabiak di tinh Tay Ninh”.

Amuk Nguyễn Ngọc Linh, Phaok Akaok Chi cuc Gah ngak nong saong Alam langik tinh Tay Ninh ndom lac: “Kadha li-u huu co di Tay Ninh brei mboh, tuk thau pandar kein lagaih hu dahlau, pambuak haong khoa hoc saong ilamo saong khik karo “hatai” dalam bruk ngak mbang, di bhum taneh oh kein lagaih jeng meda hu ngak jeng bruk ngak nong yaom kaom glaong. Ini oh lac jalan ngak bahrau ka phun li-u, bo daok peih tabiak kein lagaih patagok gah ngak nong hacih sa-at, karo kajap ka Tay Ninh”:

"Dalam tukvak mai meng anak tal gah ngak nong di Tay Ninh brei ngak siam, dalam nan hu jalan salih co cau phun pala meng taneh padai, habei plom, kaosu oh lagaih tapa pala veik phun mbang baoh, njam patam piah patagok siam lagaih saong yaom kaom tagok”.

Meng dom bein phun li-u ngak iek dahlau, urang ngak nong di Tay Ninh hu brei mboh phun li-u taong abih meda hu cak agha karo kajap. Oh lac brei jien mek tame tani tanat, li-u huu co daok daong ngak jeng sa gah ngak nong hijao, bahrau, hu angan je, pagam haong rah rivang saong pablei tabiak. Jalan ngak nan yaom lac bahrau ba tame ngak, min hu peih tabiak jalan nao biak hu lagaih ka urang ngak nong bhum tapen negar Tay Ninh./.