Dalam dom harei akaok thun ini, Gah ta-eng pasang iek palei Đoàn, xa tapen negar Ia Lốp, tinh Dak Lak peih bruk bah cun daning haluk, pasiam talei paga, kik paban, gam haong tuel hala dok nagar, hala dok Ndang di bambang jang tame tabiak saong labik gah anak bilik nyaom pataom palei Đoàn. Ong Huỳnh Quang Phấn, Akaok palei Đoàn, xa Ia Lốp brei thau, ini lac sa dalam 4 labik palih ruah di xa dalam mbang palih ruah lambaok vakil Quoc hoi mbang ka XIV saong lambaok vakil HĐ Bhap bini, tukvak 2026 - 2031. Urak ini, Gah ta-eng pasang iek palei caga urang ngak, pambuak saong dom kapul samar chip pasiam, salah blaoh dom tal pakat piah duh tani tanat ka bruk palih ruah, srap gap ka raya di cu tri.

“Palei Đoàn mbang ini brei salam raok jaik 300 urang buh pilih hu mbaok tame palih ruah urang Lambaok vakil Quoc hoi nagar saong kapul Pahasa HĐ Bhap bini dom pakat dalam harei 15/3 anak tal. Piah duh bruk palih ruah, palei hu xa daong jien pasiam labik nyaom pataom. Gah ta-eng pasang iek palei daok jak ba mikva prein ngak bruk pambuak gam haong kapul kong an, bol lin rahra saong bol lin bien phong rik daong prein ngak, pasiam bilik nyaom pataom, kik paban, khik kajap hu sa labik gheih ghang siam mekre, pabak hatai caong di harei palih ruah”.

 Sa urang dalam dom urang rahra hu mbaok tame daong di Labik palih ruah ka 1 di palei Đoàn, ong Bùi Sỹ Đông brei thau, dom mbang palih ruah dahlau, ong jeng hu mbaok daong bruk caga, tui ong, bruk hu rik prein ka harei raya praong tuk halei jeng lac bruk hadah mbaok chreih hatai:

“Mbang palih ruah urang Lambaok vakil Quoc hoi, urang vakil dalam pahasa kapul HĐ Bhap bini anak tal, dahlak hulin jeng biak caong takre brei palih tabiak hu dom lambaok vakil hu ginup hadah krah, hatai anit ranam, hu ilamo dui ba mikva bhap bini khol dahlak; lambaok ka dom kadha srau kadau dalam bhum palei hu langyah tani tanat. Gam haong nan, sangka patagok majam jalan mbak jeng yau labik y te di bhum tapen negar hadei di pagam”.

Mbang palih ruah lambaok vakil Quoc hoi mbang ka XIV saong lambaok vakil HĐ Bhap bini 2 pakat, tukvak 2026 - 2031, di xa tapen negar Ia Lốp, tinh Dak Lak hu 4.600 cu tri hu mbaok tame buh harak phieu. Ong Nguyễn Duy Trung, Phaok Bi thu Thuong truc Ndang uy xa Ia Lốp brei thau, bhum palei hu padang 4 labik palih ruah hu 10 kapul palih ruah di dom palei, caga jien padai caga ka ndap nda kaya, parilo kapul kong an, bol lin bien phong, bol lin rahra khik kajap an ninh siam mekre labik tapen negar dahlau, dalam saong hadei palih ruah, pamaong tal mbang palih ruah salamat, jak jeng sampurna.

“Xa hu padang dom danak dak, asal kadha pathau khan ka bruk palih ruah piah papar tagok majam loa papar sap di xa, hu khau tin hu papar dua mbang dalam harei dalam nan hu var page saong var biar harei. Padang dom kapul palih ruah, caga dom kein lagaih ka ndap nda kaya siam abih ka mbang palih ruah Lambaok vakil Quoc hoi mbang ka XIV saong HĐ Bhap bini 2 pakat tukvak 2026 - 2031 dalam harei 15/3 mai meng anak tal”.

Ia Lốp lac sa di dalam 4 xa tapeng negar pah Pei tinh Dak Lak, tapen tinh Mondulkiri (Negar Campuchia). Dalam labik hu Balai Bien phong 735 (Ea H’Leo), daok dalam Ban Pato tacei Bol lin Bien phong tinh Dak Lak daok di ini. Trung ta Trần Ngọc Kiên, Phaok Akaok balai Bien phong 735 brei thau, taphia bruk pacang khik karo kajap taneh riya, an ninh tapen negar, urang jakar, bol lin labik kham merat hu mbaok tame khik kajap an ninh siam mekre dahlau, dalam saong hadei Nyaom roya Ndang mbang ka XIV, jeng yau mbang palih ruah Lambaok vakil Quoc hoi mbang ka XIV saong Lambaok vakil HĐ Bhap bini, tukvak meng 2026 - 2031:

“Balai Bien phong Ea H’leo hu ndom meyai ka pakat uy, karja palei roh duah, palih ruah saong srap gap ginup ndap nda kaya di dom labik palih ruah; pandar kapul pambuak ramik hacih sa-at, ngak gheih bilik labik, srap gap loa rayo, tuel mbang ron, panuac kadha; gam haong nan caga kapul pacang khik, khik kajap salamat di dom labik palih ruah. Patui di nan, labik jhul khang bruk pathau khan piah rahra thau cambaih laih dom bruk jhak di kol bleik piah ngak bangal tal mbang palih ruah, meng nan rahra caik hatai caga, meraik, ngak cagar siam mekre”.

Bruk ba gauk tame ngak di abih sa majam politit gam haong bruk sa hatai di rahram bruk caga ka mbang palih ruah di xa tapen negar Ia Lốp daok hu peih ngak samar, njauk adat. Meng bruk pasiam dom labik bilik palih ruah, jhul tagok pathau khan tal khik kajap an ninh siam mekre, taong abih jeng pamaong tal piah harei 15/3 anak tal lac harei raya di cu tri labik tapen negar, palih ruah hu dom lambaok vakil hu ginup hatai, ilamo, lambaok ka hatai caong di rahra bhum tapen negar di tinh Dak Lak./.