Bahrau meng blaoh hu lac ragam kadha puac Ariya Pataow adat, kayua ong Thông Đinh Phụng, sa urang thau haluh ilamu Ariya di urang bangsa Cam daok di palei Craoh Tang, xa Ham Thuan Bac, tinh Lam Ndong ba sap. Ini lac kadha Ariya piah pato pakai manuac urang daok dang haong gauk siam ka rai diuk mekre ka agama.

Ariya ieu lac kadha ragam ragu akayat mada hu atah panak karei karei di gauk. Mada kadha atah hu dom pluh ayat panuac nam panuac dalipal, min tepai jeng hu dom kadha atah tal yaok rituh ayat panuac. Tui dom urang roh duah gah ilamo Cam, dom kadha Ariya di urang Cam hu meng lavik mai, oh lac sa janih hu pato gilac tui jalan ndom cambuai yau dom janih satrariya atau ilamu bhap bani karei, blaoh daok hu urang meng kan cih vak tame dom harak gar kan klak meng huruh akhar Thrah.

Ong Thông Đinh Phụng brei thau, angan akaok kadha iew saong asal di dom kadha Ariya biak rilo janih dalam rai diuk, meng dom bruk ngak dalam dak rai sajarah, hatai ranam, adat cambat tanarakun, saka jawi… tal dom kadha pato pakai hu yaom pato tacei jalan diuk rai siam gheih brei ka manuac sia.

Sa di dalam dom kadha Ariya daneiy angan di urang bangsa Cam hu kadha urang Cham ieu lac Bini - Cam (nyu daok hu angan lac Anai mai Meng Makah). Kadha labaih 100 ayat nam baoh dalipal baoh, khan dak dalikan brei ka urang likei Awal saong urang kamei Ahier, njauk ura neh rabha kayua gait karei agama. Dalikan ini hu tamat abih di dalam drut druai tuk urang likei padhau tame dalah apui metai tui urang drei anit ranam. Kadha ini brei pachreih dom urang pato tamia, urang neh ragam ragu muzik … neh tabiak rilo kadha ilamu biak gheih bingi. Langiu di nan, daok hu dom kadha Ariya pato pakai ka urang kamei Cam ndom mayai daok dang tui adat patih gah amaik yau: Ariya Amuk thruh palei, Ariya Pataow adat…

Dom urang thau Ariya meda daoh puac bac di tuk halei labik halei jeng hu, tuk laneng lanoi atau harei roya. Dom ragu daoh, sap cuak yava prong sit yaok panuac daoh panuac cuak meda pambak tui hatai pachreih di urang daoh, abih di nyu lac dalam mbang daoh melam, ala aia bulan hadah di tapen kraong, di akaok palei Cam atau di tapen bimon kalan kan klak.

Ilamu puac ja Ariya hu rilo yaom ka gah dak rai sajarah, ilamo, sap ndom panuac puac gam saong ilamu. Yau nan min, tui thun bilan, jeng yau dom janih inem krung ilamo meng kan, ilamu daoh puac ja Ariya daok mbuan si lahik nao.  

Dang anak bruk yau nan, dom thun jaik di ini, So Ilamo, Padhih saong rivang ma-in  di 2 tinh Ninh Thuan saong Binh Thuan (klak) urak ini lac tinh Khanh Hoa saong Lam Ndong hu peih ngak dom mbang roh duah, yaok pataom saong duah pataom dom kadha Ariya tui jalan ngak mek sap, mek binguk gilac; peih dom tal pato tacei ilamu puac ja Ariya dalam bhap bani urang bangsa Cam...

Ong Lâm Tấn Bình, Urang gheih ghang yau Yuan lac Nghe nhan Uu tu di palei Gok, xa Bac Binh, tinh Lam Ndong brei thau, piah khik ramik ragu ragam bhap bani Cam, dalam tukvak tapa, Muyim tinh Binh Thuan dahlau diah hu peih 2 tal pato tacei ragu ragam bhap bani urang bangsa Cam dalam nan hu puac Ariya di urang Cam pak di xa Phan Hiep saong xa Phan Hoa, huyen Bac Binh, tinh Binh Thuan urak ini lac xa Bac Binh, tinh Lam Ndong.

Ngan haong dom siam gheih ba mai, ilamu puac ja Ariya di urang Cam hu Mentri Ilamo, padhih saong rivang ma-in brei angan lac Inem krung ilamo oh mboh di meta pakat negar tui Sarak ka 2216 di harei 27/6/2025.

Ini lac kadha siam laghaih piah anak tal dom puk palei hu rilo bhap bani Cam roh duah, ba tabiak jalan ngak atah dhua piah pacang khik saong patui veik cak rok patgaok  dom yaom lingai di janih puac ja Ariya di bangsa Cam.

Phaok Giao su, Tien si Phan Quốc Anh, urang dahlau diah dang akaok So Ilamo, Padhih saong rivang ma-in tinh Ninh Thuan (klak) brei thau, ngan haong bruk pandok veik, patui veik inem krung, dom puk palei hu rilo bhap bani bangsa Cam meda patui veik pacang khik saong cak rok patagok jang janih inem krung biak gheih bingi ini. 

"So Ilamo – Padhih saong Rivang ma-in nan lac jabat tacei pato min, daok peih ngak urak ini di dom xa. Dom bruk ini njauk ba tame dalam danak dak ba ngak ka nyu cambaih laih di UBND tinh bahrau nan ka drei meng peih ngak hu, njauk hu jalan ngak, sarak ba ngak, meng nan ka hu danak bruk, danak dak peih ngak piah mek hu baoh jak jeng siam mekre.”

Dalam tukvak meng anak mai tal, puk palei, dom jabat pambuak pagam tal saong bhap bani bangsa Cam di tinh Khanh Hoa saong tinh Lam Ndong njauk patui ngak bruk sangka daong ba, pachreih dom urang gheih thau bac thau puac ja Ariya; paralo lek taka dom kadha Ariya; pambak paprong saong peih rilo jang tal pato tacei janih inem krung ini brei ka bhap bani, abih di nyu lac dam dara uranaih. Langiu di nan, peih ngak ba Ariya nao parang iek, pakacah dalam dom labik, dom bruk ngak iek bruk rivang ma-in, bruk ngak ilamo; meyaih khan ilamu daoh cuak Ariya angaok di majam intenet. Hu yau nan ka, ragam puac Ariya meng hu khik saong daok gam yava sap danei tal dom puk palei urang bangsa Cam./.