Dom harei ini, di mblang hamu padai praong di dom xa Chư A Thai, Phú Thiện, tinh Gia Lai, padai hu tame tuk tathak yau sa blah khan bai kanyik praong. Hu dom mblang hamu, urang hu pah jamraik yuak dahlau. Ong Kpă An, bangsa Jarai daok di Ring Dap, xa Chư A Thai, nao rivang hamu mboh biak chreih chrai kayua bangu padai biak rilo asar. Ong brei thau baoh sang hu jaik 1,5 ha mblang hamu padai ngak 2 bilan, halau ia taong abih hu nduac meng kraong ribaong Ayun Hạ, nan yaok thun mek hu labaih 20 tan padai.

“Urak ini ngak padai brah di bhum taneh ini, meyah sa janih piah mbang dalam baoh sang ye hu labaih paje. Hadei di tuk kaoh abih dom jien buh tabiak yau ye blei khak drak, jru pametai halak, prein ngak taneh, yuak kuak…, banah jien laba daok veik baoh sang meda hu pandar luac thun. Oh lac tal piah mbang bo daok meda khik piah ka thun hadei, saong pablei piah duah jien. Dahlau diah, ngak padai apuh, oh tani tanat, lahik bilan. Daok urak ini, ngak padai ia meng hu kraong ribaong Ayun Hạ, hu ginup ia tuh, ngak hu rilo jang. Meng tuk salih tapa pala padai ia, raidiuk mikva hu trei sir.”

Di angaok dom mblang hamu daok di xa Phú Thiện, tinh Gia Lai – labik hu angan “Brah Phú Thiện” danei angan, sap jamraik yuak padai hu danei tagok. Ong Nay Keng, bangsa Jarai, Akaok palei Rbai, xa Phú Thiện brei thau, meng hu halau ia di kraong ribaong Ayun Hạ, urang hu ngak jeng bhum pala phun tabau, habei bhong, pakao hala… Dahlau diah rahra sa janih ngak padai gap si mbang, urak ini daok pambuak daong gah ngak mbang pablei salih piah ngak padai hu angan “Brah Phú Thiện” danei angan.

“Meng tuk hu kraong ribaong Ayun Hạ, bruk ngak mbang di mikva jeng hu lagaih jang rilo. Halau ia meng danao hu ba tapa majam kraong ribaong mai tal mblang hamu, oh daok pambak taong abih tame ia hajan yau dalhau diah. Bilan pala halei jeng khik kajap hu ginup ia tuh, padai cakrok siam, oh daok kurang mbang yau dahlau diah.”

Ong Phạm Văn Lượng, Phaok Bi thu Dang uy – Akaok UB Bhap bini xa Chư A Thai, tinh Gia Lai, brei thau padai lac phun pala rilo di bhum palei. Ngak tui Sarak ka bruk jhul khang pandar ilamo khoa hoc – kong nghe tame bruk ngak mbang, pamaong tal angan “Brah Phú Thiện”, yaok thun bhum palei caik dahlau jien padai daong rahra, rilo meng lac urang bangsa takik peih praong mblang hamu padai. Danak dak Ayun Hạ jeng daong rahra salih jalan sahaneng ngak mbang; abih di nyu nan lac urang bangsa takik hu salih meng bruk pambak tame ia hajan tapa pala drak hu kuhria siam lagaih.

“Patagok siam lagaih di danak dak kraong ribaong Ayun Hạ, hu halau ia piah patagok bruk gak mbang, mikva hu pataom tame salih dom bruk ngak mbang. Ngan haong labik huyen Phú Thiện dahlau diah ye mikva hu ngak dom bruk pambuak padai ia ba mai siam lagaih ralo. Meng nan, rahra hu tani tanat raidiuk; abih di nyu nan lac urang Jarai hu ba tame rilo pajaih padai asar siam hu yaom kaom glaong”.

Dom mblang hamu padai tathak harei ini hu ba mai hatai bui sambai ka mikva urang ngak nong di labik dom xa Chư A Thai, Phú Thiện, Ayun Pa, tinh Gia Lai brei mboh cambaih laih siam lagaih meng halau ia di kraong ribaong Ayun Hạ. Meng bruk ngak oh tani tanat, pambak tame taong abih di “ia hajan”, mikva dom bangsa di ini hu pala 2 mbang padai tani tanat, pambuak patagok veik rilo janih phun pala karei, dak harei dak parilo jien mek tame, uak drei tagok ngak kaya meda. Jak jeng nan jeng brei mboh mkana praong glaong di bruk pandar ilamo khoa hoc – ky thuat saong ngak siam lagaih dom danak dak kraong ribaong dalam patagok bruk ngak nong karo kajap di bhum Tay Nguyen./.