Hadei dom bilan tram pandiak rak hajan, dom kapol Dù Kê tame tuk jal val srap gap ka bilan tamia bahrau. Kadha ragam Dù Kê hu pasram, kaya tamia hu ngak hacih bahrau, saong dom urang nghe si, yaom lac yaok urang hu sa bruk ngak mbang karei min jeng pataom gauk di mblang tamia. Ong Thạch Sa, Kapul seni nghe thuat ilamo rahra Ron Ron, xa Thuận Hòa, Ban Can Tho brei thau:

“Yaok tuk srap gap tal bilan thu, Akaok kapul gilac pataom adei sa-ai gam haong gauk pasram, srap gap nao tamia. Tuk oh nao tamia, khol dahlak bruk thei thei ngak, ngak rilo bruk. Tal tuk rah tabiak brei pataom gauk gilac. Tuk ini abih bruk jeng lagaih kayua thei thei jeng hu smart phone, tok brei Akaok kapul ieu lac khol dahlak hu mbaok, srap gap nao tame ma-in ilamo tamia.”

Baoh sang ong Bố Sùng hu kapul Dù Kê meng rai ong ceik tal ini. Ong Sủng lac rai ka klau tui seni bhap bini ini. Kapul seni nghe thuat rahra Ron Ron di xa Phú Tân, huyen Châu Thành, tinh Soc Trang (klak) urak ini daok dalam xa Thuận Hòa, ban Can Tho blaoh ong daok patui bruk danei sap di tinh Soc Trang dahlau diah saong urak ini jeng hu duh bhian ka rahra dalam bhum palei. Ndom ka tamia Dù Kê, ong Bố Sủng – Akaok Kapul seni nghe thuat rahra Ron Ron, xa Thuận Hòa, Ban Can Tho brei thau:

“Ngak seni ilamo nghe thuat hu hatai gun pataom ka meng patagok hu. Urak ini karei haong meng kal, drei oh daok tamia tal 2-3 mon vaktu page blaoh daok tamia di malam tal mon tuk 11 padeih padei. Adei sa-ai meng tuk harei ye hu nao ngak bruk karei piah duah jien, patagok kinh te. Tuk nao tamia jeng hu abih urang daong prein nan khol dahlak hulin kham merat paglaong tui dom panuac daong prein di rahra saong brei khik miat bruk ini, meda lac oh klak bruk ini yaom lac yau halei.”

Dom kapul Dù Kê rahra yau Ron Ron urak ini oh daok rilo, min dom urang tui bruk, khik apui jeng daok rah tabiak dalam bhap bini phum sóc.

Dalam raidiuk rahra bahrau saong jaman patagok, mblang papan tamia Dù Kê gaok rilo kan kandah nan dom kapul oh daok tamia kayua bruk ini oh meda duah jien hu. Min tapi, gam song dom urang biak anit ranam saong chreih takre tamia Dù Kê, dom urang nan tuk halei tuk halei jeng duah abih bruk piah raong seni nghe thuat di bangsa. Hu biak rilo urang nghe si malam nao tamia, harei nao ngak kong; jeng hu urang harei ye nao ngak nong, nao galam padai, tal malam ye nao tui kapul adaoh tamia. Yaok tuk mbang tamia hadah gom jeng lac tuk buh hatai tian tame bruk tamia, caik abih dom ilamo, bruk naih joi piah duh ka tuai damuai. Sa-ai La Hoàng Vĩnh, Kapul nghe thuat ilamo rahra Ron Ron, xa Thuận Hòa, Ban Can Tho ndom lac:

“Vaktu harei adei nao ngak kong di kongti, malam mai adei tui kapul nao tamia piah duh ka mikva. Adei biak bui tuk hu nao tamia, hu brei mboh bruk naih gheih di drei angaok mblang tamia piah duh rahra.”

Lac sa bruk oh kurang hu dalam bhap bini Khmer Meraong Negar, seni tamia Dù Kê oh lac hu yaom laom me-in, bo daok payua dom kadha ka adat, ka bruk siam – jhak, njauk – suan; pamaong anek menuac tal raidiuk gheih ghang saong siam mekre jang.

Yaom lac daok rilo kan kandah di anak meta, min yaok bilan thu lagu mai, malam tal mblang papan tamia Dù Kê gilac hadah gom di dom danak dak raya adat. Dù Kê jeng daok dalam hatai anit ranam bruk di dom urang tamia, saong dalam bruk caong maong, anit ranam di mikva dalam phum soc./.