Bilan 10 saong 11 bahrau blaoh hu jeng tukvak oh var hu di rahra bhap bini daok di Dak Lak, Gia Lai, Khanh Hoa, Da Nang tuk hajan ia sua praong abih meng nan ini mai ngak tayah tayac rilo bhum palei pala. Ngak Danak dak “Quang Trung” kayua Thu tuong Rajaei ba tabiak, sa bruk nao daong samar chip, praong di dalam negar nao tal bhum palei labik ia sua di Kreh Negar di dom kapul bol lin, Kong an, dom bhum palei. Meng hatai suh sah ka haluk jaleih, hajan ia sua dalam dom baoh sang taik tahak di dom bhum palei baoh sang kathaot rambah, Danak dak Quang Trung oh lac “ban siam makre” gilac dom sang danaok di palei pala hadei ia sua, bo daok brei kein lagaih ka labik daok dang suai atah saong ba bruk salih raidiuk ka rilo baoh sang rahra.

Dom harei ini, yok ribau urang jakar, bol lin Quan khu 5, oh huac kanda hajan pandiak, harei padeih padei, ngak bruk karei – ngak urang padang sang, padang yaok daneing haluk, pabung sang ka mikva bhum palei njauk bala langik. Ngak bruk var harei, ndih takik, dom sa-ai pandar samar chip dom harei pandiak ngan haong hatai caong daong rahra samar chip hu baoh sang karo kajap, tani tanat raidiuk dahlau Raya Tet Nguyen dan.

Trung uy Phạm Ngọc Dân, Urang pan politik phaok Dai doi 6, Tieu doan 303, Trung doan 584, Mentri Pan Pato tacei Bol lin tinh Dak Lak, Bo Tu lenh Quan khu 5, gam haong urang bol lin daok malam harei padang sang danaok brei ka rahra, brei thau:

 “Dua adit ngak danak dak tui Thu tuong Rajaei ba tabiak, kapul lin pan phao karaong Quan khu saong dom labik di Mentri Quoc phong hu ba tabiak bol lin siam mekre, ngak harei, ngak malam, di harei hajan, pandiak. Adei sa-ai pasiam kan kandah ka ndap nda kaya, kaya ngak, kham merat tal harei 15/1/2026 brei salah blaoh takik abih 50% dom baoh sang karja palei hu jao brei ka kapul lin pan phao karaong Quan khu 5 saong dom labik di Mentri Quoc phong dalam bhum”.

Dom urang jakar, bol lin Quan khu 5 hu mbaok di grauk labik dom palei gaok kan kandah kayua bala langik, daong padang sang bahrau, pasiam sang daok ka rahra njauk khut tayah. Hatai thau ka bruk, bruk abih hatai tian di dom urang lin Wa Ho hu biak pambak, ngak drut druai di mikva bhum Kreh nagar – Tay Nguyen. Mboh bol lin biak susah tavak bruk, mikva dalam palei jeng jum tangin daong prein tame. Urang ye daong tahanek huak, urang pandiak ia, urang daong bruk, gam haong gauk klah rabha glaih glar. Di bhum taneh tayah tayac hadei ribuk ia sua, hatai di bol lin – rahra hu pambuak pagam, anit ranam. Amuk Nguyễn Thị Mận, daok di xa Hòa Thịnh, tinh Dak Lak, drut druai ndom mayai lac:

“Mboh dom bol lin ngak glaih glar adei sa-ai kamei jeng mai daong hu bruk halei ye daong. Khol dahlak hulin daong bol lin, tahanek ka bol lin huak hu var mbang huak bangi piah hu prein yava daong padang sang danaok ka rahra”.

Gam mbang gam daok, gam ngak, gam ndom mayai sap di dom bangsa. Hatai bol lin – rahra dak harei dak kak kajap, ngak jeng “hatai je rahra” khang karo, pabak prein khang piah kapul lin pan phao karaong Quan khu 5 khang kajap di luac jalan padang saong pacang khik taneh ia Negar. Thieu tuong Lương Đình Chung, Chính ủy Quan khu 5 brei mboh lac, dalam luac 81 thun tapa, Bol lin Rahra Viet Nam tuk halei jeng brei mboh cambaih laih bruk ngak xung kiixh, nao dahlau, Duh ka Rahra:

"Pataom bol lin di bhum Kreh nagar saong Tay Nguyen, bhum taneh ciuk rilo bala trak, urang hakar, bol lin Kapul lin pan phao karaong Quan khu 5 mboh lac, daong rahra lac bruk di hatai, mai tal Rahra samar drah abih. Khol dahlak hulin jeng hu daong gam haong sa majam politit saong taong abih Rahra dalam bhum hu truh tapa hu dom kan kandah, rambah rambup dalam bala ribuk ia sua. Tuk Rahra saong dom bhum palei truh tapa hu ribuk ia sua ye urang jakar bol lin pan phao karaong Quan khu mboh haniem phol selamat saong gheih hatai”.

Di hajan ia sua saong dom rambah rambup daok rah tabiak, thaik thaot urang lin Quan khu 5 hu ngak bruk ka rahra, pagam haong Rahra hu jeng sa labik pambak khang karo ka mikva bhum kreh Negar – Tay Nguyen. Tukvak meda hu nao tapa, min hatai anit ranam di bol lin – rahra daok kandaong miat miat. “Bol lin Wa Ho – Bol lin di rahra” – thaik thaot ini tuk halei jeng daok dalam hatai mikva bhap bini rahra di bhum Kreh negar, Tay Nguyen./.