Tui dom urang taha di mbon palei Ma Giai, mukkei dom urang nan hu ruah labik padaok danaok di takai ceik Ơi Phí piah pambak tame bruk pacang khik di ceik glai. Tapa rilo yaok dom pluh thun, dom urang nan daok lagaih haong langik ceik glai. Min, langik salih karei ngak ka halau ia thu lagu putih, abih di nyu nan lac dom mbang jaleih taneh oh meda thau dahlau. Labik oh daok lac labik sron mbon salamat blaoh jeng bruk mbuan gaok bala yaok bilan hajan ia sua.

Klak taneh daok meng kal ndam gam meng rilo rairah dahlau mai piah duah sa labik daok bahrau oh lac sa bruk mbuan lagaih. Sa janih di nyu hu lac kayua adat cambat tanarakun, mikva oh khin abih hatai klak truh labik “labik danaok dar thaok”. Janih karei rilo di nyu hu meng lac kayua rahra daok kan kandah, oh hu ginup kein lagaih piah padang sang danaok di labik karei barau. Thau ka bruk nan, karja palei hu kham merat jak ba, gam haong nan likau jalan padang labik daok karei saong daong jien piah rahra bhap bini padang sang bahrau.

Ieu lac 1 di dalam 62 baoh sang rahra hu panduan tapa labik daok karei, baoh sang amuk Sô Thị Xuân urak ini oh daok duh hatai ka labik mbuan jaleih taneh. Thun ini, baoh sang amuk raok raok Tet nethak Asaih Waw chreih chrai dalam baoh sang bahrau, di palei bahrau.

Amuk Xuân brei thau, harei hu brei taneh daok karei, abih urang dalam sang biak bui sambai lo. Tal ini daok bahrau ndaok taneh, hu sang kajap, jalan betong, gom hadah, ia pandar ginup mboh sahnang hatai jang.

Hu thau mbiah lac, Danak dak “Dak ramik, caga srap gap tani tanat dom baoh sang Bangsa takik tui adat salih labik daok labik ngak mbang di mbon Ma Giai” hu peih ngak di angaok taneh labaih 5,2 ha, hu taong abih tanut buh jien tame jaik 18,3 ty dong.

Meng bilan 3/2025, dom baoh sang rahra danak panduan mai sang daok bahrau. Yaok baoh sang hu caga 400 m² taneh daok, daong jien panduan sang; dom baoh sang kathaot, jaik kathaot kan kandah ka sang daok hu daong padang sang meng dom Danak dak jalan ngak pakat negar saong Danak dak brei oh daok baoh sang taik tahak.

Bi thu Chi bo gam urang dang Akaok palei Ma Giai, ong La O Á chreih chrai brei thau lac: Jalan ngak ini di Ndang, Karja biak siam mekre, sangka ka rahra bhap bini meng labik daok tal bruk ngak. Urak ini mai labik daok karei, mikva hu sang danaok kajap, jalan mbak, ia njuh, gom ndien hu ginup nan sahnang hatai ngak mbang patagok kinh te, patruh eik patrun kathaot.

Hadei di tuk panduan mai daok di labik pataom rahra bhap bini, 62 baoh sang rahra mbon palei Ma Giai hu raidiuk tani tanat jang. Yau nan min, rilo baoh sang rahra jeng caong hu veik bruk ngak lagaih piah tani tanat raidiuk.

Tui ong La O Á, mbon palei Ma Giai urak ini hu 189 baoh sang, dalam nan hu 47 baoh sang kathaot, 50 baoh sang jaik kathaot. Daok labik daok karei hu 62 baoh sang, min daok 19 baoh sang kathaot saong 16 baoh sang jaik kathaot.

Ong La O Á ndom lac: “Hu labik daok salamat, mikva sahnang hatai jang rilo. Min, taneh ngak mbang daok takik, halau ia piah brei ia oh ka tani tanat nan jien mek tame di dom baoh sang rahra jeng daok oh lagaih. Mikva biak caong khin hu daong pajaih athur raong, phun pala saong tacei ba ilamo ky thuat piah patagok bruk ngak mbang tani tanat”.

Daok ong taha palei Rah Lan Đin brei thau, meng hu bruk sangka di Ndang saong Karja, mikva hu labik daok tani tanat. Min urak ini, mikva daok kurang taneh ngak mbang, kurang phun jien piah buh jien tame ka phun pala, drei pajaih anek athur raong. Urak ini hu sang danaok praong laneing lanoi blaoh, mikva caong hu daong brei ka bruk daok dang mbang ngui piah samar drah mek hu tani tanat sampurna dalam raidiuk, gam haong gauk padang mbon palei dak harei dak patagok.

Ong Đặng Hoài Châu – Akaok UB Bhap bini xa Phú Túc brei thau: Bruk salah blaoh labik daok karei di palei mbon Ma Giai hu ngak jeng bruk salih mboh cambaih laih dalam raidiuk rahra. Tuk daok di labik salamat, ndien, jalan, ia pandar hu khik kajap, rahra lagaih jang dalam bruk daok dang, ngak mbang saong pandar dom jitvu y te, pato megru, sarak karja daong brei ka rahra.

Jeng tui Akaok Ub Bhap bini xa Phú Túc, tukvak meng anak tal, bhum palei hu patui bruk pagam dom danak dak daong patagok bruk ngak mbang, brei bruk ngak lagaih haong kein lagaih di mbon palei, piah daong rahra tani tanat jien mek tame, uak drei tagok patruh kathaot karo kajap./.