Hu padang di thun 2016, akaok camereip bahrau hu 13 urang gam haong yaom jien phun labaih 100 trieu ndong min tal harei ini jien mek tame di HTX Dich vu nyaom pataom Tuan Tu, xa Phuoc Dinh hu tagok jaik 4 ty ndong/thun. Baoh jeng siam mekre ini mai meng HTX hu nao jak ba dom urang daok dalam HTX panduan salih 45ha njam patam tapa pala ribung tei hijao, pandar ilamu kong nghe glaong. Ong Hùng Ky, Akaok HTX Dich vu nyaom pataom Tuan Tu, xa Phuoc Dinh brei thau lac:

"Meng harei padang kapul HTX mikva ngak rabung prang ini mikva hu jien mek tame biak glaong, hu HTX blei abih, mikva oh duh hatai suhsah ka yaom kaom."

Ong Trần Ngọc Bình, Akaok UBND xa Phước Dinh klah rabha: Kuhria tal 10 bahrau tapa, dom urang dalam HTX Dich vu nyaom pataom Tuan Tu, xa Phuoc Dinh ngak tabiak hu labaih 100 tan ribung tei hijao. Pandap ngak tabiak meng phun ribung tay hijao di HTX hu urang ngak mbang doanh nghiep mboh tangin tame harak pambuak bruk ngak mbang blei tame taong abih ngan haong yaom 50.000 ndong/kg. Dom baoh sang pala phun ribung prang hijao di palei Patuh urak ini oh daok kuhri kuhria ka labik pablei tabiak bo taong abih phun ribung tei paik tame ye hu HTX blei tame. Ong Trần Ngọc Bình ndom mayai lac:

“HTX ribung prang ini mong yau HTX di palei ye. Po di HTX ini nao jak ba taong abih dom baoh sang gam sa tangin haong HTX piah pala angaok dom mblang taneh bo HTX daok peih prong. Kayua yau nan, bhap bani hu mbaok tame  HTX biak rilo saong pandap ngak tabiak lac hu yaom glaong. Kayua yau nan ye, urak ini bruk patruh eik patrun kathaot brei ka mikva nan lac biak siam, mboh rilo lac phun ribung prang hijao”.  

Piah peih prong mblang taneh pala, patagok bruk ngak mbang, pamaong tal bruk ngak tabiak tui jalan khang kajap, meng thun 2010, HTX Dich vu Ngak nong Son Phat pala iandam hu padang tagok di palei Xóm Bằng. Akaok mereip HTX tok hu 7 urang, jien phun tok hu 150 trieu ndong, mblang taneh pala nha ndam jeng tok 5 sao min tal harei ini, mblang taneh pala phun Nha ndam di HTX cok rok patagok hu labaih 4ha, san luong nha ndam di HTX mek tame hu labaih 25 tan/ha/bilan, yaom jien mek tame hu yaok thun labaih 1 ty ndong. Ong Thành Lai Chu, Akaok Hop tac xa Dich vu Ngak nong Son Phat, xa Ninh Hai brei thau:

"HTX mai peih bruk di palei Xóm Bằng ini, meng nan mai HTX jeng brei bruk ngak ka palei Xóm Bằng rilo mang lac urang bangsa Raglai."

Dom hagait daok rah tabiak dalam bruk padang ngak palei pala bahrau di dom puk palei dalam tinh Khanh Hoa brei mboh, dom HTX ngak nong hu dom rik daong biak prong, oh lac sa janih ngak brei paglaong yaom jien mek tame ka urang ngak nong blaoh nyu daok ngak jeng pren khang ka urang ngak nong jhul patagok bruk padang ngak palei pala bahrau. Mai meng bruk HTX dang tabiak pambuak bruk haong dom urang ngak mbang doanh nghiep bo rilo urang nong hu daong jien buh tabiak ngak saong blei tame pandap panda ngak tabiak.

Tal harei ini, dalam tinh Khanh Hoa hu 144 HTX ngak nong, dalam nan hu 126 HTX daok peih ngak gah pala drak, raong glang, taong mek raong glang kaya ikan dalam aia, ngak sara saong 18 HTX nyaom pataom. Ta-eng di 3 xa yau ye Ninh Phuoc, Phuoc Huu saong Phuoc Hau hu 19 HTX ngak nong panduan salih bruk ngak di drei tui Hukum HTX bahrau. Dom HTX daok ngak jeng pren khang brei ka bruk padang ngak palei pala bahrau pambuak haong pasiam gilac gah ngak nong, paglaong rai diuk ka urang nong, palaghaih ka dom puk palei dalam tinh Khanh Hoa padang ngak xa palei pala bahrau pakat glaong./.