Cty Cổ phần đầu tư Labik ngak kong Hoàng Thành Du Long urak ini lac po đầu tư Labik ngak kong Du Long, tỉnh Ninh Thuận.  Labik ngak kong Du Long hu mbaok taneh praong labaih 407 ha daok di huyện Thuận Bắc. Hadei di tuk taduan mek danak dak Padang ngak cơ sở hạ tầng Labik ngak kong Du Long meng Tập đoàn Hoa Sen saong peih bruk padang ngak veik meng thun 2021, cty ini kham merat padang ngak pasiam hạ tầng saong ieu da-a dom urang ngak mbang tame pah taneh. Tal urak ini, hu 3 danak dak tut angan tame ngak mbang haong yaom phun jien abih tih lac 1.068 tỷ đồng.

Ong Nguyễn Văn Sang, lambaok po padang ngak Labik ngak kong Du Long brei thau, hu mbaoh tangin pambuak bruk pah taneh saong daok ngak harak likau chứng nhận đầu tư brei ka 2 doanh nghiệp tra: “Dalam bilan 8 meng blaoh kol dahlak hu daa sa gah pambuak bruk lac Hiệp hội bilau pabo di Úc. Tapa ginum biai, urang hu  4 doanh nghiệp di hiệp hội caong khin mai ini ngak mbang. Meyah hu 4 doanh nghiệp nan mai ini ngak, meda ngak jeng chuỗi khép kín ka marai Đà Lạt. Caong lac Labik ngak kong Du Long meda dui pachreih urang buh jien tame ngak mbang rilo jang dalam 2 thun tal.”

Daok Labik ngak kong Phước Nam hu mbaok taneh praong 370 ha daok di huyện Thuận Nam daok peih ngak vaktu ka 1 haong 153 ha. Urak ini Labik ngak kong ini dui pachreih hu 13 danak dak buh jien tame ngak mbang, haong yaom phun jien tut angan abih tih jaik 330 tỷ đồng. Ong Vũ Văn Lâm, lambaok po padang ngak Labik ngak kong Phước Nam brei thau, urak ini dom jalan mbak hu ngak salah, Cty daok pataom tame tauk kiak takai jalan saong ngak gom truac hadah. “Cty taduan mek Labik ngak kong ini di bilan 4/2021. Cty hu miễn kak je pah taneh min brei ngak ginup harak gar meng hu miễn. Dahlau daih po klak urang oh ngak harak gar nan, nan ye karja jeng daok kak je. Bahrau ini Cty hu mbaoh tangin tame harak hadar kanal haong 1 tập đoàn di Đài Loan padang sang mac ngak kreih camin cường lực di mbaok taneh praong 30 ha, patui di nan urang meda tapa duah thau darak pasar saong ngak bruk dalam jang haong drei.”

Langiu di 2 Labik ngak kong nan, dalam tỉnh Ninh Thuận daok hu 2 Labik ngak kong karei lac Thành Hải saong Cà Ná. Dalam nan, Labik ngak kong Thành Hải (daok di ban Phan Rang - Tháp Chàm) oh daok labik brei pah. Daok Labik ngak kong Cà Ná (di huyện Thuận Nam) urak ini jeng daok cang sarak brei buh jien tame padang saong ngak mbang gah kết cấu hạ tầng labik ngak kong.

Urak ini dom bruk ngak piah dui pachreih urang buh jien tame jeng hu  UBND tỉnh Ninh Thuận brei tapa lac: bruk ngak cơ khí; ngak pandap xây dựng; ngak tabiak saong lắp ráp ô tô, radaih patuh, ngak pandap mbang, menyum saong kaya nong, kaya glai, kaya ikan, ngak điện, điện tử, bán dẫn; ngak jru tavao saong mỹ phẩm; pajeng ba, kho bãi saong parabha pandap panda, ngak pandap pandar, pandap meng cao su saong plastic saong dom bruk ngak kong karei karei. Abih di nyu nan lac, Ninh Thuận brei dui pachreih dahlau dom bruk ngak takik njaom nerak saong siam ka alam langik tasik. Meng ini, dom doanh nghiệp hu jalan piah ieu da-a, peih bruk buh jien tame ngak dom Labik ngak kong di tỉnh. Ong Sử Đình Vinh, akaok mBan khik ramik dom Labik ngak kong tỉnh Ninh Thuận brei thau: “Tỉnh hu quy hoạch bruk ngak cambaih laih saong taong abih jeng hu pasang iek, mbaoh tangin brei ngak, tuk gah đầu tư urang tame mai, kol dahlak hu ginup adat piah chứng nhận đầu tư ka urang. Dom sarak daong siam abih di Rajaei ye tỉnh jeng brei pandar, mangaok mala jeng siam lagaih yaok sarak piah taduan raok urang buh jien tame ngak mbang.”

Dalam 35 danak dak đầu tư thứ cấp tame dom Labik ngak kong di Ninh Thuận, tal urak ini hu 18 danak dak daok ngak bruk, ba bruk ngak ka labaih 5.472 urang ngak dalam tỉnh haong yaom jien bilan kuhria rah tapa lac 7 triệu 500 rabau đồng sa urang sa bilan.

Piah palgaih ka urang buh jien tame ngak mbang, tukvak tapa, mBan Khik ramik dom Labik ngak kong Ninh Thuận daok pasang iek piah pambuan adat hành chính; dui katut panak tukvak ngak harak gar, langyah tui jalan online piah patrun jien padai saong tukvak ka doanh nghiệp. Tỉnh jeng brei thau cambaih dom adat ngak harak gar hành chính di mangaok blah web di mBan Khik ramik dom Labik ngak kong saong niêm yết di labik ngak bruk./.