Jeng daok ngak bruk di 20 thun dahlau lac ngak hamu. Bruk ini hu daong ka ong Từ Thiện Huệ daok di palei Hậu Sanh, xã Phước Hữu, huyện Ninh Phước raong 5 urang anek mbang bac jeng menuac jeng urang. Diuk ong Thiện Huệ lac amuk Phú Thị Mỹ Loan brei thau: piah hu jien brei ka dom anek mbang bac, langiu di bruk ngak hamu, diuk pasang jeng ngak rilo bruk piah hu jien tame. Amaik ame glaih glar nan ye dom anek biak anit ranam amaik ame, langiu di paok jien biak takik di amaik ame payua brei, piah hu ginup jien bac, jien mbang huac…., dom anek jeng nao ngak duah jien langiu mon bac… Dalam tuk nao bac, saong urak ini hu bruk ngak tani tanat min dom anek jeng thau daong gauk, tacei pato gauk nan ye diuk pasang ong muk jeng mboh sanang hatai. Amuk Phú Thị Mỹ Loan ndem lac: “dua diuk pasang dahlak kham marat ngak hamu, raong limo, raong pabui piah ka anek nao bac…”

Dahlau deih, sang ong Đàng Nguyên daok di palei Tân Đức, xã Phước Hữu jeng biak kan kandah. Diuk pasang ong mboh lac tok hu bac taa meng salih hu raidiuk. Nan ye, diuk pasang ong tuk halei jeng iek praong bruk bac taa di dom anek. Bruk ngak ka diuk pasang ong Nguyên mboh bui sambai saong haniem phul rilo di abih lac 7 urang anek di ong thei jeng lac urang đảng. Dalam nan hu 2 anek likei hu bac tamat blaoh thạc sỹ.

Di dom palei Cam dalam huyện Ninh Phước, rilo sang diukrai meng bruk ngak nong atau nao ngak công nhân, pablei salih min thau patak pataom piah brei ka anek nao bac. Mikva daok pak ini sahneng lac, rai amaik ame rambah rambup kayua kurang akhar haroh, kurang ilamu nan ye bruk brei ka anek nao bac lac bruk praong dang akaok. Ong Trượng Tình, akaok Kapul pachreih bac xã Phước Hữu brei thau: “Di dalam xã Phước Hữu, rilo baoh sang biak kan kandah min jeng patak pataom piah raong anek nao bac tal labik…”

Ong Nguyễn Minh Trứ - Akaok Kapul pachreih bac ndom lac, piah pachreih bruk bac daa, dom but pajaih padang Kadung jien pachreih bac, dom urang dang akaok but pajaih jak ba dom urang dalam but pajaih rik jien tame kadung jien. Hu but pajaih, hu kadung jien pachreih bac tagok tal yaok pluh triệu đồng piah yaok thun peih bruk pok mayaom, pachreih ba, daong dom kamuan yam tagok dalam bac taa saong pasram megru. Yaok kreih camin bac megru naih joi jeng hu prein pambak tabiak dalam puk palei, but pajaih, pachreih ba anek kamuan nao tal sang bac, lac kreih camin hadah di harei hadei nan ye bruk klaak bac, padeih bac mateh dhi di dom palei Cam urak ini meda lac oh daok: “Dalam mikva bangsa Cam di Ninh Thuận, danak dak pachreih bac, pachreih megru padang bruk bac taa dalam bhap bini hu cak rok patagok praong dalam di jaik abih dom xã. Bo dalam nan, but pajaih bac taa, baoh sang bac taa lac dom bruk daok hu patagok siam lagaih. Yaok but pajaih, yaok baoh sang hu jalan pachreih bac karei di gauk min abih di nyu nan lac daong ba, pachreih anek saih kan kathaot kham merat yam tapa kan kandah, yam tagok dalam bac taa”.

Danak dak pachreih bac, pachreih megru dalam urang bangsa Cam di Ninh Thuận oh padeih hu salih bahrau meng asal kadha tal jalan ngak, dui pachreih hu rilo rairah bhap bini hu mbaok tame. Tal urak ini, taong abih dom xã, phường, ban sit jeng hu kapul pachreih bac, ngak jeng prein khang dalam dak padang bruk bac taa dalam bhum bhap bini Cam jeng yau dalam tỉnh Ninh Thuận./.

Urang lang: Thu Thảo