Kadha vak di Jasi – Urang vak di rayo sap ndom VN daok di TP.HCM hu ndom ka bruk ngak mbang cak rok patagok kinh tế di urang dam angan Dịp A Sắt, bangsa Nùng daok di xã Phan Tiến, huyện Bắc Bình saong urang dam bangsa Cam angan Lựu Trọng Sư daok di xã Phú Lạc, huyện Tuy Phong, tỉnh Bình Thuận. Daa mikva saong taong abih gauk tui pang.

Thun 2019, hadei di tuk hu tabiak truh bol lin, mai veik palei, sa-ai Lựu Trọng Sư  peih bruk ngak mbang meng raong pabe. Meng hatai khang di urang lin, sa-ai tuk halei jeng abih drei haong bruk ngak, oh huac kan kandah, yam tagok dalam rai diuk.  

 Tuk camereip, sa-ai hu amaik ame caik veik tapol pabe jaik 90 drei. Thun 2020, tuk hu Huyện đoàn Tuy Phong daong ka dam dara mesre phun jien piah cak rok patagok kinh tế, sa-ai khang hatai mesre 150 triệu đồng, peih prong van ro. Tal harei ini, tapol pabe di sa-ai Lựu Trọng Sư tagok tal 160 drei. Urak ini, yaom pablei drei pabe daok diuk trak meng 14 - 15 kg sa drei lac meng 2 – 2 triệu 200 rabau đồng. Meng yaom pablei tani tanat yau urak ini, yaok thun, sa-ai laba hu labaih 100.000 triệu đồng. Langiu di nan, sa-ai daok ba bruk ngak ka dua urang ngak di puk palei. 

 Lựu Trọng Sư brei thau, pabe takik njauk ruak, tok brei hu van ro hacih sa-at, laneng lanoi, brei menyum jru giun sán saong klauk dom janih vắc xin pacang caga ruak njaom mbak. Oh lac tok thau raong glang, sa-ai daok duah jalan tabiak ka drei pabe di drei.

Karei jang urang likei Cam angan Lựu Trọng Sư daok di xã Phú Lạc, huyện Tuy Phong, urang dam bangsa Nùng angan Dịp A Sắt daok di xã Phan Tiến, huyện Bắc Bình  palih ruah ka drei jalan padang mbang angui meng bruk pala phun mbang baoh pambuak pagam haong bruk raong limo. Bruk ngak ini di sa-ai Dịp A Sắt akaok mereip hu ba mai kein laba glaong.

Thun 2017, sa-ai padang bruk ngak raong limo pambuak haong pala phun mbang baoh angaok taneh puh di sang drei. Sa-ai Dịp A Sắt khang hatai pala pablak labaih 2 ha dom janih phun yau: panat, pa-aok, durian, kruac bhung… saong pala hareik piah raong limo, menuk angaok taneh apuh. Urak ini, tapol limo di sa-ai Sắt tagok hu jaik 20 drei. Yaok thun, sa-ai hu jien mek tame labaih 100 triệu đồng meng phun mbang baoh saong limo palimek. 

Ndom ka jalan daok kuhria ngak anak tal di drei, sa-ai Dịp A Sắt, xã Phan Tiến, huyện Bắc Bình, tỉnh Bình Thuận brei thau, daok brei peih prong bruk ngak di drei, saong halar hatian klah rabha ilamu ngak mbang tal urang đoàn dam dara di palei. 

"Dahlak bhian tui iek dom bruk ngak mbang cak rok patagok kinh tế ba mai kei laba glaong angaok dom phương tiện truyền thông, nan ye dahlak palih ruah ka drei bruk pala pablak dom janih phun mbang baoh pambuak haong raong limo, menuk. Njauk ndom lac, bruk ngak ini biak laghaih haong puk palei kayua hu aia pruh luac thun, nan ye phun pala cak rok patagok biak siam. Tui dahlak mboh bruk hagait jeng yau nan, pak drei kham merat halei oh, meyah kham merat lac hu abih. Bruk pala rilo janih phun mbang baoh ye hu jien mek tame tani tanat jang pala sa janih phun. Blaoh dahlak raong menuk, limo piah duah hu jien mek tame".

 Tal harei ini, bruk ngak mbang kinh tế di sang sa-ai Dịp A Sắt mboh tani tanat jang, rai diuk di sang sa-ai dak harei dak kaya meda. 

  Sa-ai Thái Thành Bi, Phaok bí thư Tỉnh Đoàn Bình Thuận brei thau, piah daong ka dam dara padang mbang angui, dom pakat Đoàn dalam tỉnh hu jhul pakhang dom van pato pathram, ba nao rivang iek bac megru dom bruk ngak mbang, duah jalan pablei tabiak ka pandap panda. Langiu di nan, dom pakat Đoàn daok palaghaih ka dam dara mesre hu phun jien piah cak rok patagok bruk ngak mbang kinh tế. 

 "Pataom tame jhul khang phun jien uỷ thác, dom phun jien brei dahlau ka urang đoàn dam dara dalam bruk padang mbang angui saong ba brei ngak ka rup drei. Tapa bruk ngak ini, urak ini hu rilo kareih camin dam dara, abih di nyu lac dam dara urang bangsa takik jeng hu rilo bruk ngak biak siam gheih. Yau ye ayut Dịp A Sắt, ayut Lựu Trọng Sư. Ini lac dom ayut ba akaok nao dahlau dalam bruk padang mbang angui. Ayut Dịp A Sắt urak ini daok biak jak jeng haong bruk  pala phun mbang baoh, daok ayut Lựu Trọng Sư jak jeng haong bruk raong pabe".

  Dom jak jeng tuk akaok mereip di sa-ai Lựu Trọng Sư saong sa-ai Dịp A Sắt dalam cak rok patagok kinh tế nan lac mai meng dom sa-ai hu duah tabiak ka drei jalan ngak mbang saong kham merat yam tagok, khin saneng, khin ngak, kham merat ngak kaya meda di angaok mblang taneh palei drei./.