Hu Sa biar harei puac bilan 9, khaol akau dahlak duah nao tal baoh sang khang karo di ong Đỗ Văn Chỉ, daok di puk Phuoc Tan, xa Phuoc Chi, dahlau diah ndih dalam ban sit Trang Mbang, tinh Tay Ninh.

Dalam dak dalikan ndom biai nao mai, ong khan gilac ka canah jalan rambah rambup di rai diuk drei piah brei mboh cambaih laih kadha salih bahrau mai meng sarak patrun kathaot di puk palei.

Dahlau diah, rai diuk baoh sang ong Chi pambuak pagam haong hamu apuh, chrak jan mek ikan. Min thun umo taha nao saong ruak kik dui atah labaih 20 thun ngak ka ong jaik yau ye abih ralo pren ngak.

Blaoh tal puac thun 2023 tuk karja puk palei gam haong kapul nyaom daong dak padang brei ka sang ong sa baoh sang Paprong gul pataom khang karo kajap.

Langiu di sang danaok, ong Chỉ daok hu chrai phun jien piah raong limo, ba brei jien mek tame tani tanat. Tal harei ini, tapul limo caih menek blaoh, ba mai yaom jien mek tame piah ka ong amuk cai pandar yaok harei, jru cavao, daong ka rai diuk trun meneng cuang kandah jang. Meng di “mbang harei ini kuhria ka harei hadei”, baoh sang ong urak ini hu blaoh baoh sang khang kadang saong hu bruk ngak mbang kinh te piah pambak. Ong khan brei thau: “Karja bahrau brei jang drei limo tra nan ye dua hadiuk pasang pasang taha hu mbluak jang bruk ngak mbang kinh te, ta-eng drei ngak piah mbang ye anek bhik nyu tabiak mbang karei abih paje oh kuhria hagait hu. Hu Karjar sangka bo baoh sang meng trun meneng kan kandah, ye oh hu sang danaok yau ini”.  

Dalikan dak di ong Chỉ daok dalam yaok ribau kareih camin brei mboh ka baoh jeng siam mekre di danak dak patrun kathaot khang kajap blaoh di Tay Ninh daok peih ngak. Bruk ba pataom taneh riya langik tasik ba mai ka siam laghaih cak rok patagok bahrau min jeng ba tabiak oh takik cuang kandah.

Ong Trương Tấn Đạt, Phaok Akaok So Ngak nong saong Moi truong tinh Tay Ninh, brei thau bruk patrun kathaot di tinh mek hu dom baoh jeng siam mekre hu mboh di anek meta. Meyah lac akaok vaktu, dalam tinh hu labaih 8.300 baoh sang kathaot ye tal akaok thun 2025, tika ini tok daok labaih 3.000 baoh sang. Kuhria tal puac thun ini, baoh sang kathao saong jaik kathaot dalam tinh meda trun daok 0,32%.

Rai diuk di dom baoh sang kathaot hu salih bahrau taong abih gah: 100% hu harak pasang iek ruak; 96% uranaih nao tame sang bac njauk umo; jaik 99% baoh sang hu pandar aia hacih. Labaih 173.000 mbang baoh sang mesre hu phun jien ngan haong taong abih labik labaih 7.200 ty ndong.

Piah patui veik peih ngak dom bruk ngak hu ba tabiak dalam vaktu bahrau, Tay Ninh meda pataom tame dalam 6 nyaom lang yah: brei peih ngak dahlau bruk daong ka dom xa daok rilo baoh sang kathaot; peih ngak samu gauk sarak an sinh; jhul khang bruk taduan mek phun jien; patagok bruk pasang iek, tacei pato ka puk palei; jhuk pakhang bruk pathau khan paglaong hatai saneng yam tagok di bhap bani; saong salih bahrau bruk pakacah gauk “daong gauk patruh kathaot karo kajap”. Ong Trương Tấn Đạt daok brei thau:  “Khaol akau dahlak meda patagok bruk pasang iek saong tacei pato ka dom xa hadei di ba pataom peih ngak njauk haong jalan ngak di pakat nagar ba tabiak. Langiu di nan jhul khang bruk pathau khan paglaong akaok saneng, bruk ngak di drei brei ka bruk ngak ini. Tỉnh jeng hu brei mboh lac bruk ngak prong piah ngak jeng pren khang cak raok patagok karo khang kajap… Kayua yau nan ye meda patui veik patagok hatai daong ba gauk, ngak habar piah ka urang kathaot taduan mek ginup abih dom sarak siam mekre, daong ka mikva yam tagok oh thei daok caong mong tame bruk daong ba di rahra.”  

Gam tui dom baoh jeng siam mekre mek hu dalam vaktu 2020-2025, Tay Ninh oh lac sa janih trun kathaot karo khang kajap blaoh daok ngak tabiak sa kadha khang kajap brei ka bruk cak rok patagok taong abih gah. Mai meng bruk nao gam di karja saong bruk kham merat yaom tagok di yaok bhap bani, jalan ngak “oh daok baoh sang kathaot” di thun 2030 daok hu mboh jaik abih./.