Sang danaok laneing lanoi karo kajap di di urang bol lin meng kal dahlau angan Dư Văn Việt, daok di palei 19/5, xa Khánh Bình, tinh Ca Mau hu salah blaoh. Ong Viet biak bui sambai hatai tuk hu daok dalam sang bahrau:

"Bui sambai biak lo, sang danaok hu salah blaoh uan tabuan ndih oh hu. Harei hajan, dahlak hulin maong tagok pabung sang hu tanjaoh ia halei min oh hu, gheih biak lo. Dahlak hulin mboh bruk sangka baoh sang mbang tui sarak hu karja palei caik hatai kuhria. Mai tanyi ravang, saong brei jien daong tuk halei jeng ginup, dil samu. Jeng mboh bui sambai ka bruk nan”.

Ong Viet oh lac sa janih tui daong bruk katmang blaoh daok duh ame urang liet si di drei. Gam tui 6 cong taneh hamu, baoh sang urang bol lin meng kal thun ini tal umo taha rilo thun tapa, oh ka padang baoh sang oh daok karo kajap. Bruk caong khin di baoh sang ong hu ngak salah blaoh tuk hu bruk daong padang sang dalam danak dak brei abih baoh sang oh daok taik tahak.

Thuong binh, urang politik daok guk meng dalau yau ye Muk Nguyễn Huỳnh Diễm, daok di puk palei Kinh Hội, xa Khánh Bình, tinh Ca Mau oh padauk hu hatai bui sambai tuk hu daok di dalam sang bahrau. Amuk Diễm brei thau, dom thun tapa daong ka katmang dalam jaman mesuh metak caik gilac ka amuk rilo khut khat di rup pabhap. Bruk ngak bui sambai ka amuk lac bruk karja pok meyaom, alin huan chuong Bol lin Peih Paha lek pakat ka Sa, ka Dua, dan ka Klau.

Pasang di amuk Diễm hu klak rup daong bruk katmang saong plang lahik. Urang bol lin kamei ngak biet dong dahlau daih urak ini daok dalam sang oh daok tanje caga jaleih karo kajap, di angaok taneh njauk brei panduan tapen jalan Tắc Thù – Sông Đốc. Meng bruk nan, karja palei hu ba amuk tame angan urang hu mbang tui sarak karja hu daong sang daok bahrau dalam danak dak brei oh daok baoh sang taik tahak. Tui amuk Diễm, bruk ini dak brei mboh ka bruk maong mboh dom bruk rik daong di diuk pasang amuk:

"Anai Diem saong pasang klak rup ba drei tame mesuh taong khamang, pasang ngak pan akaok gah bol lin, daok anai ngak bruk gah biet dong. Meng nan ngak bruk njauk hukum, blaoh njauk urang pato tacei nan njauk khamang mek kareik, taong paoh kateik gaeik. Tal tuk peih paha, tuk bol lin drei tame mai anai meng hu palao tabiak”.

Di dom xa Khánh Bình, Đá Bạc, Sông Đốc, Trần Văn Thời saong Khánh Hưng, tinh Ca Mau, taong abih hu 202 baoh sang di dalam sarak karja brei angan urang daong katmang meng kal hu padang bahrau saong pasiam. Langiu di bruk daong sang daok, dom danak dak sangka ka urang daong klak rup daong bruk katmang meng kal saong urang dalam sang dom urang nan jeng hu xa sangka daong ngak. Dalam nan hu lac, karja palei daok brei kein lagaih ka dom baoh sang urang daong bruk katmang meng kal hu jalan ngak bruk ngak mbang siam lagaih, daong dom urang nan uak drei patagok, tani tanat raidiuk suai atah. Ong Phạm Quốc Trận, urang jakar xa Khánh Bình brei thau:

"Hadei di tuk ngak salah blaoh bruk daong brei abih baoh sang oh daok taik tahak, xa patui bruk sangka, pasang duah baoh sang mbang tui sarak gaok kan kandah piah daong. Khol dahlak hulin jak ba gah ngak pahla, jeng yau likau sarak tagok pakat glaong piah hu dom bruk daong lagaih, daong mikva tani tanat dalam raidiuk. Tal tuk ini, meng dom sarak di Ndang, Karja, dom baoh sang mbang tui sarak dalam tinh dahlau abih hu khik kajap raidiuk”.

Ong Nguyễn Vĩnh Thành, Phaok Bi thu Ndang uy xa Khánh Hưng, brei thau:

"Dalam bruk brei oh daok baoh sang taik tahak, khol dahlak hulin jeng kuhria daong ka dom baoh sang uak drei patagok. Pagap yau khin hu anek pajaih atau bruk halei gheih lagaih haong baoh sang, meda patagok hu ye tacei ba bruk ngak piah parilo jien mek tame, piah daong baoh sang, uak drei tagok patruh kathaot karo kajap”.

Tal ini, tinh Ca Mau klak, hu ngak salah blaoh Danak dak brei oh daok baoh sang taik tahak brei ka 4.400 baoh sang. Tanut daong padang sang lac 60 trieu dong/baoh sang ngan haong bruk padang bahrau saong 30 trieu dong/baoh sang ngan haong bruk pasiam. Dalam nan, hu 1.147 bruk daong ka urang hu daong bruk katmang meng kal. Daok jien piah ngak bruk brei abih baoh sang oh daok taik tahak ka urang daong bruk ngak katmang meng kal lac jaik 53 ty dong meng kadung jien Karja./.