Kadha di urang ngak di rayo hu taduon mek di xa U Minh, tinh Ca Mau, Pasak Duh bruk karja di xa sit ganik. Bruk ini, ba tal kan kandah oh lac ka labik ngak bruk di urang jakar, urang langyah harak gar daok biak kurang blaoh labik dhua ka rahra mai ngak harak gar jeng oh biak laneing lanoi. Ong Phạm Văn Chuột, Phaok Akaok UB Bhap bini xa U Minh jeng taduan ka bruk ini, UB Bhap bini xa daok gaok kan labik danaok brei ngak bruk hadei pagam. Ong Chuột brei thau lac:

"Hu dom labik ngak bruk urang jakar bahrau pandar ngak bruk daok brei hu tukvak piah ka bhian randap, pataom ilamo. Labik bruk ngak di pakat xa hu rilo paje, dalam tukvak akaok di bruk karja bahrau daok biak kateik geik kayua brei langyah bruk daok kandaong saong bruk bahrau karei." 

Sa di dalam dom bruk kan kandah karei di xa U Minh daok gaok lac oh ka hu bruk samu dreih gauk dalam langyah bruk karja. Yau dalam gah taneh riya: ngan haong harak gar pabak Harak mbaoh tangin brei pandar taneh riya mbang akaok meti, harak pagun sanya di angaok majam Jitvu karja pakat negar lac 20 harei ngak bruk. Min, tukvak ini oh ka kuhria tal 15 harei niem yet saong 5 harei salih jien je. Bruk ini ba tal bruk suai jang dut haong tukvak pagun sanya lac oh plaih hu.

Dalam bruk ngak sarak daong jien ndam matai lahik brei ka bol lin meng kal, pabah mbang jitvu karja pakat negar oh ka pambuak samu gauk, bruk pabak harak gar brei ngak isi dalam compute sa pabah bambang di xa, lahik rilo tukvak.

Bruk langyah harak gar daong ka urang padeih huu tri ka urang umo labaih 75 thun rah tabiak bruk biak rilo oh duh tal, kayua urang buh harak gar rilo; lac dom urang praong thun saong rilo meng lac oh ka hu angan tai khoan VneID tanut 2, dalam tuk tok hu sa urang ngak bruk.

Dalam dom gah taneh riya, mbaoh tangin, harak gar biak rilo xa khik kajap langyah dil samu brei ka rahra, min oh hu ginup tukvak piah taduan abih angaok phan mem… Ong Phạm văn Chuột, Phaok Akaok UB Bhap bini xa U Minh brei thau:

"Ba tagok panuac ndom, pakat angaok brei jhul khang bruk pato pakai, pabak ilamo kapul urang jakar, urang pan akaok jabat karja, abih di nyu nan lac pakat xa. Brei hu sarak dui pachreih urang naih joi ka bruk ngak di labik. Gam di nan, khik kajap jien padai saong co so vat chat ka karja bhum palei."

Di xa Thanh Tùng, yaom lac hu taong yaom glaong ka bruk langyah harak gar karja min jeng gaok dom tavak oh ta-eng drei langyah hu. Ong Mai Việt Triều, Akaok UB Bhap bini xa Thanh Tùng mek pagap yau ka bruk kan kandah dalam pabak harak khan menek anek. Dom urang hu pabak harak khan menek anek meng thun 2010 ba nao meng dahlau oh hu thun ndih tapui di amaik ame dalam harak khan menek. Dalam tuk harak gar nao ngak bruk di langiu negar, brei ka hu thun menek di amaik ame dalam harak gar khan menek. Bruk ini ngak kan kandah ka rahra min oh ka hu tacei ba cambaih laih halei piah pasiam bruk.

Ong Triều jeng bau tal bruk kan kandah, karja xa bahrau taduan bruk ngak rilo jang rilo mbang, abih di nyu hu lac, likau karja brei duh rahra siam jang. Min, dalam langyah harak gar karja urak ini hu urang Akaok saong 2 Phaok Akaok UB Bhap bini bahrau hu bruk tut tangin langyah harak gar. Dalam tuk, pasak Duh bruk karja hu Phaok Yam ndok min oh hu tut tangin hu ka harak gar halei, bruk ini oh brei kein lagaih piah langyah harak gar karja samar abih ka rahra:

"Pasak Duh bruk karja di xa daok brei langyah 425 harak gar, hu harei langyah 100 harak gar min Phaok Akaok pasak ngak bruk karja oh hu tut tangin harak gar halei. Ba tabiak asal kadha, brei bruk piah tut tangin ka dom harak gar halei hu lei? Meyah Phaok Yam ndok pasak ngak bruk karja hu tut tangin ka dom harak gar ye biak hu kein lagaih ka pakat xa."

Dom asal kadha daok rah tabiak di dom xa bahrau di tinh Ca Mau brei mboh, piah salih bahrau harak gar karja biak siam lagaih, brei hu bruk samu gauk meng sarak, jalan ngak, tal bruk manuac urang, oh lac padeih di kham merat di pakat karja./.