Xa Sông Đéc lac sa baoh bhum palei hu ralo baoh gilai taong mek ikan di abih dalam tinh Ca Mau, hu labaih 1.100 sruh. Dom harei tapa, 6 kapul ngak bruk di xa tabiak pasang iek taong abih kapul gilai dalam bhum piah samar chip ngak lek taka so.

Dom kapul ngak bruk mai gaok tapak po gilai piah taduan khau tin. Bruk hu makna jang, pandar mek thaik hu cambaih laih harei saong tukvak piah cuak thaik gilai ikan, pabak tagok phan mem di tinh. Gam tui dom baoh kapal gilai taong ikan oh daok di bhum palei, ye pambuak haong puk palei padang tabiak harak taduan saong jeng ba harak tagok jamraik phan mem piah pasang iek.

Yaom lac peih ngak catang min urak ini gah bhum palei daok gaok som kan kandah. Ong Nguyễn Văn Thức, urang jakar pan bruk ngak lek taka brei thau:

Xa rabha bruk ka yaok kapul nao ngak bruk pasang iek. Jaik di ini, ngak 2 mbang tabung glaong, bhum palei ngak catang mek hu jak jeng siam, taphia nan daok hu dom kan kandah. Hu gilai nao pablei di langiu tinh, oh thau labik di urang blei, gilai saong po gilai jeng oh doak di bhum palei. Oh hu po gilai di dalam bhum nan bruk ngak lek taka kan ngak hu tui hatai caong di tinh.

Dalam bruk ngak lek taka haong bruk pasang iek gilai ikan, xa Sông Đốc sangka iek praong bruk pasang dom gilai atah meng 15m ba tagok, kayua ini lac dom gilai nao tabiak kulidung, mbuan tame suan bhum tasik negar langiu. Gam haong nan, dom kapul ngak bruk jeng patui veik pathau khan piah urang nao tasik thau tani tanat jang ka bruk ngak IUU, daong taoh talaih “kat kanyik”. Ong Lê Ngọc Quang, daok di puk palei 6A, xa Sông Đốc, tinh Ca Mau brei thau:

Meng tuk Rajaei pato tacei taoh talaih kat kanyik ye rilo meng lac rahra oh ngak tui abih. Urak ini dom jabat, dom gah tame bruk biak catang, urang nao tasik oh khin ngak suan. Dahlak hu 4 sruh bo urak ini brei ngak 1 sruh piah khik bruk min.

Dom labik daok di xa bhum tapen tasik tinh Ca Mau jeng daok patagok bruk ngak lek taka gilai taong ikan tui jalan yau di xa Sông Đốc. Hadei tuk harak gal ngak lek taka bhum palei pabak tagok phan mem, jabat pasang iek chuyen nganh di tinh Ca Mau brei pabak tame harak gal yaok gilai piah pasang iek, piah mbaoh tangin ka bruk ngak jeng, daok dom sruh gilai oh ka hu ginup kein lagaih hu bayar mai ka xa piah patui veik pabak harak gal.

Langiu di kapul urang jakar di dom xa, dom balai Bien phong di dom pabah lamnge tasik jeng daok kham merat, daong bruk pasang iek kapul gilai. Dai uy Lê Ngọc Giàu, akaok Balai pasang iek Bien phong Rạch Tàu, balai bien phong xa Đất Mũi Ca Mau brei thau:

Balai pasang iek bien phong bhian khik catang bruk pasang iek tani tanat dom sruh gilai, rilo meng lac bruk thau ka bruk rah tabiak di bhum palei saong angaok tasik. Ngan haong dom sruh gilai sit, kol dahlak hulin ngak tabiak harak angan piah pasang iek tal yaok baoh sang. Dom sruh gilai atah meng 12 tal 15m jeng ngak bruk tut angan, pasang iek catang tui adat hukum. Gam tui dom sruh gilai atah meng 15m ba tagok, dom sruh gilai ngak bruk halan nyuel rilo harei di angaok tasik ye brei caik dahlau ka bruk pasang iek.

Dalam tinh Ca Mau hu 5.230 gilai ikan daok nduac, dalam nan hu 1.942 gilai hu atah meng 15 m ba tagok saong jeng hu pagam ndap nda pasang iek gilai ikan tui adat. Langiu bruk pasang iek gilai taong ikan, tinh Ca Mau jeng daok jhul khang bruk pasang iek ikan hadang hu taong mek meng halei mai, taong bhat dom bruk ngak suan saong pathau khan piah paglaong ilamo di mikva urang nao tasik./.