Dom harei ini, di grauk jalan dalam xa Đăk Ngọk, huyen Đăk Hà, tinh Kon Tum pak halei jeng tuel hala dok bangu. Dahlau di raya Tet, Ndang bo xa Đăk Ngọk hu peih ngak jak jeng Harei Nyaom raya di urang lambaok vakil mbang ka III, tukvak 2025-2030. Ini lac bruk chinh tri hu angan makna oh lac brei ka 239 urang ndang blaoh daok brei mboh hatai je, hatai caong takre di jaik 5.000 urang rahra bhap bini di dalam xa. Ong Lê Văn Y, palei Đăk Tin, ndom mayai lac:

“Thun 2013 harei akaok bahrau padang xa Đăk Ngọk mikva daok rilo kan kandah, jalan mbak nao mai daok gluh baok ngak kan kandah biak rilo tal raidiuk, bruk ngak mbang di bol bhap rahra. Tapa labaih 10 thun padang saong patagok haong kapul urang dang akaok sa hatai, gul pataom xa Đăk Ngọk urak ini hu patagok khang. Urak ini xa hu ngak salah blaoh ginup 19/19 asal kadha brei ka palei ngak nong bahrau saong raidiuk di mikva urak ini biak chreih chrai bui sambai”.

Dalam tukvak ngak bruk meng blaoh, 12 chi bo haong 239 urang ndang di xa Đăk Ngọk tuk halei jeng nao dahlau dalam bruk patagok kinh te – xa hoi paglaong raidiuk rahra. Tal ini 4/7 palei hu mbaoh tangin brei angan palei ngak nong bahrau piah brei pasang, 2 palei hu brei angan palei nong palei bahrau di bhum urang bangsa takik. Dalam xa urak ini daok kandaong 8 baoh sang kathaot. Ong A Xen, urang bangsa tộc Xơ Đăng, daok di palei Đăk Kđem, brei thau:    

“Dahlau daih palei jeng daok kan kandah rilo, meng 2 thun ini ye  rahra hu patagok ilamo salih phun pala, athur raong. Ralo mikva ngak padai ia saong pala kaphe. Jeng meng hu hatai sangka di Ndang, karja tal rahra nan urak ini hu uak drei tagok”.

Tukvak ngak bruk meng blaoh, dalam 26 tanut ba tabiak xa Đăk Ngọk salah blaoh rilo tanut ba tabiak hu makna mek hu jak jeng naih gheih, yau ye: jien mek tame kuhria tui akaok menuac hu labaih 70 trieu dong, padang xa njauk tanut chuan palei ngak nong bahrau; trun kathaot samar drah. Ong Phan Tiến Dũng, gam Bi thu Chi bo gam Akaok mbang ngak bruk Mat tran palei Đăk Bình, brei thau ilamo padang palei palei ngak nong bahrau brei pasang ieik:

“Chi bo pan akaok meng sarak yaok bilan. Dakvah jak ba mikva ngak ginup dom tanut ba tabiak. 19 asal kadha urak ini mek hu blaoh saong kol dahlak hulin hu jeng sa palei ngak nong bahrau piah pasang hu UB Bhap bini huyen mbaoh tangin. Meng sa palei rilo meng lac ngak nong meng akaok tukvak ngak bruk tok 55 trieu dong/urang tal abih tukvak ngak bruk jaik 80 trieu dong/urang. Ngan haong kham merat di sa he thong chinh tri ba mai trei sir haniem phol sampurna brei ka rahra”.

Salih akaok sahaneng dalam bruk ngak mbang di rahra hu ngak jeng prein diuk rai bahrau ka palei ngak nong Đăk Ngọk. Xa padang hu 6 kapul pambuak bruk saong 2 hop tac xa. Bruk patagok kinh te kapul hu daong paglaong bruk yuak kuak, yaom kaom di labaih 450ha padai, labaih 1.600 ha kaphe gam haong yaok rituh ha phun mbang baoh saong phun ngak jru. Amuk Y Sương, Phaok Bi thu Ndang uy, akaok UB Bhap bini xa Đăk Ngọk, brei thau:

“Ndang bo pato tacei dom gah, ndoan the meng dom danak dak, jalan ngak cambaih laih piah ngak yaok thun saong yaok mbang tukvak. Khol dahlak hulin jak ba rahra dalam bhum palei hu mbaok tame dalam bruk padang palei ngak nong bahrau. Pataom tame dom bruk ngak, jalan langyah piah patagok kinh te, xa hoi, an ninh quoc phong saong padang danak dak politik dalam labik xa. Sangka ka bruk daok dang mbang ngui, ka bangsa agama ka yau gauk saong karo tani tanat”.

Tui sahatai jalan kham merat ngak brei samar drah patagok kinh te karo kajap, Nyaom raya dom urang lambaok vakil urang di Ndang bo xa Đăk Ngọk tukvak 2025-2030 mboh lac, padang xa njauk tanut chuan palei palei ngak nong bahrau piah pasang, jien mek tame kuhria tui akaok menuac hu labaih 78 trieu dong/thun… piah oh padeih bruk pok glaong raidiuk rahra./.