Palei ngak ahar keo yau tui meng kal di phuong Ô Môn, ban raya Can Tho hu padang jeng meng yaok pluh thun dahlau mai, jeng sa labik hu angan di bhum palei. Langiu di khik ramik ilamo bhap bini, bruk ngak tabiak kaya daok brei bruk ngak ka rilo baoh sang, rilo meng lac urang ngak bruk ban ngak.

Kongti TNHH ngak mbang pablei salih Liên Hưng Viet Nam ngak gah ahar keo meng kal, kaya ndap nda di nyu hu mbaok di rilo tinh, ban dalam negar. Kongti brei bruk ngak ka yaok pluh urang ngak bruk hu jien mek tame meng 7-12 trieu ndong /bilan. Min tapi, dalam tuk meraik gauk saong ba drei tame, gah ngak mbang pablei salih dang anak caong khin brei salih bahrau taong abih. Ong Lê Công Tuấn yam ndok kongti brei thau, gam saong bruk daong meng karja palei hu daong dom labik ngak mbang hu patagok, daong khik ramik saong patagok yaom kaom palei ngak bruk meng kal:

"Kongti ngak ahar keo tui yau meng kal dalam dom thun tapa kaya di drei hu dom darak pasar, jeng yau dalam negar. Talei majam ngak tabiak kaya kan di drei jeng khin paglaong pakat di nyu min jeng brei hu daong piah hu lagaih ye drei paglaong pakat di nyu, majam talei ngak kaya kal, ngak tabiak ralo jang".

Di Kongti TNHH ngak ahar keo Liên Anh, sa-ai Bành Thanh Trúc brei thau, dalam tukvak dahlau akaok meti salih meng baoh sang ngak mbang palei salih sit tagok ngak mbang praong, labik ngak gaok oh takik kan kandah, dalam nan njauk ndom mayai lac dalam bruk ngak dom jalan ngak, dom harak gal. Min, gah ngak mbang pablei salih dak harei dak siam saong ngak tui dom adat taka di Karja. Urak ini, labik ngak pataom tame ngak dom kaya bhap bini yau ye ahar sop, ahar kep paplah, pablei hu di darak pasar dalam negar. Sa-ai Trúc brei thau:

"Padang kongti kan di abih mai meng harak pablei nyu, min bo tal urak ini rah rah jeng ngak hu, tuai damuai jeng njauk ngak tui, kayua adat sarak di karja ka harak gal pablei tabiak brei hu ka tantu, rah rah lavik nao jeng njauk ngak tui min. Ngak tabiak ahar sop, ahar plah kep, ahar gai sriang que, darak pasar dalam negar, bhian urak ini jamraik meblah labaih 70%, urang ngak kong labaih 30%".

Anak mata mboh rilo labik, gah ngak mbang pablei salih ngak ahar keo yau meng kal di phuong Ô Môn jeng daok dalam tukvak salih drei, brei hu tukvak masa saong bruk daong piah dak harei dak pambuak dom pablei hadah krah bahrau, pamaong iek tal jalan patagok karo kajap.

Ong Châu Việt Tha, Bi thu Ndang uy phuong Ô Môn brei thau, jalan ngak ba tabiak, tal thun 2030, phuong Ô Môn kham merat hu labaih 550 gah ngak mbang pablei salih ta-eng drei gam haong tukvak masa cakrok kuhria rah tapa labaih 10% dalam sa thun. Piah mek hu tanut di akaok mbram, phuong pataom tame bruk pasang iek, daong dom baoh sang pablei salih hu kein lagaih salih tagok gah ngak mbang pablei salih, daong dom baoh sang ngak mbang hu kein lagaih ka phun jien mesraiy, sarak jien kak je:

"Phuong jeng pataom tame ngak tantu meng sa Sarak patagok kinh te ta-eng menuac urang, pataom tame catang piah mek hu jalan ngak ba tabiak, meng bruk daong patagok yaom kaom ngak tabiak gah ngak kong, pablei kaya gah ngak kong, pablei salih jitvu dalam bhum, tapa di nan jeng daong ban raya paglaong hu tanut cak rok dua baoh lek taka angka di ban raya Can Tho".

Tui tapak jalan nao cambaih laih, gam haong bruk pambuak khik ramik palei ngak bruk meng kal saong pandar salih lek taka so, labik kinh te ta-eng menuac urang di phuong Ô Môn hu caong khin brei daong prein karo kajap. Langiu di nan, daok daong parilo jien mek tame, brei bruk ngak tani tanat ka rahra bhap bini, saong daong jhul tagok bruk salih kinh te, daong siam lagaih tame bruk patagok di ban raya Can Tho./.