Meng bruk raong areing tui jalan ngak yau meng kan dahlau di drei, ong Lê Mai Tùng, Yam ndok Kongti TNHH Seamorny (Dong Nai), daok dak harei dak “lap trinh” bruk raong meng ilamo barau tui glao akaok ilamu anek manuac. Bruk raong dalam dawang daong pasang iek taong abih ia danao, dinh duong saong tukvak patagok meng cam bien, phan mem. Tui di nan, bruk ngak hu tagok khang: 2.000 drei areing brei ka 1 urang ngak, salih ka 3 urang ka 1.000 drei yau dahlau.

Ngak hu ngak jeng oh sa janih lac di jien buh tabiak blaoh daok lac bruk hadiuk. Meyah raong areing bhian ye nyu barau mek hu labaih 10%, bruk raong tui kan dahlau 40%, ye pandar AI paglaong bruk hadiuk tagaok labaih 90%. Khut khat trun, yaom kaom bien, gok raba tagok cambaih laih. Ini hu maong lac jalan nao salih meng bruk ngak mbang tui ilamo tapa ngak mbang tui baoh kadha du lieu, peih tabiak lagaih praong ka gah ngak nong ilamo kong nghe glaong. Ong Lê Mai Tùng ndom mayai lac:

“Mboh sa janih raong dalam labik pasang iek glang sanang, patakik jit ruak saong caga ruak, ye meng pabak hu hattai caong pasang iek glang sahnang di darak pasar dunya. Tuk pablei tabiak hu, yaom kaom ndap nda jeng glaong jang dut haong pablei dalam negar”.

Di gah pala drak, meng bruk Viet Nam brei blei tame kruac aik kanyik hu yaom glaong, ong Nguyễn Văn Hiển, Akaok HĐQT Kongti CP Pablei salih saong Buh jien tame Kruac Aik Viet, hu buh jien tame roh duah, hlai pabam pajaih kruac aik kanyik oh hu asar di tinh Tay Ninh. Di taneh labaih 100 ha, gah ngak mbang pablei salih pandar ilamo kong nghe lek taka so saong AI piah pasang iek taong abih luac jalan ngak mbang. Majam IoT tui iek tanut tathah, dinh duong, pandiak la-an; du lieu hu langyah piah patakik ia tuh, khak drak njauk lagaih. Meng nan, jien buh tabiak ngak hu patrun, kaya ngak hu tani tanat, asar baoh karaoh siam samu gauk:

“Tinh Tay Ninh saong So Ilamo Khoa hoc saong Kong nghe daok daong khol dahlak roh duah, pandar majam jak krah dalam ngak nong, cambaih laih lac di bein kruac aik kanyik. Patui di nan, urang ngak nong saong gah ngak mbang pablei salih dak harei dak ngak bahrau bruk ngak mbang tui cara salih lek taka so saong pandar dom majam ngak hadah krah, lagaih haong jaman urak ini.”

Dahlau ieu lac sa urang nao tagok meng pala phun tabau – ong Nguyễn Quang Huy, Yam ndok Kongti TNHH Huy Long An khan kadha luac jalan salih drei di bhum pala patei Tay Ninh saong Ban raya Ho Chi Minh meng bruk ngak meng tangin tapa pasang khik quản trị.

Bruk salih bahrau meng tuk ong pambuak haong darak pasar Japan, labik oh sa janih blei kaya blaoh blei sa luac jalan ngak. Meng dom blah harak cih vak yaok harei caik di paban ka urang pambuak bruk maong iek, gah ngak mbang dak harei dak salih tapa harak cih vak yaok harei meng ndien tu, ngak lek taka so ka yaok lo patei. Yaok bruk ngak, meng bruk drak khak, bruk urang ngak tal bruk jien buh tabiak ngak, jeng hu ba tagok saong khik piah. “Oh daok ngak tui hatai sahaneng, njauk brei hu baoh kadha du lieu ndom meyai”. “Patao patei” Huy Long An thau lac, salih lek taka so oh lac palih ruah blaoh daok lac bruk njauk ngak. Ong Huy ndom meyai lac:

"Tal ini, dahlak hu thau ka salih lek taka so, yaok lo patei meda kuhria cambaih jien buh tabiak ka khak drak, pajaih saong dom paok jien buh tame karei, khol dahlak brei kuhria tabiak njauk jang piah kein lagaih brei ka bruk ngak mbang, patak pataom jien buh tabiak saong pasang iek yaom kaom siam jang. Ini lac jalan nao hu rilo caong takre.”

Meng raong glang tal pala drak ilamo kong nghe daok dak harei dak nao tame lagaih brei ka ngak mbang. Yaom lac daok kan kandah, min tuk mboh siam lagaih cambaih laih, urang ngak nong saong gah ngak mbang pablei salih jeng dak harei dak parandap, patak pataom baoh kadha du lieu piah ngak siam jang jeng ye pablei hu yaom glaong jang./.