Dalam tuk darak pasar pablei tabiak langiu nagar daok rilo kan kandah, darak pasar UAE hu rilo gah ngak mbang pablei salih taong yaom biak kein lagaih, rilo meng lac hiep dinh CEPA hu pandar. Kayua Trung Dong brei blei tame meng 85-90% hatai caong kaya mbang, ini lac lagaih siam brei ka gah ngak mbang pablei salih di nagar Viet Nam hu kaya kan mbang Halal piah pablei tabiak darak pasar ini.

Ong Võ Tuấn Anh, Phaok Yam ndok Xuc tien thuong mai Kongti Ban Me Gold brei thau tuk pablei tabiak darak pasar UAE, jien kak je lap 0% ka kaya ngak nong, kaya mbang ieu lac sa janih kangui kein lagaih brei ka gah ngak mbang pablei salih tuk jien buh tabiak ngak, pablei salih daok dak harei dak tagok. Piah thau ka kein lagaih ini, gah ngak mbang pablei salih hu nao dahlau sa yam, dom kaya kan yau ye kophi pablei tabiak langiu negar hu harak mbaoh tangin brei angan Halal pablei tabiak dom darak pasar jaik taphia yau ye: nagar Malaysia, Korea, Thailan... Ini jeng lac jalan ngak iek dahlau tuk pablei tapa Trung Dong. Urak ini yaok bilan gah ngak mbang pablei salih ini pablei tabiak 500 tan kopi tapung brai, kophi bambu thu la-an, kophi phin ba-ar…  dom darak pasar nan saong pablei dalam negar.

Gah ngak mbang pablei salih jeng daok padang sang mac bahrau praong 1 ha di xa Tam An (huyen Long Đất, tinh Ba Ria - Vung Tau klak) ngak tui tanut chuan hacih hijao, hu harak brei angan Halal piah pablei tabiak dom janih kaya yau ye kaya kophi, baoh kayau bambu thu laman, asar baoh kayau… labik Trung Dong tukvak anak tal. Ong Võ Tuấn Anh brei thau:

“Khol akau dahlak hu ba kaya ndap nda brei ka urang vakil ka gah ngak mbang blei salih pakat nagar di Trung Dong brei prai parang iek. Patui di nan khol dahlak akau brei padang sang mac hu ginup tanut hacih sa-at, hijao that, njauk dom tanut Halal tui caong khin di gah nan. Darak pasar Halal di Trung Dong ye tuai damuai sangka rilo ndap nda kophi di Viet Nam. Meyah gah ngak mbang pabak kaya tapa Trung Dong, dom gah pablei meda pablei tapa dom negar dalam dunya Yau nan lac sa kein lagaih tuk khol dahlak pablei ka tuai damuai di Trung Dong, rilo di abih hu lac darak pasar Halal.”

Amuk Nguyễn Thị Ngọc Hằng, Yam ndok Marketing Jabat mbaoh tangin Halal Viet Nam (HCA VN) brei thau, kan kandah praong di abih hu lac bruk rilo tanut chuan di dom darak pasar daok huac kanda. Kayua nan, tuk tame darak pasar ini, gah ngak mbang pablei salih brei hu dom jalan ngak tani tanat, duah thau khau tin palih ruah tanut chuan jeng yau hu palih ruah hu kapul mbaoh tangin njauk lagaih tui hukum halal.

“Tuk palih ruah darak pasar ye khol drei brei pambuak haong daom labik brei angan Halal hu mbaoh tangin piah gah nan meda hu tacei ba tantu cambaih laih. Tantu cambaih laih di HCA Viet Nam lac kapul hu mbaoh tangin di taong abih dom negar Islam. Khol dahlak hu tacei ba ka gah ngak mbang pablei salih tantu cambaih laih tuk padang Halal atau pambuak ka dom gah ngak mbang pablei salih duah dom gah pabak dom pandap tamo njauk lagaih, jeng yau tacei ba gah ngak mbang pablei salih piah gah ngak mbang pablei salih meda pabak dom tanut chuan saong pandar ka sang mac di drei.”

Amuk Lý Kim Chi, Akaok Kapul Kaya mbang Ban raya Ho Chi Minh ndom lac, ngak kaya mbang ka darak pasar Halal ngan haong gah ngak mbang pablei salih oh lac oh ngak hu. Min piah ka kaya njauk caong khin ye gah ngak mbang pablei salih brei pabak yaok tanut chuan, adat hukum brei di Halal, kayua nan, biak khin hu daong di dom jabat, dom mentri, dom gah chuc nang ka asal kadha ini.

“Dom kein lagaih urak ini di Viet Nam daok hu, yau meng blaoh Kapul kaya mbang hu pambuak haong dom lãnh sự Malaysia saong dom negar hu urang Islam peih bruk bac pasram, klah rabha… brei ka gah ngak mbang pablei salih. Gah nan hu dom jabat lambaok di Viet Nam piah pabak harak mbaoh tangin brei Halal. Dahlak hulin sahaneng lac dom gah ngak mbang pablei salih Viet Nam meyah khin ngak kaya Halal jeng meda ngak hu.”

Darak pasar Halal biak hu makna saong rilo kein lagaih, oh lac darak pasar ganik katiar. Piah ka gah ngak mbang pablei salih, yam takai tame darak pasar jeng ye cakrok patagok dalam bruk pablei tabiak ye brei hu bruk srap gap tani tanat, tantu, atah yava saong pabak dom caong khin. Meyah cang hu kaya kakei blei meng ngak ye gah ngak mbang pablei salih gaok kan kandah, mbuan ngak lahik kein lagaih./.