Di Kongti QH Plus, phuong Phú Mỹ (daok di tinh Ba Ria – Vung Tau klak), rilo urang ngak bruk di gah ngak mbang pablei salih lac urang tame mai daok meng dom tinh Barak, bhum Kreh nagar saong Tay Nguyen, dalam nan hu labaih 70% oh ka hu labik daok karo tani tanat.

Tukvak baloh tapa, Kong ndoan kongti hu kham merat pambuak, khau tin tal urang ngak bruk ka dom sarak sang daok rahra, sang daok ka urang hu jien mek tame biar. Min, rilo oh mek hu kayua jien buh tabiak oh truh tui kadung jien bayar di urang.

Sa-ai Nguyễn Trọng Hà, urang ngak kongti brei thau: dom urang ngak kong yau sa-ai caong khin hu sa baoh sang danaok daok piah patakik jang jien pah sang daok, daong tani tanat dalam raidiuk. Kayua yau nan, danak dak “Hu sang daok karo gam haong urang ngak bruk” kayua Kapul Ngak bruk Ban raya Ho Chi Minh peih ngak biak lagaih gam saong kadung jien mek tame urak ini di urang ngak kong:

“Mboh biak di nyu hu lac sang daok rahra xahoi jeng daok biak glaong dut tui jien duah hu di urang ngak kong urak ini. “Sang daok karo gam haong urang ngak bruk” biak njauk lagaih, taneh urang ngak bruk khin hu labaih meng 80 tal 120m2 yaok baoh sang. Piah daong urang ngak kong, danak dak daok daong urang ngak bruk mesraiy jien gilang pariak dui atah meng 5-10 thun, meng mbuan ka drei bayar.”

Danak dak “Sang daok karo ka urang ngak” hu mbaok di dom gah ngak mbang pablei salih di rilo gah karei di gauk yau ye: taneh, padang – thiet ke, ngak sang, kaya padang sang…, gam saong jalan ngak lac jalan langyah sang daok ka urang ngak bruk hu jien mek tame biar. Danak dak oh jak ba phun jien, oh pablei danak dak ngak jeng dalam harei hadei. Urang ngak kong, urang hu jien mek tame biar daok hu daong jien padang sang saong phun jien hu mesraiy meng gilang pariak.

Ong Nguyễn Phú Quý, Tong yam ndok Kongti TNHH Phát Anh Hào (Ban raya Ho Chi Minh) brei thau, gah ngak mbang pablei salih hu labaih 100 ha taneh dalam bhum Ba Ria – Vung Tau klak, janlan mbak sron mbon samu gauk gam haong labaih 1.000 harak bhong hu brei angan taneh piah daok.

Tui ong Quy, piah ka ndap nda mai tal njauk urang ngak, urang ngak kong hu jien mek tame biar, gaok kan kandah ka sang daok, harak angan urang hu mbaok tame kayua Kapul Lien đoan Ngak bruk ban raya pambuak haong karja palei pilih ruah, ngak tantu:

“Harak angan 10 urang ngak bruk blaoh khol akau dahlak taduan meng Kapul Ngak bruk brei tapa palih ruah, pasang iek hu njauk urang ngak kong ha oh. Gah ngak mbang pablei salih patakik dom jien akaok tame, kein laba bahrau hu 10% oh khin hu bruk ini rah tabiak, pandar “urang ganyuk” bluh yaom blaoh hadei pablei gilac ka urang ngak bruk. Khol dahlak hu kuhria tal bruk ini paje”.

Ong Nguyễn Thành Đô, Yam ndok Pasak langyah hukum nagar, Kapul Ngak bruk Ban raya Ho Chi Minh brei thau, tukvak blaoh tapa, Kapul Ngak bruk ban raya hu pambuak haong gah ngak mbang pablei salih piah ngak sang daok rahra ka urang ngak bruk, kong ndoan hu mbaok pasang iek ka urang, dalam nan hu danak dak “Sang daok karo gam haong urang ngak bruk”, piah brei kein lagaih ka urang ngak kong thau ka hukum tuk blei sang daok, plaih kan kandah, dom danak dak “ja lau”, danak dak oh hu ginup kein lagaih. Ong Đô brei thau veik:

“Kong ndoan ban raya hu mbaok pasang iek hulum nagar, khik kajap luac jalan ngak njauk paguon sinya, dalam nan hu sarak daong lagaih di karja, khik kajap oh patagok jien dalam tukvak masa mbaoh tangin janji saong gauk. Langiu di nan, Kapul Lien doan Ngak bruk ban raya jeng pambuak haong rilo gah karei piah peih ngak dom danak dak sangka ka urang ngak, dalam nan hu urang pah sang daok piah daong dom urang paglaong raidiuk.”

Danak dak “Sang danaok daok karo ka urang ngak” hu caong takre jeng talei pambuak siam lagaih di hatai caong khin hu sang danaok daok karo di urang ngak gam saong prein daong meng gah ngak mbang pablei salih saong bhap bini rahra. Tuk hu bruk daong di dom gah, gam haong bruk pasang iek di Kapul Lien doan Ngak bruk saong karja Ban raya Ho Chi Minh, kadha katih sameng kuria brei ka sang daok urang ngak kong brei hu dak harei dak hu taoh talaih, caong khin tal jalan ngak tani tanat raidiuk saong pambuak pagam suai atah di kapul ngak bruk./.