Tui ong Huỳnh Văn Hoảnh – Yam ndok Hop tac xa Tân Thới 1, xa Phong Điền, Hop tac xa hu jaik 60 urang, pala jaik 40ha durian. Dom thun dahlau paik durian pablei ka urang ngak mbang blei salih pablei tabiak, dom urang dalam Hop tac xa mek hu jien laba biak glaong. Min thun ini, bruk ngak tabiak saong pablei durian njuak gaok kan kandah.

“Hop tac xa di dahlak pablei ka dom gah ngak mbang pablei salih. Thun 2024 langiu di dom jien buh tabiak, hu urang meng hu jien meng 800-900 trieu/ha. Daok yau thun ini ye oh daok hu, sa di nyu kayua lac lahik bilan, dua ieu lac laik yaom. Pablei bahrau hu do meteh durian thun dahlau, yaom jeng trun daok meteh.”

Urak ini taneh pala durian di ban Can Tho hu tagok jaik 13.000 ha, dang di ka 3 dalam dom taneh pala phun mbang baoh di ban ini.

Meyah dahlau diah, phun durian ba mai kein laba yaok thun ka urang ngak nong di Can Tho meng 200-250 trieu dong/thun/ha ye jaik ini urang pala durian daok gaok kan kandah. Langiu di taneh pala tagok drah samar, darak pasar Trung Quoc dak harei dak catang jang ka khin caong asar siam, ka bruk pasang iek baoh kayau saong siam makre brei ka kaya mbang. Biak di nyu Can Tho jeng daok rilo taneh pala phun durian oh ka oh buh angan bhum pala, rilo meng lac dom taneh bahrau pala. Rilo urang ngak nong tui jalan ta-eng ngak, oh ka thau ilamo ky thuat saong jalan pala piah phun durian mek hu tanut pablei tabiak. Ong Bùi Văn Tùng – urang ngak nong pala durian di puk palei Nhơn Thọ 1A, xa Nhơn Ái ndom meyai lac:

“Kan ralo abih di nyu hu lac langik hajan, druh hala ye drei oh thau njauk brei tabiak tadai tuan tacei ba ka drei halei oh. Pagap yau pasiam baoh, taong ruak ka baoh ye brei tabiak tadai tuan tacei ba ka drei yaok tukvak. Drei maong ilamo halei njauk, halei oh ka njauk, drei mek hu ilamo di bruk nan, blaoh bac megru veik.”

Tui amuk Phạm Thị Minh Hiếu -  Akaok Chi kuk Pala drak saong Pacang khik phun kayau ban raya Can Tho, tukvak tapa Chi kuk hu pataom tame daong mikva padang angan taneh bhum pala, khau tin ka dom bruk pandar tanut njauk pablei tabiak di dom negar, tapa nan tacei ba mikva ngak jalan ngak mbang pala drak njauk adat hukum, njauk adat di darak pasar.

“Gah ngak nong dalam tukvak tapa jeng daok biak rilo tal bac pasram hu pambuak yau Kapul Urang ngak nong, aduk bilik kinh te, jabat ngak nong di dom quan, huyen dahlau diah piah hu daong, tacei ba mikva urang ngak nong dom jalan ngak mbang ye ndom ka tal tukvak ini jeng hu sa bruk salih bahrau hu mboh biak tantu cambaih laih ka ilamo, jeng yau lac bruk ngak di mikva urang ngak nong di angaok phun durian.”

Piah ka baoh durian mek hu tanut asar siam pablei tabiak, gah ngak nong Can Tho jeng daok daong rahra peih bruk pala durian tui jalan hu kuhria; patakik bruk ta-eng patagok, abih di nyu nan lac di dom bhum hu kei lagaih langik, taneh riya, ia pandar oh lagaih. Taphia nan, ngak bruk pasang iek yaok thun ngan haong dom bhum pala hu pabak lek taka so; ngak catang brei padeih atau mek gilac dom lek taka so bleik saleih, duac chung hukum nagar…/.