Mboh phun rabung prang hijao lagaih saong taneh cuah, Chi bo palei Katuh, xa Phước Dinh kham marat ba janih phun pala ini mai palei. Piah salih hu tanrekun meng lavik mai mikva urang bangsa Cam oh njauk lac bruk sa page ba harei.

Bi thu Chi bo palei Katuh, amuk Kiều Thị Khuê, umo 35 thun dahlau pato bac, hu gam haong kapul chi bo "tabak yaok jalan, tataok yaok baoh sang". Muk ba habih hatai, nao tal labik lakhah, labik pataom bui, piah pang piah dakvah.

‘’Sa-ai tui tukvak blaoh taduan mek bruk hit, gam song kapul urang ndang di Chi bo, dakvah jakba mikva tame HTX abih urang jeng ye urang ndang dalam Chi bo brei pambak praong tabiak mikva’’.

Mayah Chi bo ieu lac urang ba jalan, ye HTX Jitvu taong hop palei Katuh jeng labik paet pandia kajap, daong phun rabung prang pabrok gha jeng ye patagok karo di taneh ini. HTX oh sa janih daong pajaih, khak blaoh daok daong pato ba pala, iek glang tui tanut VietGAP. Dalam nan, HTX tut tangan pambuak harak blei ndap nda kaya saong urang blei salih, ngak yau habar brei yaom karo hu yaom glaong di darak pasar. Ong Hùng Ky, Yam ndok HTX Jitvu tong hop palei Katuh, xa Phước Dinh, tinh Khanh Hoa ndom mayai lac:.

“Yaom hu tut tangin pambuak harak saong urang blei salih blei bih ndap nda kaya, ngak ka mikva chreih sambai. Pagap ye mikva page masup aval peih mata mai nao jaoh rabung hu 10 ky, 20 ky lac hu jien chip’’.

Urang ngak hamu di palei Katuh urak ini patom bruk iek glang bruk pala, page masup subuh mai duah "jien mbaok, padai tasah” anak mata. Jien tame karo, raidiuk tagok, ralo baoh sang truh kathaot, padang hu sang danaok gheih ghang, raong anek bik mbang bac magru jeng urang. Sa-ai Kiều Thị Hiếu daok di palei Katuh bui sambai lac:

‘’Ngak apuh hu rambah, trun ini pala rabung prang sahnang jang, daok di sang kathaot. Yau nan ye trun ini pala phun rabung prang mboh siam jang.

Ong Trần Ngọc Bình, Phaok Bi thu Ndang uy, Akaok UB Bhap bini xa Phước Dinh, tinh Khanh Hoa khan brei thau lac: Meng di thun 2020, Chi bo palei Katuh pambuak saong HTX Jitvu Tong hop palei Katuh jak ba hu 24 baoh sang urang kathaot tame HTX. Bahrau hu 3 thun, taong abih 24 baoh sang truh kathaot. Labaih 80% baoh sang di palei Katuh urak ini jeng kaya mada; abih dalam palei daok 2 baoh sang kathaot – mboh biak takik dut tui palei karei dalam tinh.

“Daok tui chi bo palei Katuh mek hu ginuh siam glaong. Kayua lac chi bo palei ini ngak ralo bruk siam. Tui bruk ngak di palei Katuh urak ini jeng lac bruk ngak di HTX rabung prang saong chi bo palei ini, dom urang akaok palei jeng nao jak ba ngak tui bruk ini mboh biak siam brei ka mikva”

Kadha brei ka bruk pala phun rabung prang oh lac bruk ngak mbang kinh te, blaoh nyu daok brei thau bruk di urang pan akaok di Ndang,bruk nao dahlau di ndang jeng ye prein khang di kapul jum pataom di bhap bini. Gam sa hatai tui jalan di Ndang, bhap bini urang bangsa Cam palei Katuh, xa Phước Dinh daok ba prein, abih hatai jai ba tame bruk padang bhum palei Khanh Hoa dak harei dak kaya mada./.