Meng puac bilan 3/2026 tal urak ini, pandiak bhang dui atah ngak ka 757 ha padai Dong Xuan di dom mblang hamu puac halau daok dalam dom xa Hòa Thịnh, Hòa Mỹ, Tây Hòa saong Phú Hòa 2, tinh Dak Lak daok kurang ia. Thun blaoh, hajan ia sua ngak tayah dom binuk majam ribaong ia nan harei brei harei trun pajaih padai Dong Xuan thun ini suai 1 bilan dut haong yaok thun, ngak ka tukvak ngak hamu saong bruk choh bangu laik tame tabung glaong bilan thu. Mbuan ngak patrun bruk ngak hu ngak ka urang ngak nong biak duh hatai:

"Pandiak bhang ngak ka phun kayau suai cakrok dalam tuk phun padai daok chroh bangu thu ia rilo labik.” “Padai daok choh khin hu ia, brei pabak ginup ka phun padai daok njauk thu khiak, khiak gam hala saong tangi padai thu.”

Piah daong padai, rilo harei tapa, Kongti TNHH MTV Thủy nông Đồng Cam, daok dalam So Ngak nong saong Alam langik Dak Lak hu peih gam gam 7 balai njuk ia. Gam haong dom balai njuk ia padang kajap sa labik, majam njuk ia ngak caga jeng hu ba tame ngak. Halau ia di dom danao, dom kraong hu jak ba rilo abih piah njuk ia pabak tame dom balai ribaong, jhul ia tagok dom labik hamu glaong, atah. Ong Nguyễn Văn Nhành, Phaok Yam ndok Kongti TNHH MTV Thủy nông Đồng Cam, tinh Dak Lak brei thau:

"Ngan haong mblang taneh hamu kurang ia labaih 700 ha daok dalam majam ribaong Meraong ye jalan langyah lac njuk ia samu oh ngak kan kandah tal bruk ngak hu. Tui kuhria meng ini tal puac bilan 4 lac biak pandiak khang nan adit ini saong adit hadei veik lac tukvak biak catang, ye kongti jeng peih bruk njuk ia khik kajap hu ngak gam gam, tuk bo phun padai hu brei brah blaoh ye kongti patakik njuk ia.”

Piah ramik caga ka ia hu ngak siam lagaih, dom kapul ramik caga ia tuh hu daok khik luac harei melam, gam pandar dom balai njuk ia plaih pandiak bhang, gam pambuak haong kapul ramik caga ia di dom HTX ngak nong peih bruk pandar ia lagaih tui jalan meng atah tal jaik; patakik bruk urang ngak nong duh hatai ta-eng nao me kia ngak chung ka jalan kuhria ramik caga ia. Ong Nguyễn Đức Toản saong ong Đặng Quốc Hoàn, Kapul ramik caga ia labik Hòa Đồng, Hòa Mỹ, tinh Dak Lak brei thau:

"Balai ini nduac 2 baoh jamraik 33Kwh, jalan kuhria lac khik tani tanat labaih 10 harei pabak hu halau ia ka dom labik daok kurang ia.”

"Pacang caga ia thu ia ye adei sa-ai brei daok khik luac harei melam, ngak bruk abih prein piah pandar ia harei malam piah ba ia nao tal dom labik hamu mbok, atah saong dom labik thu ia.”

Bruk caga mbuan rah tabiak pandiak bhang daok dak harei dak khang gam saong bhum ceik gah timur tin Dak Lak, tuk rilo danao padang ia dak harei dak thu. Jaik 1 bilan tapa, yaok 5 harei ye dom baoh sang di palei Hòa Sơn, xa Sơn Hoa, tinh Dak Lak brei tabiak hamu nduac jamraik njuk ia, njuk ia meng dom bingun paghueih piah daong padai. Tui mikva daok pak ini brei thau, ia danao oh daok, tok hu jalan langyah paghueh bingun meng daong hu padai yaom lac biak palai lahik rilo jien. Mikva urang ngak nong daok brei thau:

"Pandar rilo yaok pandap panda jamraik piah njuk tui ia daong min. Meyah ta-eng njuk ia tuh ye padai ngak hu jeng oh trun manieng hadom.” “Njuk ia sa mbang paje, ye mbang ini veik lac dua mbang ka padai nyu tathak ye padai oh tathak ye asar brah nyu oh trei asar ye nyu mbuan si brai.”

Dang anak bruk langik pandiak bhang biak khang yau urak ini, So Ngak nong saong Alam langik tinh Dak Lak hu kakei dom jabat, kapul pasang iek, taong yaom njauk bruk halau ia di dom binek kraong ribaong jeng yau peih bruk padang jalan ngak, jalan kuhria pandar halau ia siam lagaih, khik kajap njauk lagaih haong hatai caong khin pandar ia di yaok bhum taneh, yaok labik, abih di nyu nan lac dom labik kakei caga bruk langik pandiak bhang, kurang ia; gam haong nan hu jalan pala drak ka nyu lagaih, patakik dom khat lahik kayua langik pandiak bhang ngak tabiak./.