Di Raya Po Hung, harei 30/4 – 1/5 saong tukvak tabung glaong di bilan pandiak he 2026, tuai damuai mai mai tal Lam Dong kuhria tagok khang. Piah caga ka bruk ini, langiu dom danak dak pachreih, rilo labik daok pandaok saong labik rivang me-in daok chreih chrai paglaong pakat jitvu, khik kajap asar siam duh dalam tukvak tabung glaong.

Amuk Nguyễn Thị Mai Trâm, Urang daong bruk ka Tong yam ndok Muine Bay Resort brei thau, gam haong mblang bein hijao praong labaih 8 hecta, 212 bilik duk saong 2 danao luai ia praong, labik daok srap gap ba tabiak rilo danak dak bahrau. Naih gheih lac bruk ba drei tame ngak lan meng kan saong dom kadha me-in duh ka uranaih yau ye: juak ada vil danao, bruh bọt tuyết danao luai ia pambuak haong phling ragam chreih sambai, brei ka ikan saong tapai mbang…

“Taphia di nan, tasik daok tame bilan gheih abih. Di Hòn Lao, tuai damuai meda ba drei tame ma-in jitvu phao patei katung nduac nao tabiak kaoh pulao piah nyuk ia maong iek karang atau vah SUP. Pak ini daok hu ciim, akaok par mai ngak thruh nan tuai damuai hu maong iek tapak meta, gam haong nan, tuai daok hu ba drei tame nyuk ia tasik aong tapul ikan saong maong iek karan”).

Gah jirah rivang tinh daok caik hatai pataom prein tame brei drah samar chip jhul khang tour jalan tabak saong tour pambuak bhum dalam tuk mblang kapal ahaok par Liên Khương anak meta brei kareih bambang piah ngak bahrau, ngak pasiam veik. Gam haong nan, tinh patagok bruk yaih khan di angaok nen tang lek taka so saong padang harak labik piah palagaih abih bruk pathau khan khau tin ka tuai damuai jirah.

Tui ong Nguyễn Văn Hùng, Phaok Akaok Kapul Jirah rivang tinh Lam Dong, meng ini tal luac thun, bhum palei meda brei peih rilo danak dak praong sit yau ye: Bilan Jirah rivang; Festival Bangu. Daok ngan haong tuai damuai dunya mai tal ban Da Lat (klak), dom kapul jirah rivang brei peih bruk raok meng mblang kapal ahaok par Cam Ranh saong nao tui rah jalan peih samar:

“Meng blaoh, di mbang nyaom biai jirah rivang gam haong bruk hu mbaok tame di dom tinh, taong abih jeng sa hatai daong prein Lam Dong saong ban Da Lat (klak). Langiu di bruk nao samar meng ahaok par yau dahlau, urak ini tuai damuai meda peih nduac angaok jalan peih samar atau dom jalan tapen tasik. Khol dahlak caga dom labik padeih takai raok tuai, ngak jeng bruk njauk chreih takre ka luac jalan nao jirah rivang di tuai damuai”.

Bruk ngak dalau yau ini hu padang di angaok bruk cakrok pataok karo kajap. Njauk caik hatai lac, hadei di mbang pagam dom labik, “Lam Dong bahrau” urak ini hu jalan tapen negar atah 140km saong jalan tapen tasik atah 192km. Ngan haong thaik thaot langik tasik ceik glai biak parilo janih, hu ieu lac “suraga jirah rivang” pataom ginup “ceik glaong – danao praong – kaoh pulao gheih”, bhum palei daok patagok preih dui pachreih khang ngan haong tuai damuai dalam saong langiu negar.

Ong Đinh Văn Tuấn, Phaok Akaok UB Bhap bini tinh Lam Dong ndom lac, tinh daok pataom tame bruk pasiam dom bruk oh ka lagaih, abih di nyu nan lac jalan mbak piah pandar rilo abih kein lagaih bahrau:

“Tinh Lam Dong biak rilo kaya ngui kein lagaih saong asar ilamo, khin caong lac lac labik mai rivang me-in bahrau ka tuai damuai dalam saong langiu negar. Bruk mblang kapal ahaok par Liên Khương anak meta brei kareik bambang piah pasiam lac sa bruk oh lagaih, min khol drei meda hu salih kan kandah jeng kein lagaih praong. Ini lac tukvak yaih khan dom jalan mbak bahrau, ba mai ka tuai damuai dom bruk rivang me-in gheih karei ka labik praong di Lam Dong”.

Gam saong dom kaya ndap nda kaya gheih karei, ngak bruk pambuak labik dhua jeng sa luac jalan gheih makre taong abih meng cek glai trun tasik kaoh pulao, gah jirah rivang Lam Dong raong abih hu bruk piah caong takre tame bilan jirah rivang bilan pandiak he 2026 hu cakrok saong chreih sambai./.