Kuhria mbiah tal ini, Dong Thap hu labaih 1.800ha taneh pala phun caraih, hu labaih 100 ndap nda lac kaya mbang, kaya ngak gheih meng asar caraih; hu jaik 60 kaya caraih mek hu 3 – 4 patuk. Yaom kaom ngak tabiak di gah caraih yaok thun di tinh Dong Thap mek hu labaih 1.900 ty ndong. Mintapi, urak ini, gah ndap nda kaya caraih daok gaok kan kandah praong kayua  : Langik salih pandon karei; jit ruak, kurang pambuak dalam majam yaom kaom; langiu di nan, urang ngak nong daok naong trak jien buh tame ngak tagok, asar ngak tabiak patrun, pambuak oh kajap saong kaya oh ka hu rilo… Dalam nan lac hu “Bruk tapik” ka pajaih hacih sa-at anek ruak daok jeng sa bruk tapik praong abih, pacang caga prein cakrok. Ong Nguyễn Ngọc Thanh xa Hưng Thạnh, tinh Dong Thap brei thau.

“Dahlau diah, pala phun caraih drei mek pajaih meng hamu ini tapa hamu diah nan takai ruak nyu biak rilo; caraih jeng njauk ruak rilo. Meyah hu pajaih caraih brei tam pabam tam mô ye nyu siam jang”.

Piah patagok yaom kom ka bruk pala phun caraih, Dong Thap daok jhul khang paglaong yaom kaom phun caraih tapa bruk ngak nong, pandar ilamo ngak kong tui jamariak pakat glaong. Meng dom bruk kan kandah, kurang dalam bruk ngak mbang, rilo urang ngak nong, urang jakar ilamo ky thuat hu srap gap roh duah, pasiam ilamo ky thuat, khang hatai pandar ilamo khoa hoc – kong nghe piah paglaong bruk ngak hu, asar siam ndap nda kaya ngak nong saong siam lagaih brei ka kinh te; Dalam nan brei thau lac, bhum palei jeng hu sangka iek praong bruk pabam tam mô dalam bruk ngak tabiak pajaih; ini lac peih akaok ngak njauk tanut di pajaih hacih sa-at oh ruak dalam rilo labik. Ong Ngô Hùng Vũ, Phaok Yam ndok HTX Kim Phát, tinh Dong Thap, brei thau.

“Hop tac xa daok hu kein lagaih khang brei ka bruk ngak tabiak pajaih siam glaong; nao tal bruk brei HTX jeng khin pambuak saong kapul gah kaya ndap nda ngak meng phun Caraih, mikva urang ngak nong pala caraih piah peih ngak di angaok bhum pala di drei; piah patakik hu dom bruk daok tapik tavak lac caraih njauk ruak biak rilo; pambuak bruk pasiam taneh, taong ruak dom janih jit ruak”.

Gah ngak tabiak ndap nda kaya asar caraih daok salih drei khang meng bruk meteh ndap nda tamo (asar, taduk, hala) tapa kinh te rilo tal pakat, parilo abih kein lagaih. Naih gheih lac bruk pandar bruk pala tablak “Caraih – Menah” piah paglaong yaom kaom di sa mblang taneh. Urak ini, rilo bhum palei daok hu dak ngak dom tong “balai ve tinh” nao dahlau dalam bruk taduan saong salih tapa ilamo ngak kong pajaih bahrau.

Ong Ngô chí công, Akaok Kapul gah ndap nda asar Caraih Dong Thap ndom mayai lac: patagok karo kajap gah kaya caraih brei tah klak bruk pambak tame langik tasik saong jit ruak. Bruk pandar pajaih caraih raong pabam tam mô lac bruk hu angan makna piah padang bhum pandap tamo, pabak akaok tame siam glaong ka ilamo kong nghe ngak kaya dalam saong jirah rivang me-in.

“Gam haong bruk di Kapul gilang ndap nda, khol dahlak daok kham merat ngak jeng bruk pambuak dom baoh sang piah dak harei dak ngak jeng dom HTX tani tanat brei ka gah asar caraih. Piah meda hu pataom gilac, pambuak dom baoh sang rahra haong gauk, piah ngak tabiak, pabak kaya praong rilo, pabak hu hatai caong di darak pasar”.

Gam haong bruk pambuak khang di 4 baoh sang, dom bangu caraih tui ilamo ngak kong pakat glaong paguon sanya ma-om hijao mblang hamu, ngak jeng dom bilan kanyik mek hu rilo. Ini oh lac sa janih brei patagok ka bruk ngak hu blaoh nyu daok brei mboh labik dang karo kajap di angan je asar Caraih Dong Thap di darak pasar dunya./.