Dom thun jaik di ini, “Brah hacih Thăng Bình HTB” di Hợp tác xã dịch vụ tổng hợp Ngak nong Thăng Bình, xã Cư Kty, huyện Krông Bông hu urang blei pandar taong yaom glaong. Thun 2020, “Brah hacih Thăng Bình HTB” mek hu angan chuẩn pandap panda OCOP 4 patuk pakat tỉnh. Abih di nyu lac di akaok thun ini, hợp tác xã hu mboh tangin tame harak pablei brah hacih tapa New Zealand. Urak ini, brah hacih Thăng Bình HTB hu 26 đại lý di 12 tỉnh ban dalam negar.

Bruk DN jhul khang talei pambuak gauk ngak, pablei pandap, ngak tabiak dom chuỗi pabak pandap panda hacih sa-at nan lac bruk njauk ngak. Pagap yau di công ty cổ phần Damaca Nguyên Phương, xã Phú Lộc, huyện Krông Năng, tuk hu mbaok tame chuỗi pambuak gauk, công ty hu sanya: urang nong hu pablei pandap haong yaom tani tanat, takik rủi ro; doanh nghiệp buh jien tame blei pajaih, khak drak. Gam haong nan, doanh nghiệp jeng peih ngak siam bruk pabak brei pandap panda. Amuk Nguyễn Thị Thu Phương, Akaok Công ty brei thau:  “Urak ini, mikva  urang nong tok ngak tui pren di drei ngak hu. Kayua yau nan ye,  dom doanh nghiệp njauk hu mbaok tame gam haong urang nong piah ngak tabiak pandap panda ka nyu siam jang yau: yuak njauk tukvak mek hu siam di abih. Jeng yau mong iek phun, ngak habar ka nyu siam ye oh njauk lac tok hu urang nong ngak bruk ini bo dom doanh nghiệp, jeng yau jabat chức năng karja puk palei njauk daong ka urang nong kadha nan meng ba mai hu kein laba".

Min anak meta mboh lac, di Đắk Lăk dom chuỗi pambuak gauk dalam  chế biến kaya nong daok takik, oh ka praong; jien buh tame ka ngak kong chế biến jeng daok biar nan ye oh ka paglaong hu yaom pandap panda kaya nong tapa chuỗi. Langiu di nan, dom doanh nghiệp, hợp tác xã oh ka duah hu labik pablei tabiak tani tanat nan ye kan peih prong chuỗi pambuak bruk... Ong Trương Ngọc Quang, Akaok Công ty TNHH Ca Cao Nam Trường Sơn ndom lac: “Patagok bhum nguyên liệu urak ini Đắk Lắk hu jaik 1.200 hec ta ye caong khin hu sarak pataom tame jang piah cak rok patagok rilo janih jang. Meng nan daong ka mikva urang ngak atau dom hợp tác xã ka nyu khang jang piah mikva urang nong thau lac bruk pambuak gauk ngak lac sa dalam dom bruk njauk ngak chip dalam bruk padang chuỗi giá trị piah yam tal ngak tabiak khang kajap”.

Tui ong Nguyễn Hoài Dương, Akaok Sở Ngak nong saong cak rok patagok palei pala Đắk Lắk, piah daong cak rok patagok chuỗi pambuak bruk, Đắk Lắk daok kham merat peih ngak dom Sarak di Raja-ei ka pachreih patagok talei pambuak gauk dalam bruk ngak saong pablei pandap panda kaya nong: “Pathau khan daong palagaih di abih ka dom puk palei, dom bhum dalam tỉnh. Abih di nyu lac dom bhum hu rilo pren khang ka dom đặc sản ye bruk pambuak gauk pablei pandap lac hu makna prong dalam dak padang chuỗi giá trị pandap panda. Mong mboh hu bruk nan, sở hu ba tagok UBND tỉnh mboh tangin tame đề án daong pandap panda, tapa nan pambuak bruk haong dom puk palei, dom bhum palei grauk labik dalam negar piah pablei pandap panda dalam tukvak anak tal.”

Đắk Lắk urak ini hu labaih 380 hợp tác xã ngak nong saong labaih 90 doanh nghiệp xuat nhập khau. Pandap panda kaya nong di tỉnh hu mbaok di 68 negar, bhum taneh angaok dunya. Ini lac jalan peih tabiak praong dalam bruk pambuak pagam chuỗi dalam bruk ngak nong. Meyah Đắk Lắk patagok hu pren khang peih ngak bruk pambuak gauk meda rik daong praong dalam bruk langyah gah chất lượng kaya nong, paglaong hu yaom saong cak rok bruk ngak nong khang kajap anak dom srau dhau di darak pasar./.