Tui So Ngak nong saong Alam langik Dak Lak, dalam tinh urak ini hu 2.575 gilai ikan tut angan dalam majam co so du lieu bruk ngak ikan pakat negar, 100% gilai ikan hu pagam kaya pasang iek luac jalan nao (VMS) tui adat. Min, bruk ngak tui adat tuk gilai nduac di tasik jeng pambak tame rilo di ilamo di urang nao tasik. Dom bruk padam atau paok kaya pasang iek luac jalan piah plaih bruk pasang iek di jabat karja, ba tal bruk mbuan taong mek ikan di bhum tasik langiu nagar.

Dang anak bruk nan, tinh Dak Lak brei taong bhat catang dom bruk ngak suan piah padang siam adat dalam bruk taong mek ikan hadang kaya ikan iar tasik. Ong Tạ Anh Tuấn, Phaok Bi thu Tinh uy, Akaok UB Bhap bini tinh Dak Lak ndom meyai brei ka bruk hik:

“Bien phong caga negar, Mban pasang iek pabah lamnge ikan brei pathau khan praong prang ka mbang nao tasik lac khol drei taong bhat meyah ngak suan, rilo meng lac di tukvak ini; pasang iek taong abih gilai ikan bhum tasik praong, blaoh dom bruk ngak suan brei taong bhat yau habar; caga srap gap dom harak gal di gilai ikan di bhum palei ka bruk pacang caga IUU saong brei mboh bruk kham merat ngak catang di tinh dalam bruk ini.”

Meng harei 1/1/2024 tal ini, dom kapul jabat bruk ngak karja di tinh Dak Lak, hu taong bhat 116 bruk ngak suan harak gal dalam gah ikan hadang, ngan haong taong abih paok jien taong bhat labaih 676 trieu dong. Dom bruk trak, hu ginup kadha hukum piah maong iek taong bhat hinh su.

Bahrau blaoh, Jabat Polih pasang duah di Kong an tinh Dak Lak hu duas sa po peih nduac gilai ikan ka bruk peih bruk pajeng urang tabiak langiu negar suan hukum hadei tuk ba gilai di drei gam haong urang dalam gilai tapa bhum tasik negar langiu taong mek ikan hadang suan hukum. Dai ta Võ Duy Tuấn, Phaok Yam ndok, akaok jabat Jabat polih pasang duah Kong an tinh Dak Lak brei thau lac brei patagok bruk pasang duah, taong bhat catang dom bruk ngak suan:

“Kong an tinh hu pato tacei kong an 12 xa phuong tapen tasik pambuak haong Jabat Bien phong saong dom kapul pasang iek, pasang duah, taong bhat saong pacang cakak taong mek ikan hadang suan hukum IUU. Tal ini brei ngak harak khan oh daok di sang dom tukvak ngan haong dom po gilai, abih di nyu nan lac pasang iek dom gilai taong mek ikan hadang atah ar njauk adat hukum piah taoh talaih kat kanyik IUU dalam tukvak mai tal.”

Anak bruk jabat chuc nang taong bhat catang dom bruk ngak suan hukum IUU, rilo urang nao tasik di bhum palei brei mboh bruk njauk hatai, kayua dom bruk taong mek suan hukum oh tok ngak khat lahik ka po gilai blaoh daok ngak kan kandah tal angan je bruk ngak mbang taong mek ikan di Viet Nam saong hatai kham merat talaih “kat kanyik” di dalam negar.

“Ini lac bruk taong mek suan hukum. Mikva jeng njauk hatai ka bruk dom urang ngak oh njauk tui hukum nagar ye njauk taong bhat. Dahlak hulin jeng caong lac brei ngak catang piah ka bruk taong mek oh nao tame bhum tasik tapen negar, tapen tasik langiu negar.”

Dak Lak hadei pagam lac sa dalam dom bhum palei patagok khang bruk vah ikan ia tasik saong kapul gilai taong mek atah mbaok ar tame tasik praong. Meyah dom kaya ndap nda tasik gaok kan kandah dalam bruk pablei tabiak langiu negar kayua “kat kanyik” IUU, raidiuk di yaok ribau urang nao tasik saong majam jitvu daong duh bruk ngak ikan gaok kan kandah tui.

Bruk langyah catang dom bruk ngak suan tui IUU oh tok lac piah taoh talaih “kat kanyik” aval di EC blaoh daok lac sa bruk ngak hu makna piah padang bruk ngak ikan tasak bruk saong patagok dalam tukvak anak tal./.