Baoh sang atah di urang bangsa Randaiy hu parang di Muziam Gilang daong brei tuai damuai rah rivang me-in hu bak meta maong ginup jang ka ilamo di urang bangsa Randaiy daok di Dak Lak.

Bruk mboh takre akaok meti lac quy mo praong di sang atah hu atah 42,5m, praong 6m, glaong 1,1m. Dalam baoh sang atah hu ngak majam pakat lanyal meng kayau biak karei.

Dalam ilamo di urang bangsa Randaiy, dom baoh pakat lanyal oh lac piah duh ka bruk kajan tagok trun, blaoh nyu daok ndung dalam nan ilamo praong dalam saong adat cambat tanarakun hu ngak jeng saong hu khik piah tapa rilo rairah dakrai.

Baoh pakat lanyal dẹt brei ka urang kamei. Tuk tuai damuai mai me-in di sang atah ye hu da-a nao tagok meng baoh pakat lanyal ini tui makna biak iek praong. Gam haong pakat lanyal dẹt, lanyal vil brei caik ka dom urang likei dalam baoh sang.

Baoh sang atah di Gilang Bangsa Muziam Dan toc hoc hu padang ngak ye yau tamo tui thaik thaot baoh sang bhap bini di urang bangsa Randaiy. Labik bilik tuai damuai daok hu urang Randaiy ieu meng angan bhian randap lac “Gah” bhian hu parang dom kaya banrik di baoh sang. Meng dom majam caing tal gaok kang praong, vil taom dar lac dom majam paban kik meng kayau tamo, khang kajap, sambo bar tariyueng  tui tukvak, jeng lac labik raok payak tuai.

Meyah banah Gah ieu lac mbaok meta di baoh sang atah gam song dom adat, ye nao tame dalam gah likuk, tuai damuai jirah hu maong mboh labik di baoh sang atau daok hu angan ieu karei lac “ôk”.

Labik ini hu rabha jeng bilik karrei piah padeih padei saong khik piah kaya ta-eng. Dom bilik ndih hu rabha meng ganing la-a gam ngak jeng bilik karei, gam khik tani tanat talei pambuak di dom rai rah dalam sa baoh sang. Dalam dom bilik jeng caga ging apui piah paghang tuk langik la-an saong lagaih ka bruk daok dang dalam sang.

Bruk hu mbaok di baoh sang urang bangsa Randaiy dalam ban ine Ha Noi oh lac sa bruk parang iek, blaoh nyu daok ieu lac sa janih kham merat padang gilac drap ar ini meng abih tung tian. Di ini, yaok tuai damuai oh lac mai piah maong iek sa danak dak sang danaok, blaoh daok piah ba drei tame ilamo gheih karei di urang bangsa Tay Nguyen. Langiu di nan, pabak veik bruk iek praong ngan haong ilamo siam gheih di bangsa Randaiy di Tay Nguyen saong bhap bini dom bangsa takik Viet Nam./.