Tui dom urang hu ilamo, Dong Nai urak ini daok dalam kapul 4 bhum palei dang akaok dalam negar brei ka bruk dui pachreih buh jien tame tapak negar langiu (FDI), dang di yang ka 4/di dalam 34 tinh, ban saong meblah labaih 9,6% phun jien FDI di Viet Nam dalam thun 2024. Min, bruk glac cagar lac yaom phun jien FDI tuh mai khang, blaoh labaih 5% gah ngak mbang pablei salih dalam bhum hu buh jien tame ralo. Bruk kurang dom kapul dang akaok dui ba majam yaom kaom ngak ka prein pambak tabiak, pachreih salih bahrau, hadah krah saong paglaong bruk ngak hu di Dong nai daok kurang.

Rilo urang hu ilamo jeng tacei tabiak dom bruk tavak tave daok kateik bruk patagok di tinh. Dahlau abih lac bruk oh samu gauk hu mboh cambaih laih di labik gah Barak saong gah Meraong tinh. GRDP kuhria rah tapa tui yaok akaok menuac urang gah Barak biar jang labaih 45% dut saong gah Meraong.

Tui ong Nguyễn bảo Long, Phaok Yam ndok hợp doanh Kongti TNHH The Boston Consulting Croup (pambuak bruk pathau khan ndom meyai ka danak dak), taneh praong saong rahra rilo, labik dhua hu kuhria hu makna daok dalam pasak jalan mbak dalam negar saong labik jaik taphia Ban raya Ho Chi Minh, hu jalan nagar pambuak nagar Campuchia… lac dom kein lagaih, ngak tabiak kein lagaih praong ka Dong Nai:

“Dang di urang pato padar, tinh Dong Nai bahrau hadei tuk pagam hu dom janih khang, dom kein lagaih njauk patagok. Dom bruk gar tavak khol drei ieu yau ye lac dom kein lagaih piah hadei di pagam tinh Dong Nai bahrau hu kein lagaih patagok drah samar. Tinh hu 8 bruk cakrok samar, kein lagaih bo tinh brei thau dalam quy hoach mbang ini dut haong 2 quy hoach di tih Dong Nai saong Binh Phuoc klak”.

Daok tui amuk Phí Thị Hồng Linh, Yam ndok Danak dak kinh te patagok asar siam glaong. Dai hoc Kinh te Quoc dan, hadei di pagam Dong Nai brei hu rilo kan kandah, abih di nyu lac meraik gauk di dom bhum palei. Cambaih laih lac, tinh brei maong iek lac tinh oh tok meraik haong Ban raya Ho Chi Minh blaoh daok meraik haong dom pasak ngak kong praong abih dalam negar. Kayua yau nan tui amuk Linh, Dong Nai brei hu bruk ngak lagaih jang:

“Tinh brei pabak sa bruk kan kandah hu makna lac gah karja saong pasiam salih bahrau bruk karja. Kayua biak nao lac tanut PAPI jeng yau lac tanut ka prein meraik gauk di Dong Nai saong Binh Phuoc jeng daok dalam kapul dom tinh ban dang akaok dalam negar. Ini lac dom bruk kan kandah blaoh Dong Nai brei langyah, cih jalan kuhria patagok”.

Tui ong Hồ Văn Hà, Phaok Akaok Uy mban Bhap bini tinh Dong Nai, tinh brei dak ngak, labik bahrau lac kein lagaih piah ramik rabha gilac labik, labik patagok dom pasak kinh te njauk lagaih. Tinh mek panuac ndom di dom urang ilamo, po gah pasang iek pabak tame pasiam Quy hoach tinh tukvak 2021-2030, pamaong tal thun 2050 brei mboh cambaih laih jang dom jalan kuhria dalam labik patagok bahrau:

“Brei njauk padang danak mbang ini plaih bruk brei labaih saong brei oh ginup. Dom danak dak ha tang jalan mbak, dom jalan pasak, dom bhum kinh te ye brei ba tame, min hu dom bruk dom bhum palei meng ribaong dalam hamu jeng ba tame ngak ka so lieu praong ye biak lac oh njauk hu”.

Tui urang pan akaok di UB Bhap bini tinh Dong Nai, jalan kuhria di dom urang hu ilamo, urang ngak khoa hoc, dom jabat, gah ngak mbang pablei salih… lac dom taong yaom tantu, rilo gah piah salah blaoh jalan pasiam quy hoach tinh. Tapa nan, khik kajap pasiam Quy hoach tinh Dong Nai gam pabak hatai caong patagok samar, karo kajap, gam njauk lagaih haong jalan kuhria di trung uong saong bruk patagok di Dong Nam Bo dalam jaman bahrau.