Baoh sang amuk Nguyễn Thị Mai, daok di palei Phú Yên 1, xa Ia Hiao, tinh Gia Lai bahrau kaoh blaoh 3 ha tabau, mek brei tame labaih 240 tan. Hadei di tuk kaoh taong abih jien buh tabiak ngak, sang amuk Mai hu jien laba labaih 100 trieu dong. Hatai bui sambai ka bilan pala yuak kuak tuk gam njauk bilan, njauk yaom, gam hu sang jamraik ngak mac daong jien saong peih bruk kaoh tabau brei aval.

“Hatai bui sambai praong abih di thun ini lac sang mac daong kaoh tabau dalam harei tet piah khik kajap tukvak ka mikva. Sang mac saradang bhian daong yuak paik hu 30 ribau/1 tan piah ka mikva hu prein ngak”. 

Meng tuk ba drei tame bruk pambuak haong sang jamraik ngak saradang, baoh sang ong Đinh Kot, di palei Ó, xa Chứ Krey hu daong pajaih bahrau, tacei ba ilamo ngak saong ba jamraik tame ngak taneh, trun pajaih tal harei kaoh nyu. Meng nan, 5ha tabau di bilan pala ini hu ba mai jien laba labaih 200 trieu dong ka sang ong Đinh Kot:

“Mikva khol dahlak pala tabau ye tani tanat jang dut haong phun habei plom, phun tangei, phun ritak… meng phun tabau bo raidiuk hu tani tanat jang”.

Bruk pambuak ngak pala tabau hu daong brei siam makre brei ka raidiuk di rilo baoh sang rahra palei Ó, xa Chư Krey ngak jeng bruk salih siam dalam hatai sahaneng, bruk ngak di mikva bhum urang bangsa takik tinh Gia Lai. Ong Đỗ Minh Sơn, Akaok UB Bhap bini xa Chư Krey, tinh Gia Lai brei thau, mikva dalam xa daok dak harei dak salih dom taneh phun pala oh siam lagaih tapa pala phun tabau, njauk haong langik, taneh riya di bhum palei:

“Dom thun jaik ini, mikva dalam xa salih phun pala, ba dom phun hu yaom kaom glaong yau phun tabau tame pala. Meng tuk pala phun tabau hu ngak salih ngak mbang di mikva rahra, hu raidiuk tani tanat jang, mbaok meta di xa jeng hu praong laneing lanoi tagok jang”.

Gia Lai urak ini lac bhum palei hu bhum pandap tamo phun tabau praong abih di bhum Kreh Negar – Tay Nguyen, ngan haong taneh praong labaih 40.000 ha. Tinh hu 2 sang mac ngak saradang, taong abih prein cong suat mek hu labaih 26.000 tan tabau/harei. Dom thun jaik di ini, dom sang mac hu srap gap padang majam pambuak pala haong urang ngak nong, ngak jeng bhum pandap tamo tani tanat saong karo kajap. Tabau yuak paik hu khik tani tanat di tanut angaok 80 tan/ha; rilo taneh pala tablak, hu majam ta-eng tui ia saong pandar pajaih bahrau mek hu labaih 90 tan/ha.

Ong Nguyễn Xuân Phước, Phaok Yam ndok dang bruk Sang ngak Saradang An Khê (tinh Gia Lai) brei thau, gah ngak mbang pablei salih daok padang mblang taneh pala tabau praong, jhul khang bruk ngak meng jamraik, pandar ilamo ngak kong dalam bruk pasang iek yuak paik saong ngak bruk iak tabau, brei kein lagaih ka urang ngak nong saong sang mac.

“Urak ini, taneh pala tabau lac hatai caong biak praong. Abih di nyu nan lac bruk sang mac paglaong bruk ngak hu ngak samar dom phun tabau di mblang taneh, daong raidiuk karo di rahra bhum palei”.

Tuk majam talei pambuak di urang ngak nong saong gah ngak mbang pablei salih dak harei dak lagaih khang, phun tabau daok daong raidiuk karo di yaok ribau baoh sang rahra daok di Gia Lai. Bruk khik kajap yaom pataom blei tani tanat, daong ilamo ky thuat, ngak jamraik saong peih bruk ngak pala tani tanat hu daong urang pala tabau sahanang hatai pambuak pagam haong bruk ngak, patakik khat lahik, patagok siam lagaih kinh te, daong patagok bruk ngak nong karo kajap di bhum palei./.