Bahrau di ini, ba drei tame di harei raya urang ngak nong pala padai thun 2026 kayua Jabat Padai bhum Taneran kraong Cuu Long pambuak haong Kapul Gah ngak padai brah Viet Nam, rilo urang ngak nong mai meng dom tinh bhum Taneran kraong Cuu Long hu ba drei tapak tame dom mblang hamu piah pasang iek, tui iek bruk cakrok di yaok janih pajaih saong palih ruah dom pajaih padai hu njauk kein lagaih haong bruk pala drak di bhum palei.

Sang ong Lý Văn Sum, xa Vĩnh Trạch, tinh An Giang urak ini daok pala drak labaih 5ha padai saong ba drei tame pambuak bruk pala padai Đài Thơm 8 piah duh pablei tabiak langiu negar. Meng bruk pala drak di angaok mblang hamu padai di Jabat Padai bhum Taneran kraong Cuu Long, ong Sum taong yaom hu labaih 5 pajaih OM hu lagaih, dom pajaih ini ini meda hu brei padai biak rilo saong njauk haong kein lagaih pala drak di bhum palei.

“Ruah hu 5 janih pajaih brei kein lagaih, drei taong yaom meda brei hu rilo padai, darak pasar drei daok suhsah ka yaom kaom, darak pasar. Meyah yaom kaom darak pasar tani tanat hu brei ka urang ngak nong ye dom pajaih ini hu lagaih ka urang ngak nong hu yaom glaong.”

Ong Nguyễn Văn Vững, xa Ba Sao, tinh Dong Thap brei thau, tapa roh duah dom pajaih padai, ong mboh pajaih OM17 hu asar brah siam saong mbuan pablei, daok OM18 hu asar brah atah, njauk haong kein lagaih bruk pala drak di bhum.

“Di dalam ye OM18 ye njauk tanut abih, ngak suai saong lagaih hu 3 mbang pala, meyah dut haong urak ini ye oh ka tuk halei rilo jang, mbuan ngak jang, patui bilan pala, langik dui atah ye 97 harei gilac mai lac njauk di abih.”

Tui dom urang hu ilamo, bruk ngak padai brah lagaih haong bruk langik salih karei, gam haong nan pabak hatai caong dak harei dak glaong di darak pasar, lac asal kadha biak hu makna di urak ini. Ini jeng lac bruk piah padang dom bhum pandap tamo tani tanat, daong paglaong yaom kaom asar brah, paglaong prein meraik saong pabak siam jang hatai caong di darak pasar dalam negar jeng yau pablei tabiak langiu negar.

Ong Lê Thanh Tùng – urang ilamo thau ralo brei ka gah padai brah brei thau, yaok thun Viet Nam pablei tabiak langiu negar labaih 6-7 trieu tan brah, yaom kaom tagok saong kein lagaih dalam majam gah ndap nda jeng oh ka samu prein yaom ngak tabiak di nyu.

Yaom lac brah Viet Nam hu mbaok di labaih 150 baoh negar saong bhum taneh, angan je brah negar jeng oh ka hu ngak tantu cambaih laih labik dang di darak pasar pakat negar; rilo brah pablei tabiak langiu negar jeng pataom tame dom darak pasar hu yaom kaom oh ka glaong. Kayua yau nan ye, brei salih bahrau jalan pala drak tui jalan pandar pajaih hu mbaoh tangin, patakik pajaih pala, pandar ilamo ky thuat kali kalih jien buh tabiak, pasang iek siam jru pacang khik phun kayau saong paglaong tanut salamat kaya mbang. Gam haong nan peih ngak tui majam yaom kaom, paglaong bruk pambuak di urang ngak nong, hop tac xa saong gah ngak mbang pablei salih piah tani tanat akaok tabiak saong paglaong yaom asar brah.

“Salih jalan pala drak ye hu biak rilo min khol drei brei pataom tame dom bruk. Sa di nyu hu lac pandar pajaih hu mbaoh tangin saong patakik pajaih pala drak. Yau habar brei patakik pajaih, patakik pajaih pala drak daok lac dom asal kadha ka ilamo ky thuat pagam tui daong ka phun padai patagok siam jang, padai brah ngak hu rilo jang saong pasang iek hu dom kaya labaih, bruk pruh jru pacang hareik, pamatai abaw jeng yau dom jit ruak ngak tabiak angaok padai, meng nan khol drei meda pasang iek hu tanut siam brei ka kaya mbang.”

Dang anak bruk rah tabiak bruk di langik bhian salih karei saong hatai caong dak harei dak glaong di darak pasar, bruk palih ruah saong peih praong dom pajaih padai siam glaong, lagaih siam haong kein lagaih pala drak hu maong lac bruk hu makna piah padang bhum pandap tamo karo kajap. Ini jeng lac jalan nao njauk hu piah gah padai brah bhum taneran kraong Cuu Long patui veik paglaong yaom kaom asar brah, brei mboh labik dang saong angan je brah Viet Nam di dalam darak pasar di dunya./.