Di bilik mek sap di Jabat daok di Tay Nguyen, Rayo Sap ndom Viet Nam, sap puac gheh ghang, bangi pang di sa-ai H’Nêc Ênuôl – urang ndang dara, urang papar sap, urang cih vak bangsa Randaiy – jeng daok hu papar tagok yaok harei. Tapa riyak papar sap, dom jalan, sarak di Ndang, Karja mai tal hu haong dom mbon talei atah, labik papar sap lac bruk hu makna pambuak hatai je di mikva saong bangsa haong Ndang. Sa-ai H’Nêc ndom meyai lac:

“Praong tagok di dalam mbon palei, drei dak thau sap ndom di bangsa drei hu makna yau halei. Yaok kadha khau tin, yaok paka jeng hu khol dahlak hulin kham merat brei mboh meng sap bahsa jaik taphia, mbuan thau piah jalan ngak di Ndang, Karja mai tal jaik jang haong mikva. Meng harei tame Ndang, dahlak hulin mboh cambaih laih bruk di urang ngak khau tin, urang papar sap – saong hadah mbaok kayua hu rik tame bruk khik karo kajap hatai je di mbon palei haong Ndang”.

Meyah sap ndom lac talei pambuak hatai je ye ilamo lac halau agha di hatai gul pataom. Di xa Cuôr Đăng, tinh Dak Lak, sa-ai H’Pha Ayun –  sa urang ndang dara, Bi thu Ndoan xa klak – tuk halei jeng buh abih tung tian jak ba dam dara khik ramik ilamo bangsa siam gheih pagam haong patagok kinh te bhap bini. Sa-ai H’Pha brei thau lac:

“Dam dara ieu lac sa kapul hu makna angan di dalam bruk khik ramik saong patagok ilamo siam gheih di bangsa. Khol dahlak padeng dom kalup kapul kong caing, akayat, khik tani tanat adat meng kal, pamedeih labik ilamo piah dui pachreih tuai damuai. Tapa nan, dam dara hu mbaok tame me-in, kacah gauk, daong pambak ilamo bangsa, gam haong nan mbon palei patagok karo kajap”.

Gam saong khik ramik ialmo, dam dara dom mbon palei di Dak Lak daok ieu lac sa kapul nao dahlau di dalam bruk salih lek taka so – sa bruk hu makna bo Ndang, Karja daok brei peih ngak. Sa-ai Y Lê Pas Tơr, Phaok Bi thu bhian hu mbaok di Tinh ndoan Dak Lak brei thau, dam dara bangsa takik oh lac sa janih hu karo kajap hatai je tame Ndang blaoh daok ba drei ngak dahlau dalam bruk ngak bahrau, yau daong rahra pandar harak gar karja online, pambuak pablei ndap dna kaya nong tapa darak pasar online.

“Khol dahlak hulin hu padang dom kapul daong karja dua pakat, tacei ba rahra ngak jitvu karja online. Dom kapul ilamo kong nghe bhap bini patagok siam lagaih cambaih laih di bhum atah bayah. Tapa nan, dam dara lac hu makna dalam bruk padang palei pala bahrau, ban hadah krah saong patagok karo kajap”.

Khik karo kajap hatai jai je, khik ramik ilamo saong ba drei tame, kapul urang ndang dam dara urang bangsa takik di Dak Lak daok dak harei dak brei mboh bruk lac ngak talei pambuak karo kajap di Ndang saong rahra. Dom urang nan ieu lac urang ba tapak sarak di Ndang mai tal jaik jang haong raidiuk mbon palei, daong padang palei pala ginup meda, ndung bak ilamo saong patagok karo kajap haong negar./.