Danak dak kuac kuah, pakajap ia craoh Cái (jalan akaok meng braong ia Thợ Ụt tal kraong Dong Nai) lac danak dak kraong ribaong pambuak jalan mbak pasak hu taong abih jien buh tame jaik 5.600 ty dong. Ngan haong atah jaik 19km nao tapa dom phuong bahrau di Ban raya Ho Chi Minh lac Tân Khánh, Tân Hiệp, Vĩnh Tân, Binh Duong (daok dalam Ban Tân Uyên saon Ban Thu Dau Mot, Binh Duong klak), danak dak tuk salah blaoh hu tuh ia ka labik praong labaih 22.500ha saong ngak jeng jalan mbak pambuak bhum hu makna.

Min, di puac bilan 3/2026, labik padang laik tame bruk “nao oh tagok kadun oh hu”. Urak ini taong abih 13/13 paok thầu hu peih padang haong tukvak ngak mek hu meng 20% tal 98%. Min, daok rilo paok thầu daok brei ngak bruk anak meta ka bruk gar tavak mbaok taneh di 61 baoh sang rahra (rilo meng lac daok di phuong Tân Khánh saong Tân Hiệp).

Bruk Njauk duh hatai, dom labik oh oh ka peih mbaok taneh urak ini daok jeng dom “talei pak takuai kalaok” kan kandah di jalan ia nduac. Tuk bilan hajan ia sua 2026 daok jaik mai tal, ini lac bruk tapak ngak kan kandah, ngak ia dauk cục bộ, kan kandah tal bruk salamat di tatua Tổng Bảng saong rai hadiuk di yaok ribau rahra vil taom dan.

Ong Phạm Văn Quang, Yam ndok Xi nghiep 13 (Kongti Co phan Padang ar saong Patagok palei pala Hai Duong) kakei caga ka bruk di harei hadei meyah danak dak oh hu lagaih:

"Danak dak hu padang meng halau angaok tuh mai, ini lac jalan puac piah taoh tathuak ia. Meyah oh nduac lagaih tuk bilan hajan mai, taong abih ia hajan praong tuh mai ngak rah tabiak bruk ia sua bah, ngak kan kandah tapak tal sang rahra danak dak saong bruk salamat di tatua Tổng Bảng. Gaok mai, ia sua meda ngak haluh takai tatua, ngak mbuan jaleih tatua saong lahik trak bruk salamat jalan mbak”.

Tui Pasak Patagok taneh di labik Tân Uyên, danak dak hu 964 bruk gaok kan kandah. Tal ini hu jao bayar hu 888 bruk (mek hu labaih 92%). 61 baoh sang daok veik oh ka jao bayar kayua daok panuac likau ka sarak daong bruk ngak nong, bayar taneh langiu harak mbaoh tangin atau daok dalam luac tukvak meblah taneh, cang labik daok karei, pandar padang sang blaoh meng jao bayar taneh, lac oh ciuk panduan nao labik daok anak meta.

Anak bruk nan, dom labik padang saong po buh jien tame caong khin aval hu taoh talaih kan kandah mbaok taneh ngan haong dom jalan langyah catang. Dom labik ndom lac, brei jhul samar langyah harak gal bayar jien, patagok bruk ndom meyai, jak ba rahra; gam haong nan kham merat langyah dom bruk hu ginup kein lagaih cuong che.

Phuong Tân Khánh daok kham merat jak ba 41 baoh sang oh ka jao bayar taneh piah meda salah blaoh bruk mbaok taneh dalam bilan 6/2026. Ong Nguyễn Thái Bình, Phaok akaok UB Bhap bini phuong Tân Khánh brei thau:

“Ngan haong dom bruk taneh daok langiu harak gal di karja min rahra ndom lac daok dalam quyen so huu di drei, bhum palei daok peih bruk ngak cambaih laih, pataom harak gal hu pambuak. Meyah khik kajap ginup kein lagaih bayar jien tui Hukum Taneh thun 2024, khol dahlak brei payaom tuk nan. Bruk oh hu kein lagaih, UB Bhap bini brei hu harak gal javap calei saong langyah tui njauk danak karja”.

Gam haong jalan ngak hu jak jeng di puac bilan 12/2026, tukvak brei ka danak dak praong ini oh daok rilo. Piah ka jalan ia craoh Cái hu nduac lagaih dahlau bilan hajan ia sua, dom pakat karja brei langyah catang jang veik, langyah klaoh dom panuac likau lagaih di rahra, gam haong nan kham merat langyah dom bruk oh ciuk panduan piah pacang khik kein lagaih di bhap bini./.