Atah di ini labaih sa bilan, ia sua theik nao taong abih, ngak baoh sang di ong Võ Thành Phương di palei Phú Thuận sa tambok daok jaleih. Dalam tuk duh hatai abih, dom urang jakar, bol lin Sang bac Bol lin Quan khu 5 hu mbaok, oh huac kanda pandiak, oh huac kanda gluh haluk piah padang yau hatai caong takre ka baoh sang ong saong dom baoh sang rahra jaleih taong abih.

Urak ini, dalam baoh sang bahrau hadah gom, salao lisei mbang blaoh likau drei gam siam mekre, gam drut druai. Ong Phương jaik abih oh mbang hu dom, tangin lavang lavaih yuh yuh, tuk ye ba tagok uak ia meta gam hatai drut druai. Maong dom bol lin sit daok vil paban, ong drut druai ndom lac:

“Meng Sang bac Bol lin di Quan khu 5 daong dahlak hulin padang hu sang, ka dua lac dom kaya yau ye tivi, caneing ndih, dom kaya dahlak hulin bhian pandar lac adei sa-ai bol lin jeng daong. Likau drei dom bol lin dahlak tok thau tadhau ayuh taong abih adei sa-ai bol lin jeng hu bak prein yava piah daong ka mikva.”

Hatai drut druai nan jeng pambak tabiak dalam karja palei, tuk maong mboh dom baoh sang bahrau tamuh tagok di gluh taneh. Ong Nguyễn Hữu Thuận, Bi thu Ndang uy xa Hòa Mỹ brei thau, dalam 14 baoh sang padang bahrau tui “Danak dak Quang Trung” di xa, Sang bac Bol lin Quan khu 5 dang ngak 5 baoh sang, tal ini labik hu jao brei 3 baoh sang, 2 baoh sang karei daok brei samar chip salah blaoh piah mikva dil samu mbang Tet. Tui ong, yaok baoh sang oh sa janih lac labik piah daok:

“Yaok baoh sang hu padang tagok khang karo, oh lac labik piah pacang hajan pandiak di mikva blaoh nyu daok brei mboh bruk biak chreih chrai di hatai bol lin rahra anit ranam. Brei mboh cambaih thaik thaot siam gheih di Bol lin Wa Ho dalam hatai rahra.”

Di var huak palao tangin mboh siam gheih jang tuk sap guitar sameng tagok gam haong dom kadha adaoh. Oh hu mblang adaoh tamia, oh hu gom sambo, tok hu dom meta mblan mblan brei mboh ka hatai bui sambai ka sang bahrau. Min tuk yava sap kadha adaoh “Tình quân dân” sameng tagok, asal kadha palao tangin gilac ngak ka thei jeng mboh damen. Sa-ai kamei Châu Thị Minh Triều, Bi thu chi ndoan palei Phú Thuận, khan brei thau:

Băng: “Di palei Phú Thuận adei mboh biak rilo jalan haluk, mboh dom sa-ai urang ye galam jalen, urang ye pan vak, urang ye pan mbay nao tui yaok kapul nao tapa angaok dom jalan haluk piah mai daong mikva padang dom baoh sang jaleih ye mboh biak bui sambai hatai haniem phol saong thau dhar phol urang bol lin biak rilo. Tuk likau drei blaoh lac mai sang su-uan Bol lin rilo lo”.

Tuk biar harei trun takai ceik, dom baoh mek tangin biak kajap, dom tangin kuan biak gheih yau khik takai bol lin daok suai jang sa sit. Yaok baoh sang padang tagok oh tok piah pacang hajan pandiak, bo daok lac “balai phao” di hatai gul pataom. Dai ta Đặng Văn Trụ, Chinh uy Sang bac Bol lin Quan khu 5, brei thau dalam tuk likau drei:

“Dalam tukvak likau drei khol dahlak biak mboh drut druai kayua suai lavik paje mboh biak takik hu tukvak piah mai huak saong mikva. Dahlak hulin caong hatai khin lac harei taom gaok ini drei klah rabha hatai bui sambai saong anit ranam dalam raidiuk, ngak yau habar ka hatai di bol lin yau ikan saong ia. Tadhau ayuh pok sap salam selamat tal mikva samar drah tani tanat raidiuk, hlai haong raidiuk bhap bini saong tadhau ayuh mikva raok sa Tet bui sambai saong haniem phol selamat.”

Ia sua nao truh tapa, dom hatai di menuac urang jeng ndung bak anit ranam di urang xa Hòa Mỹ. Dom sa-ai tagok jalan, ba tui panuac tadhau ayuh di mikva, caik dom baoh sang siam gheih saong sa hatai anit ranam oh meda kurang hu. Takai yam di bol lin nao atah, min bruk anit ranam jeng daok kandaong, daong mikva anak bal Pataih thun bahrau./.