Tuk dom palei pala di gah Barak jeng ye gah Barak kreih nagar daok kham marat ramik pasiam bruk mai meng rabuk taso, hatai “ein nasei brei ao” di bhap bini urang ban raya HCM daok dui hadah tagok, meng di dom hatai uranaih bac magru, tal dom rik daong di urang kathaot jeng ye urang ngak bruk gah hukum, urang ngak mbang blei salih. 

Di Sang bac Phổ thông hu angan Nguyễn Đình Chiểu (TP.HCM), ralo adei bang mata ramik pataom jien chai harei harei biak tukik di drei rik daong dom ayut di bhum labik rabuk sua. Adei Đặng Lê Gia Thịnh (umo 11 thun) khan mayai lac:

“Anek hu mai piah rik daong, anek lakau amaik ame blei ia menyum tapi min anek khik piah. Anek caong dom ayut di atah bayah nan hu nao bac magru yau bhian, kajap karo salamat”.

Dom baoh jien biak sit min hatai bak praong ngak brei ka ralo urang druat druai. Oh taeng di dom adei daok sit, urang kathaot jeng paik hatai sit sot di drei rik daong tame. Di dom kadung jien dak di anak jabat Hội Chữ thập đỏ BanrayaHCM, dom urang pablei vé số, urang ngak kong pahacih dang buh tukik jien rik di drei mboh bak dom anit ranam.

Jeng ba hatai nao tal bhum ribuk sua, Kapul urang pan hukum di banraya HCM neh 2 tỷ đồng jien meng Quỹ di drei brei daong bhap bini dalam ribuk sua meng blaoh jeng ye daok ieu dom urang ngak hukum urang luật sư rik daong. Gah urang ngak mbang blei salih, Quỹ jien ngak pahhala jien ngak darphol Mái ấm Thế giới Di động jeng gam song Mặt trận. Urang lambok wakil Quỹ, ông Nguyễn Ngọc Sơn khan brei thau: thun halei Gilang jien drei ngak tui panuac ieu daong di Mặt trận, tame bruk brei pacadu pamadam kurang pandik pandua di mikwa bhap bini. Jeng ye brei gam khik hu danak dak daong urang anek saih matui saong uranaih bhum njauk bala langik tasik, piah daong dom adei hu nao sang bac magru.

“Khao tin khan brei ka rabuk sua drei oh taduan tahu bih cih, biak di nyu meng halei, palai jai yau habar. Hu jabat yeu ye Mặt trận Nagar, nyu meng pan hu abih kayua hu dom labik payua mai khan, thau labik halei palai, tahu labik halei khin caong daong hagait. Jien drei payua tal Mặt trận Tổ quốc, gait tanggung wajait wakil drei payua tal njauk manuac urang labik dhua”.

Tui ralo janih rik pataom jak ba yau ye dak kadung lakau rik di tapen jalan, payua harak tal yaok labik yaok urang, Pahasa kapul Hội Chữ thập đỏ TP.HCM dui pataom jien rik hu 1 ty dong jien mbaok, gam yaok rituh tấn kaya ndap nda jaik 4, 5 ty jien dong. Dalam nan hu 5.000 ndop nasei huak mbang chip brei ka labik daok rabuk sua, gam harei pandar nyu mbiah tal thun 2027. Sa urang pato bac daok di Quận 7 (klak) daong 40 thùng kadung ndap nda brei pandar chip, hadei di nan dom urang ralo darah dan saong urang bac magru di langiu nagar daok payua 40 thùng kadung kaya ndap nda. Dom urang ngak amaik ame di anek saih daok rik daong jien mbaok, brei mboh hatai anit ranam jum pataom praong glaong hahuan di drei oh daok paga pacang. Ông Trần Văn Tuấn daok brei thau lac:

“Dom blah binguk thaot payua mai meng di Thái Nguyên, Bắc Ninh… brei mboh ndap nda kaya daong hu nao tal tangin urang njauk rabuk sua. Drei pamadeih hatai anit ranam, dalam bhap bini rahra, mboh ralo binguk dalam masa rik daong biak druat druai anit ranam, nan jeng lac hu hatai jai anit ranam di dalam bhap bini urang banray HCM drei”

Rabuk sua jeng hu nao tapa, hatai anit ranam gauk hu daok kandaong. Ralo jang dom janih rik daong daok ieu lac janih prein khang yau patau yau tali baoh siam makre baoh intan di rahra bhap bini Việt Nam. Meng ban raya HCM, dom dom kapul radaih pajeng bak dom anit ranam di atah tabiak bhum palei gah Barak jeng ye gah Barak kreih nagar, brei mboh praong baoh kadha “anit ranam - siam mekre - hadah krah” di ban raya hu angan Wa Ho Chi Minh./.