Dom harei akaok thun bahrau 2026, di dom kadha chreih sambai pataih harei raya pesta akaok thun di Tay Nguyen, ong Trịnh Văn Bình, umo 69 thun, Akaok Kapul Bol lin meng kal di palei Đoàn Kết, xa Ia Hiao, tinh Gia Lai, hu ta-eng drei pab mbok ja;l tayah talei paga di baoh sang piah kaoh taneh alin brei piah peih jalan. Ong Trịnh Văn Bình brei thau, kaoh taneh alin brei piah peih jalan lac bruk rik daong lagaih di baoh sang gam haong mikva dalam palei pala, piah padang palei pala bahrau.

Băng: “Tui jalan peih bruk ngak palei pala bahrau, dahlak hulin mboh lagaih haong jalan ngak di Ndang hatai di rahra nan baoh sang dahlak yasa haong gauk ka bruk kaoh taneh alin brei dalam danak dak ba tabiak. Ngan haong bruk drei ngak ka bhap bini, bhap bini ngak ka drei, danak dak peih jalan ini biak kein lagaih ka mikva dalam palei dalam nan hu baoh sang dahlak hulin. Nao mai salamat saong lagaih, ngak mbang patakik jien buh tabiak, jien mek tame siam lagaih ye raidiuk rahra hu tagok glaong”

Xa Ia Hiao, tinh Gia Lai hu padang di angaok bruk pagam jeng sa meng 3 xa: Ia Peng, xa Chrôh Pơnan saong xa Ia Hiao, huyen Phú Thiện klak. Brei mboh ha tang jalan mbak lac bruk brei ngak karo kajap praong laneing lanoi piah patagok kinh te dalam tukvak thun 2025-2030, Ndang uy, karja xa Ia Hiao hu pataom tame jak ba rahra kaoh taneh alin brei, alin brei kaya kien truc piah peih praong majam jalan mbak palei pala. Bruk ngak tui di rahra hu samar drah ngak jeng sa danak dak pambak praong. Ong Đỗ Văn Điền, umo 63 thun, rahra dalam palei Đoàn Kết, chreih chrai ndom meyai lac:

Băng: “Taong abih rahra ngak tui, biak chreih chrai, ngak hu bruk ini lac bruk sangka di Ndang saong Karja, di karja palei saong dom pakat pan akaok nan biak mboh hadah mbaok meta. Jaik abih lac kayua mikva njauk hatai, jum gauk ngak, taong abih gauk rik prein ka meng ngak jeng sa thaik thaot gheih yau ye ini”.

Biak mboh di anak mata lac, piah jhul khang patagok ha tang jalan mbak, kadung jien takik di xa ia Hiao oh hu ginup piah bayar jienpeih paha taneh. Anak bruk kan kandah nan, Ndang uy xa hu ba bruk patagok jalan mbak tame Sarak, gam haong nan palih ruah jalan langyah pamedeih prein rahra, mek bruk njauk hatai di rahra lac hu makna. Brei mboh cambaih laih lac rilo jalan yau Yên Phú 1, Yên Phú 2, Đoàn Kết, Sô Ma Lơng meng jalan praong oh ka bak 3m, urak ini lac hu peih praong tagok 8m. Dalam nan, kadung jien Karja saong dom phun jien njauk hukum daong 90%, rahra rik daong 10% saong taong abih taneh hu peih paha. Ong Phạm Văn Phương, Bi thu Ndang uy, Akaok HĐ Bhap bini xa Ia Hiao ndom meyai lac:

Băng: “Khol dahlak hulin brei mboh bruk rabha bruk cambaih laih saong patagok bruk naih gheih di kapul urang jakar urang ndang. Pagam haong bruk rabha bruk ngak nan khol dahlak hulin hu palih ruah dom baoh sang rahra urang jakar urang ndang ngak dahlau. Palei akaok meti hu ngak lac palei Sô Ma Lơng A, hadei nan tal dom palei karei, biak rilo palei hu ngak hu, meng blaoh khol dahlak ngak hu 22 jalan meng phun jien pagam saong dom gah daong jien piah samar drah ngak ka mikva dalam xa”.

Dom jalan bahrau oh lac peih praong labik nao mai, blaoh daok peih tabiak jalan patagok bahrau ka bhum palei pala bahrau ka bhum palei pala tinh Gia Lai. Mbaok meta xa Ia Hiao dom harei akaok thun bahrau praong laneing lanoi, hacih sa-at gheih ghang, hatai je di rahra tame karja dak harei dak kajap khang. Meng bruk sa hatai di Ndang saong rahra, sa bruk siam gheih bahrau daok hu pambak tabiak, karo kajap saong khang kajap vak veik dom asal kadha gheih ghang ka palei pala bahrau di bhum taneh glaong Gia Lai./.